ລູກສະຫລາດສົມອາຍຸເລີ່ມຈາກອາຫານການກິນ

   ວິທີລ້ຽງລູກໃຫ້ເປັນເດັກນ້ອຍສະຫລາດ ພໍ່ແມ່ສ້າງໄດ້ ເຊິ່ງ ພໍ່ແມ່ທຸກຄົນຢາກໃຫ້ລູກສະຫລາດໄດ້ຍິນວ່າກິນຫຍັງແລ້ວສະໝອງດີ  ບໍ່ວ່າຈະແພງປານໃດ ພໍ່ແມ່ກໍຈະສັນຫາມາໃຫ້ກິນ, ອາຫານບຳລຸງສະໝອງບໍ່ໄດ້ເປັນອາຫານທີ່ຕ້ອງເສຍເງິນຫລວງຫລາຍ, ແຕ່ເປັນອາຫານທີ່ເຮົາທຸກຄົນຄວນກິນເພື່ອສຸຂະພາບທີ່ດີ.

     – ນົມແມ່ເພີ່ມໄອຄິວ :ນົມແມ່ແມ່ນຍອດອາຫານສຳລັບລູກ ເຮັດໃຫ້ລູກເຕີບໃຫຍ່ແຂງແຮງ, ປອດໄພຈາກພະຍາດຕິດເຊື້ອ, ປອດໄພຈາກພະຍາດພູມແພ້, ຫ່າງໄກພະຍາດຊຳ້ເຮື້ອ ແລະ ມີໄອຄິວສູງກ່ວາເດັກທີ່ບໍ່ເຄີຍໄດ້ກິນນົມແມ່ 3,5 ຈຸດ, ແຕ່ຕ້ອງກິນອາຫານທີ່ມີຄຸນນະພາບເພີ່ມຈາກປົກກະຕິເພື່ອສ້າງນຳ້ນົມ ແລະ ຄວນກິນຢາເມັດເພື່ອປ້ອງກັນລູກຈາກການຂາດທາດໄອໂອດີນກັບແຮ່ທາດເຫລັກຕະຫລອດ 6 ເດືອນທຳອິດທີ່ໃຫ້ລູກກິນນົມ.

     – ຄົບ 5ໝວດ : ໃຫ້ກິນອາຫານຄົບ 5 ໝວດ ແຕ່ລະໝວດໃຫ້ຫລາກຫລາຍເປັນປະຈຳທຸກມື້  ເພື່ອໃຫ້ໄດ້ສານອາຫານຄົບຖ້ວນ.

     – ບໍ່ຂາດໄອໂອດີນ :ຫາກຂາດໄອໂອດີນຢ່າງຮຸນແຮງເປັນເວລາດົນ ໄອຄິວຫລຸດໄດ້ເຖິງ 13,5 ຈຸດ ໃຊ້ເກືອເສີມໄອໂອດີນ, ນຳ້ປາ ຫລື ນຳ້ຊ໊ອດປຸງແຕ່ງລົດຊາດເສີມໄອໂອດີນ ເມື່ອຕ້ອງການປຸງແຕ່ງລົດຊາດເຄັມ ເຊິ່ງໄດ້ເສີມໄອໂອດີນໄວ້ພໍດີກັບຂະໜາດທົ່ວໄປທີ່ຄວນກິນ. ແນວໃດກໍຕາມ ບໍ່ແນະນຳໃຫ້ປຸງແຕ່ງລົດຊາດອາຫານຕາມໄວສຳລັບເດັກນ້ອຍ ແລະ ບໍ່ປຸງແຕ່ງລົດຊາດເຄັມໆເຜັດໆສຳລັບເດັກ.

