ຜູ້ໄດ້ຮັບຜົນກະທົບຈາກໂຄງການທາງດ່ວນບຶງທາດຫລວງ-ດົງໝາກຄາຍຈະໄດ້ຮັບຊົດ​ເຊີຍໃນໄວໆນີ້

ປະຊາຊົນຜູ້ທີ່ມີສິ່ງປູກສ້າງ ແລະ ເນື້ອທີ່ດິນທີ່ນອນໃນເຂດໂຄງການກໍ່ສ້າງເສັ້ນທາງດ່ວນເລກ 1 ແຕ່ເຂດເສດຖະກິດສະເພາະບຶງທາດຫລວງເມືອງໄຊເສດຖາ-ບ້ານດົງໝາກຄາຍເມືອງໄຊທານີມີຄວາມຍາວກວ່າ 15 ກິໂລແມັດ, ຈະໄດ້ຮັບການຊົດເຊີຍທັງໝົດໃນກາງປີນີ້. ພາຍຫລັງບໍລິສັດຜູ້ລົງທຶນ​ສຳ​ປະທານ ແລະ ຄະນະກໍາມະການໄກ່ເກ່ຍ ໄດ້ຕົກລົງເຫັນດີເປັນເອກະພາບກັນທາງດ້ານຫົວໜ່ວຍລາຄາຄ່າຊົດເຊີຍໃນໂຄງການດັ່ງກ່າວແລ້ວ.

  ທ່ານ ພຶດສະພາ ພູມມະສັກ ຜູ້ອໍານວຍການບໍລິສັດທາງດ່ວນດັ່ງກ່າວ ໃຫ້ຮູ້ໃນພິທີລົງນາມສໍາປະທານກໍ່ສ້າງທາງດ່ວນສາຍນີ້ວ່າ: ຜ່ານການສໍາຫລວດຕົວຈິງເຫັນວ່າມີ 689 ຕອນດິນ ແລະ ເຮືອນ 159 ຫລັງໃນຂອບເຂດເມືອງໄຊເສດຖາ ແລະ ເມືອງໄຊທານີ ຖືກກະທົບຈາກໂຄງການ ແລະ ມີມູນຄ່າການຊົດເຊີຍທັງໝົດ 452 ຕື້ກວ່າກີບ ແລະ ຫລັງຈາກນີ້, ບໍລິສັດຈະຮ່ວມກັບຄະນະໄກ່ເກ່ຍຈະສ້າງຕັ້ງສູນບໍລິການໃຫ້ປະຊາຊົນມາພົວພັນເອົາຄ່າຊົດເຊີຍໄດ້ທັນທີ, ໂດຍຈະໂອນເຂົ້າບັນຊີຂອງຜູ້​ໄດ້​ຮັບ​ຊົດ​ເຊີຍໂດຍກົງ, ເຊິ່ງຄາດວ່າຈະໃຫ້ສໍາເລັດໃນເດືອນມິຖຸນານີ້.

  ທ່ານ ພຶດສະພາ ໃຫ້ຮູ້ວ່າ: ໂຄງການກໍ່ສ້າງທາງດ່ວນສາຍນີ້, ເປັນໂຄງການລົງທຶນຂອງພາກເອກະຊົນໃນຮູບແບບ BOT, ໄດ້ອອກແບບຕາມມາດຕະຖານ ອາຊຽນປະເພດ 1, ມີຄວາມຍາວ 15,30 ກິໂລແມັດ, ໜ້າທາງກວ້າງ 23 ແມັດ. ໃນນີ້ຈະສ້າງຂົວລອຍຍາວ 3,95 ກິໂລແມັດ, ມີໄຟເຍືອງທາງ ແລະ ປ້າຍຈະລາຈອນຕ່າງໆຄົບຊຸດ, ພ້ອມທັງມີດ່ານເກັບເງິນ 2 ຈຸດຄື: ຈຸດທີ 1 ຢູ່ບໍລິເວນທາງເຂົ້າ-ອອກເຂດເສດຖະກິດສະເພາະບຶງທາດຫລວງ, ຈຸດທີ 2 ຢູ່ບໍລິເວນບ້ານຮ່ອງສຸພາບກ່ອນຮອດເສັ້ນທາງ 450 ປີ ແລະ ສະຖານີລົດໄຟ. ນອກນີ້, ກໍມີທາງຂຶ້ນລົງຫລາຍຈຸດຄື: ບຶງທາດຫລວງ, ຕະຫລາດຫົວຂົວ, ເມືອງດອກຈໍາປາ (ບ້ານໂພນພະເນົາອອກສູ່ຖະໜົນໄກສອນພົມວິຫານ), ຕະຫລາດອານຈີ (ບ້ານໜອງໜ່ຽງ), ຖະໜົນ 450 ປີ (ບ້ານໂຊກໃຫຍ່ ແລະ ນາແຄ), ບ້ານໄຊ (ເຊື່ອມຕໍ່ເຂົ້າຫາສະຖານີລົດໄຟຄວາມໄວສູງ), ຖະໜົນ 13 ໃຕ້ (ບ້ານໄຊສະຫວ່າງ) ແລະ ບ້ານດົງໝາກຄາຍ. ລວມມີມູນຄ່າກໍ່ສ້າງທັງໝົດ200 ລ້ານໂດລາສະຫະລັດ, ໂດຍມີໄລຍະສໍາປະທານ 50 ປີ ແລະ ສາມາດຕໍ່ໄດ້ຕື່ມອີກ 20 ປີ, ຊຶ່ງຄາດວ່າຈະໃຫ້ສໍາເລັດການກໍ່ສ້າງໃນປີ 2021 ເພື່ອຊ່ວຍແກ້ໄຂສະພາບການຈະລາຈອນແອອັດຢູ່ຖະໜົນໄກສອນພົມວິຫານ, ຖະໜົນກໍາແພງເມືອງ ແລະ ເສັ້ນທາງສໍາຄັນໃນຕົວເມືອງ​ໃຫ້ຫລຸດລົງກວ່າ 40%, ພ້ອມນີ້ກໍຍັງສາມາດສ້າງວຽກເຮັດງານທໍາໃຫ້ປະຊາຊົນເປັນຈໍານວນຫລາຍຕໍາແໜ່ງງານ ເພື່ອຄຸ້ມຄອງລະບົບບໍລິການພາຫະນະຂຶ້ນ-ລົງໃນເສັ້ນທາງດັ່ງກ່າວອີກດ້ວຍ.