U16 ຍິງທີມຊາດລາວ ຊະນະ ອີຣານ ມີລຸ້ນເຂົ້າຮອບໃນນັດສຸດທ້າຍ
ໃນວັນທີ 5 ມີນຜ່ານມາ, ທັບນັກກິລາບານເຕະຍິງທີມຊາດລາວ ຮຸ່ນອາຍຸບໍ່ເກີນ 16 ປີ ສາມາດຄວ້າໄຊຊະນະເໜືອ U16 ຍິງທີມຊາດອີຣານ 2-0 ການແຂ່ງຂັນບານເຕະຍິງ ຮຸ່ນອາຍຸບໍ່ເກີນ 16 ປີ ຊີງແຊ້ມອາຊີ 2019 ຮອບຄັດເລືອກ ກຸ່ມ A ນັດທີ 2 ທີ່ລາວເຮົາໄດ້ຮັບກຽດເປັນເຈົ້າພາບ ໃນວັນທີ 3-7 ມີນານີ້ ທີ່ສະໜາມກິລາແຫ່ງຊາດ ຫລັກ 16.
ສາວລາວ U16 ປີ ສູ້ກັບ ອີຣານ ໄດ້ຢ່າງໃກ້ຄຽງສູສີ ແລະ ມາປະສົບຜົນສຳເລັດໄດ້ສອງປະຕູຈາກ ພິມພາ ທອງສະຫວ່າງ ນາທີ 44 ແລະ ໃຈຄຳ ນາທີ 67 ຊ່ວຍ U16 ຍິງທີມຊາດລາວເກັບ 3 ຄະແນນສຳຄັນ ຍັງມີລຸ້ນເຂົ້າຮອບໃນນັດສຸດທ້າຍ. ຂະນະທີ່ ຜົນອີກໜຶ່ງຄູ່ໃນກຸ່ມດຽວກັນ U16 ຍິງອົດສະຕຣາລີ ຊະນະ U16 ຍິງຫວຽດນາມ ຫວຸດຫວິດ 1-0 ໄດ້ປະຕູໄຊນາທີ 88.
ກຸ່ມນີ້ຜ່ານໄປ 2 ນັດ: ອົດສະຕຣາລີ ເປັນທີ 1 ຂອງກຸ່ມ ຊະນະ 2 ນັດລວດມີ 6 ຄະແນນ, ທີ 2 ລາວເຮົາມີ 3 ຄະແນນ ເທົ່າກັບ ຫວຽດນາມ ແຕ່ປະຕູໄດ້ເສຍລາວເຮົາດີກວ່າ ຍິງໄດ້ 2 ເສຍ 1, ຫວຽດນາມ ຍິງໄດ້ 1 ເສຍ 1. ສ່ວນອີຣານ ເສຍທັງສອງນັດບໍ່ມີຄະແນນ ປະຕູໄດ້ເສຍ -5. ແຕ່ການແຂ່ງຂັນຄັ້ງນີ້ ຖ້າຄະແນນເທົ່າກັນຈະຕັດສິນທີ່ສະຖິຕິການພົບກັນ ຫລື Head to Head ຮອງລົງມາແມ່ນປະຕູໄດ້ເສຍ.
ນັດທີ 3 ຫລື ນັດສຸດທ້າຍຂອງກຸ່ມ ຈະແຂ່ງຂັນໃນວັນທີ 7 ມີນານີ້ ລາວ ພົບ ອົດສະຕຣາລີ ລາວຕ້ອງການຊະນະເພື່ອເຂົ້າຮອບ ອົດສະຕຣາລີຕ້ອງການພຽງສະເໝີພຽງພໍ ຈະແຂ່ງຂັນເປັນຄູ່ທີ 2 ເວລາ 18:30, ຄູ່ທີ 1 ຫວຽດນາມ ພົບ ອີຣານ ຈະແຂ່ງຂັນເວລາ 15:00 ໂມງ ຫວຽດນາມກໍຕ້ອງການຊະນະ ຖ້າ ລາວ ແລະ ຫວຽດນາມ ຊະນະ ໝາຍວ່າ ລາວ, ຫວຽດນາມ ແລະ ອົດສະຕຣາລີ ມີ 6 ຄະແນນເທົ່າກັນ ທັງສາມທີມຈະມາວັດກັນເລື່ອງສະຖິຕິການພົບກັນ ແລະ ປະຕູໄດ້ເສຍ ເພື່ອຄັດເອົາສອງທີມເຂົ້າຮອບ ແຕ່ຖ້າຍັງສະຖິຕິເທົ່າກັນ ລວມທັງປະຕູໄດ້ເສຍ ຕ້ອງຈັບສະຫລາກເພື່ອຫາທີມເຂົ້າຮອບ.
