ປັດໄຈທີ່ເຮັດໃຫ້ເກີດພຶດຕິກຳສ່ຽງຕໍ່ສຸຂະພາບ

 ພຶດຕິກຳທີ່ລຶ້ງເຄີຍ ແລະ ເຮັດຈົນຕິດເປັນນິໄສໂດຍບໍ່ຮູ້ໂຕ ບາງພຶດຕິກຳສົ່ງຜົນຮ້າຍຕໍ່ສຸຂະພາບ, ບຸກຄະລິກກະພາບ, ຈິດໃຈ ແລະ ການຢູ່ຮ່ວມກັບຜູ້ອື່ນໃນສັງຄົມ. ຕໍ່ໄປນີ້ແມ່ນບາງປັດໄຈທີ່ມັກເຮັດໃຫ້ເກີດພຶດຕິກຳຜິດໆ.

     1. ສັງຄົມ : ໝູ່ເພື່ອນບາງເທື່ອ ຫລາຍຄົນນິຍົມເຮັດພຶດຕິກຳຕ່າງໆນຳໝູ່  ເຊັ່ນ : ສູບຢານຳໝູ່, ເສບຕິດການໄປທ່ຽວກາງຄືນຕາມຮ້ານບັນເທີງ, ຈັດງານລ້ຽງສັງສັນກັບໝູ່ຕະຫລອດ ຫລື ແຊັດໂທລະສັບລົມກັນຈົນເດິກດື່ນ ເຮັດໃຫ້ນອນໜ້ອຍກ່ວາທີ່ຄວນຈະເປັນ.

     2. ຄ່ານິຍົມ : ຄ່ານິຍົມ ຫລື ທັດສະນະຂອງຄົນ ຫລື ສັງຄົມທ່ີມີຕໍ່ສິ່ງຂອງ, ຄວາມຄິດ ແລະ ເຫດການທີ່ກ່ຽວຂ້ອງກັບຄວາມສຸກ, ຄວາມຕ້ອງການຕ່າງໆ, ຄ່ານິຍົມບາງຢ່າງຂອງສັງຄົມກໍອາດຈະຂັດແຍ່ງກັບຄ່ານິຍົມຂອງອີກສັງຄົມໜຶ່ງ ເຊັ່ນ : ອາດຈະມີກຸ່ມໄວໜຸ່ມ ແລະ ໄວເຮັດວຽກທີ່ນິຍົມກິນຊານົມໄຂ່ມຸກຕາມໆກັນຈາກລົດຊາດ ແລະ ກະແສນິຍົມ, ແຕ່ບາງກຸ່ມອາດບໍ່ນິ ຍົມຍ້ອນຮູ້ສຶກວ່າບໍ່ດີຕໍ່ສຸຂະພາບ.

    3. ຄວາມເຊື່ອ : ບາງຄົນສ້າງຄວາມເຊື່ອຜິດໆຂຶ້ນມາເພື່ອເອົາໃຈຮ່າງກາຍ ເຊັ່ນ : ເມື່ອຮູ້ສຶກເຄັ່ງຄຽດ ຫລື ອິດເມື່ອຍ ມັກຈະດື່ມນຳ້ຫວານ ຫລື ເຄື່ອງດື່ມທີ່ມີນຳ້ຕານໃນປະລິມານຫລາຍ ແລະ ເຊື່ອວ່າຊ່ວຍໃຫ້ຮ່າງກາຍຮູ້ສຶກສົດຊື່ນ, ຜ່ອນຄາຍ, ສະໝອງປອດໂປ່ງ ຫລື ເລືອກສູບຢາຍ້ອນຄິດວ່າຊ່ວຍໃຫ້ຄາຍຄຽດໄດ້ທັນໃຈ.

