ຍີ່ປຸ່ນໃຫ້ການຊ່ວຍເຫລືອລ້າແກ່ການຟື້ນຟູຈາກໄພພິບັດນ້ຳຖ້ວມ

ພິທີເຊັນສັນຍາແລກປ່ຽນໂຄງການຊ່ວຍເຫລືອລ້າແກ່ການຟື້ນຟູໄພພິບັດນໍ້າຖ້ວມໃນປີຜ່ານມາ, ໄດ້ມີຂຶ້ນໃນວັນທີ 6 ມີນານີ້ ຢູ່ຫ້ອງການສະຫະປະຊາຊາດທີ່ນະຄອນຫລວງວຽງຈັນ ລະຫວ່າງທ່ານທາຄາຊິ ຮິຄິຮາຣະ ເອກະອັກຄະຣາຊະທູດຍີ່ປຸ່ນປະຈໍາ ສປປ ລາວ ແລະ ຜູ້ຕາງຫນ້າຈາກອົງການສະຫະປະຊາຊາດ ແລະ ຕົວແທນຈາກກະຊວງທີ່ກ່ຽວຂ້ອງເຂົ້າຮ່ວມເປັນສັກຂີພິຍານນໍາດ້ວຍ.

ໃນໂອກາດນີ້ ທ່ານ ທາຄາຊິ ຮິຄິຮາຣະ ເອກະອັກຄະ ຣາຊະທູດຍີ່ປຸ່ນປະຈໍາ ສປປ ລາວ ໄດ້ມີຄໍາເຫັນວ່າ: ໂຄງການຊ່ວຍເຫລືອມີມູນຄ່າ 7,6 ລ້ານໂດລາສະຫະລັດ ໂດຍແບ່ງອອກເປັນ 4 ໂຄງການຄື:1) ໂຄງການດ້ານການສຶກສາໂດຍອົງການ UNICEF ເພື່ອສົ່ງເສີມການລົງທະບຽນຮຽນ, ການເຂົ້າຮຽນຢ່າງສະຫມໍ່າສະເຫມີ ແລະ ການຮຽນຮູ້ຢ່າງມີປະສິດທິພາບ ແລະ ສ້າງຄວາມອາດສາມາດຂອງລະບົບການສຶກສາທັງໃນລະດັບຊາດ ແລະ ທ້ອງຖິ່ນ ເຮັດໃຫ້ພວກເຂົາມີຄວາມອົດທົນ ແລະ ເສີມສ້າງທັກສະເພື່ອຫຼຸດຜ່ອນຄວາມສ່ຽງຈາກໄພພິບັດ. 2)ໂຄງການ WASH ໂດຍອົງການ UNICEF ຊ່ວຍໃຫ້ປະຊາຊົນ ແລະ ບັນດານ້ອງນ້ອຍນັກຮຽນເຂົ້າເຖິງສິ່ງອໍານວຍຄວາມສະດວກທາງສຸຂະອະນາໄມ, ວິທິທາງໃນການຮັກສາສຸຂະອະນາໄມ ຢູ່ເມືອງຕ່າງໆຂອງແຂວງອັດຕະປືແລະຊຽງຂວາງ.3) ໂຄງການຈາກອົງການ UNHABITAL ຊ່ວຍລົງເຮັດວຽກກັບຂົງເຂດທີ່ໄດ້ຮັບຜົນກະທົບຈາກສັນເຂືອນເຊປຽນ-ເຊນໍ້ານ້ອຍແຕກ, ຊ່ວຍຖ່າຍທອດຄວາມຮູ້ດ້ານເຕັກນິກໃນການກໍ່ສ້າງສະຖານທີ່ຫລົບໄພ,ສະຫນັບສະຫນູນອຸປະກອນທີ່ເຫມາະສົມ ແລະ ເຮືອນພັກອາໄສໃຫ້ປະຊາຊົນຜູ້ໄດ້ຮັບຜົນກະທົບ. 4)ໂຄງການຂອງອົງການ FAO ຊ່ວຍຟື້ນຟູການຜະລິດກະສິກໍາ ແລະ ການດໍາລົງຊີວິດຂອງປະຊາຊົນຢູ່ແຂວງຄໍາມ່ວນ ແລະແຂວງສະຫວັນນະເຂດ ປັບປຸງອາຫານ, ໂພຊະນາການ ແລະການຟື້ນຟູຈາກໄພພິບັດທໍາມະຊາດເຮັດໃຫ້ເຂົາເຈົ້າມີຄວາມເຂັ້ມແຂງ, ມີຄວາມສາມາດໃນການຫລີກຄວາມສ່ຽງຈາກໄພພິບັດ ແລະ ສາມາດຜ່ານພົ້ນວິກິດຕ່າງໆ. ເຊິ່ງໂຄງການຊ່ວຍເຫລືອທັງຫມົດນີ້ແມ່ນຈະໄ ດ ້ ມ ອ ບ ໃ ຫ ້ ອ ົ ງ ກ າ ນ UNICEF ປະຈໍາລາວ ເປັນຜູ້ດູແລເບິ່ງແຍງ ແລະ ລົງປະຕິບັດຕົວຈິງເພື່ອເຮັດໃຫ້ເກີດປະໂຫຍດສູງສຸດຕໍ່ປະຊາຊົນຜູ້ໄດ້ຮັບໄພພິບັດ, ເຖິງວ່າມັນຈະບໍ່ຫລວງຫລາຍ ແຕ່ກໍເປັນສິ່ງສະແດງໃຫ້ເຫັນເຖິງນໍ້າໃຈ,ຄວາມເປັນຫ່ວງເປັນໃຍ່ຈາກລັດຖະບານ ແລະ ປະຊາຊົນຍີ່ປຸ່ນທີ່ປະກອບສ່ວນເຂົ້າໃນການຟື້ນຟູຈາກຜົນກະທົບທີ່ພີ່ນ້ອງຊາວລາວໄດ້ປະສົບໃນຜ່ານມາໃຫ້ຜ່ານພົ້ນວິກິດນີ້ໄປໄດ້ໂດຍໄວ.