     – ທາດເຫລັກຄົບ : ອາການເຫລືອງຈືດຈາກການຂາດທາດເຫລັກໃນເດັກເຮັດໃຫ້ໄອຄິວໃນໄວຮຽນຕໍ່າລົງ 5 – 10 ຈຸດ ການ ຂາດທາດເຫລັກຍັງເຮັດໃຫ້ເຕີບໃຫຍ່ຊ້າ, ພູມຕ້ານທານບົກພ່ອງ, ເຫລືອງ, ຈືດ, ອ່ອນເພຍ, ເຊື່ອງຊ້າ, ສະມາທິສັ້ນ ແລະຄວາມສາມາດໃນການຮຽນຕໍ່າລົງ, ທາດເຫລັກມີຫລາຍໃນເລືອດສັດ, ຕັບ, ຊີ້ນສັດ, ໄຂ່ແດງ, ຜັກໃບຂຽວ, ເດັກນ້ອຍຄວນຈະໄດ້ຮັບຢານຳ້ທາດເຫລັກເສີມອາທິດລະເທື່ອ.

     – ເຂົ້າຄາບເຊົ້າສຳຄັນຕໍ່ສະໝອງ : ເດັກນ້ອຍທີ່ບໍ່ກິນເຂົ້າເຊົ້າຈະບໍ່ມີແຮງ, ເລື່ອງຄິດຄຳນວນ ແລະ ຄວາມຈື່ຈຳສັ້ນ, ຄວາມສາມາດໃນການອ່ານ ແລະ ຄວາມສາມາດໃນການແກ້ໄຂບັນຫາຈະສູ້ເດັກນ້ອຍທີ່ກິນເຂົ້າເຊົ້າຢ່າງຖືກຫລັກໂພຊະນາການບໍ່ໄດ້ ພໍ່ແມ່ຈຶ່ງບໍ່ຄວນເບິ່ງຂ້າມ ບໍ່ຄວນພາລູກໄປສົ່ງສູນລ້ຽງເດັກ ຫລື ໂຮງຮຽນອະນຸບານໂດຍທີ່ລູກຍັງບໍ່ໄດ້ກິນເຂົ້າເຊົ້າ ແລະ ຢ່າຫວັງໄປເພີ່ງອາຫານຕາມຮ້ານໜ້າໂຮງຮຽນທີ່ມີຄຸນຄ່າສານອາຫານບໍ່ຄົບຖ້ວນ ແລະ ອາດຈະບໍ່ສະອາດນຳອີກ.

     – ເດັກຈະສະຫລາດຫລາຍຫລື ໜ້ອຍຂຶ້ນກັບ :

      1. ກຳມະພັນ.

     2. ສຸຂະພາບແຂງແຮງ ແລະ ບໍ່ເຈັບປ່ວຍ.

     3. ໄດ້ຮັບສານອາຫານພຽງພໍ ຄົບຖ້ວນຕາມອາຍຸ.

     4. ອອກກຳລັງກາຍສະໝໍ່າສະເໝີ.

     5. ພັກຜ່ອນນອນຫລັບໃຫ້ພຽງພໍ.

     6. ໃຫ້ຄວາມຮັກ ຄວາມເອົາໃຈໃສ່ໃນການກະຕຸ້ນພັດທະນາການ ແລະ ການຮຽນຮູ້ຂອງລູກຕາມອາຍຸຢ່າງຮອບດ້ານ.

     – ລ້ຽງລູກໃຫ້ເຕີບໃຫຍ່ສົມອາຍຸ, ຮູບຮ່າງດີ, ບໍ່ຕຸ້ຍ, ບໍ່ຈ່ອຍ ແລະ ບໍ່ເຕ້ຍ : ໃຫ້ລູກກິນອາຫານ ແລະ ອອກກຳລັງກາຍຕາມອາຍຸ ໂດຍພະຍາຍາມໃຫ້ມີນຳ້ໜັກ ແລະ ລວງສູງເພີ່ມຂຶ້ນຕາມເກນມາດຕະຖານ ໂດຍເບິ່ງຈາກຮູບການເຕີບໃຫຍ່ຂອງນຳ້ໜັກ, ຄວາມສູງ ຫລື ຄວາມຍາວ ແລະ ເສັ້ນຮອບຫົວ ໂດຍສາມາດເບິ່ງໄດ້ຈາກປຶ້ມບັນທຶກສຸຂະພາບແມ່ ແລະ ເດັກ ປະຈຳໂຕຂອງລູກໄດ້.