     4. ສິ່ງກະຕຸ້ນອ້ອມໂຕ : ບາງຄົນຕື່ນເຕັ້ນກັບໂປຣໂມຊັ່ນທາງການຕະຫລາດຕ່າງໆ ເຊັ່ນ : ໂປຣໂມຊັ່ນຫລຸດລາຄາອາຫານບຸບເຟ້ ເຮັດໃຫ້ອົດໃຈບໍ່ໄຫວຕ້ອງກິນຕະຫລອດ ຫລື ຕິດການເບິ່ງຮູບເງົາເລື່ອງຍາວຈົນເດິກດື່ນ, ຢູ່ທ່າມກາງກຸ່ມໝູ່ທີ່ດື່ມອານກໍຮໍ ຫລື ການຢູ່ໃນເທດສະການສະເຫລີມສະຫລອງຕ່າງໆກໍມີຄວາມສ່ຽງທີ່ຈະເກີດພຶດຕິກຳທີ່ບໍ່ເໝາະສົມທີ່ທຳຮ້າຍສຸຂະພາບໄດ້ ງ່າຍ ເຊັ່ນ : ດື່ມອານກໍຮໍເປັນປະຈຳ, ນອນໜ້ອຍ, ມັກກິນແຕ່ອາຫານປີ້ງຈີ່, ອາຫານຈືນ, ອາຫານມັນໆ…

     5. ການໃຊ້ຊີວິດທີ່ຟ້າວຟັ່ງ : ດ້ວຍຄວາມຟ້າວຟັ່ງໃນຊີວິດປະຈຳວັນ ອາດເຮັດໃຫ້ລຶ້ງເຄີຍກັບການເຮັດຫຍັງງ່າຍໆ, ສະດວກວ່ອງໄວ ເຊັ່ນ : ການກິນອາຫານຈານດ່ວນທີ່ມີຄຸນຄ່າທາງໂພຊະນາການໜ້ອຍກ່ວາອາຫານປົກກະຕິທົ່ວໄປ ຫລື ລືມແບ່ງເວລາສຳລັບການອອກກຳລັງກາຍ.

     6.​ ອາລົມ : ອາລົມທາງລົບຕ່າງໆ ເຊັ່ນ : ຄວາມຢ້ານ, ຄວາມອາຍ, ຄວາມໂສກເສົ້າ, ຄວາມໃຈຮ້າຍ, ຄວາມລັງກຽດ, ຄວາມຮູ້ສຶກຜິດ ເປັນຕົ້ນ ມັກສົ່ງຜົນຕໍ່ພຶດຕິກຳທີ່, ເຮັດຂຶ້ນເພື່ອຫລີກໜີ, ເກັບກົດ ຫລື ຂັດຂວາງອາລົມເຫລົ່ານັ້ນບໍ່ໃຫ້ມີຫລາຍຂຶ້ນ ຫລື ສະແດງອອກມາ. ສ່ວນອາລົມທາງບວກນັ້ນມັກກ່ຽວຂ້ອງກັບການຫລັ່ງຂອງສານສື່ປະສາດໂດປາມີນໃນສະໝອງທີ່ເຮັດໃຫ້ເກີດພະລັງງານ ແລະ ສົ່ງຜົນໃຫ້ມີຄວາມສຸກຫລາຍຂຶ້ນ ຄືການໄດ້ຮັບລາງວັນ. ດັ່ງນັ້ນ, ບາງເທື່ອການເຮັດພຶດຕິກຳບາງຢ່າງແລ້ວ ເກີດຄວາມເພິງພໍໃຈ ແລະ ມີຄວາມສຸກ ຈຶ່ງເຮັດໃຫ້ຮ່າງກາຍເພິງພໍໃຈ ແລະ ມີຄວາມສຸກ ຈຶ່ງເຮັດພຶດຕິກຳເຫລົ່ານັ້ນຊຳ້ໆຢ່າງຕໍ່ເນື່ອງ ຈົນບາງເທື່ອກາຍເປັນການເສບຕິດການກະທຳໄປເລີຍ.

     ລອງຫັນມາສຳຫລວດພຶດຕິກຳທີ່ລຶ້ງເຄີຍຂອງຕົນເອງວ່າມີພຶດຕິກຳທີ່ສ່ຽງຢູ່ຫລືບໍ່, ຫາສາເຫດ ແລະ ຢຸດການກະທຳເຫລົ່ານັ້ນເພື່ອສຸຂະພາບ ແລະ ການໃຊ້ຊີວິດທີ່ຂຶ້ນ.