ຜົນຜະລິດອາຫານ ສປປ ເກົາຫລີ ຕໍ່າທີ່ສຸດໃນຮອບຫລາຍກວ່າ 10 ປີ
ສະຫະປະຊາຊາດຖະແຫລງໃນວັນທີ 6 ມີນາວ່າ: ຜົນຜະລິດກະສິກຳຂອງ ສປປ ເກົາຫລີ ຫລຸດລົງຫລາຍທີ່ສຸດໃນຮອບຫລາຍກວ່າ 10 ປີໃນປີຜ່ານມາ, ຂະນະທີ່ໄພທຳມະຊາດ, ເນື້ອທີ່ປູກຝັງຫລຸດລົງ ແລະ ການຜະລິດກະສິກຳບໍ່ມີປະສິດທິຜົນ ສົ່ງຜົນຕໍ່ປະລິມານການຜະລິດ.
UN ລາຍງານຕີລາຄາດ້ານຜົນຜະລິດປີ 2019 ວ່າ: ຜົນຜະລິດໃນປີຜ່ານມາມີພຽງ 4,95 ລ້ານໂຕນ ຫລຸດລົງ 500.000 ໂຕນ ຖືເປັນຕົວເລກຜົນຜະລິດຕໍ່າທີ່ສດເປັນປະຫວັດສາດໃນຮອບຫລາຍກວ່າ 10 ປີ ເຊິ່ງຈະສົ່ງຜົນຕໍ່ການຂາດເຂີນອາຫານ. ຂະນະທີ່ ສປປ ເກົາຫລີ ຜະເຊີນມາດຕະການຂວ້ຳບາດຫລາຍດ້ານຈາກໂຄງການນິວເຄຼຍ ແລະ ລູກສອນໄຟ ເຮັດໃຫ້ປະສົບບັນຫາຂາດເຂີນອາຫານມາດົນ, ບັນຫາຂາດເຂີນອາຫານຈະຍິ່ງເຮັດໃຫ້ເກີດສະພາບຂາດໂພຊະນາການ ແລະ ເຈັບເປັນຢູ່ ສປປ ເກົາຫລີ ເພີ່ມຂຶ້ນໃນປະຊາກອນ 10,9 ລ້ານຄົນ ທີ່ຈຳເປັນຕ້ອງໄດ້ຮັບການຊ່ວຍເຫລືອດ້ານມະນຸດສະທຳຮີບດ່ວນ ເຊິ່ງຄິດເປັນ 43% ຂອງປະຊາກອນທັງໝົດ. ສປປ ເກົາຫລີ ບໍ່ມີເຕັກໂນໂລຊີທາງກະສິກຳທີ່ທັນສະໄໝ ແລະ ປຸ໋ຍສຳລັບຜົຜະລິດພຽງພໍ. ນອກຈາກນີ້ ເນື້ອທີ່ສ່ວນຫລາຍຂອງປະເທດຍັງເປັນພູ ເຊິ່ງມີພຽງ 20% ຂອງເນື້ອທີ່ທັງໝົດທີ່ເໝາະສົມຈະປູກຝັງໄດ້.
