ປາກິດສະຖານ-ອິນເດຍຟື້ນຟູ ການຄ້ານຳກັນແລ້ວ
ລົດບັນທຸກຂອງປາກິດສະຖານ ແລະ ອິນເດຍຂົນສົ່ງສິນຄ້າຂ້າມຊາຍແດນນຳກັນແລ້ວ ໃນວັນທີ 6 ມີນານີ້ ຕາມເວລາທ້ອງຖິ່ນ ທ່າມກາງຄວາມຫວັງສັນຕິພາບ ພາຍຫລັງຄວາມເຄັ່ງຕຶງລະຫວ່າງສອງປະເທດເລີ່ມຫລຸດລົງ.
ອິນເດຍ ແລະ ປາກິດສະຖານ ຮື້ຟື້ນການຄ້າຂ້າຍຊາຍແດນຮ່ວມກັນ ຢູ່ແຄວ້ນກາສເມຍ ໃນວັນທີ 6 ມີນາ ເນື່ອງຈາກເປີດເສັ້ນທາງໃຫ້ແລ່ນລົດໄດ້ອີກຄັ້ງ ພາຍຫລັງການຍິງຕອບໂຕ້ຂ້າມຊາຍແດນຫລຸດຜ່ອນລົງ. ລົດບັນທຸກ 35 ຄັນເດີນທາງອອກຈາກບ້ານຊາໂຄທີ ທາງຊາຍແດນເບື້ອງປາກິດສະຖານ ໂດຍມີລົດບັນທຸກຈຳນວນເທົ່າກັນຈາກເບື້ອງກົງກັນຂ້າມແລ່ນເຂົ້າມາ. ສະຖານະການຂອງສອງປະເທດໃກ້ຄຽງເລີ່ມດີຂຶ້ນ ພາຍຫລັງຂັດແຍ່ງກັນໃນເດືອນຜ່ານມາ ເພາະກຸ່ມຕິດອາວຸດທີ່ລີ້ຊ້ອນຢູ່ປາກິດສະຖານກໍ່ເຫດໂຈມຕີແຄວ້ນກາສເມຍບ່ອນທີ່ຢູ່ໃນການປົກຄອງຂອງອິນເດຍ ເຮັດໃຫ້ເຈົ້າໜ້າທີ່ອິນເດຍເສຍຊີວິດ 40 ຄົນໃນວັນທີ 14 ກຸມພາ ແລະ ອິນເດຍຕອບໂຕ້ໂດຍການໂຈມຕີທາງອາກາດຢູ່ປາກິດສະຖານ. ສຳລັບບັນຍາກາດການຄ້າຕາມຊາຍແດນດີຂຶ້ນ ໂດຍອິນເດຍສົ່ງອອກຍີ່ຫຣ່າ, ໝາກເຜັດ, ເສື້ອຜ້າ, ໝາກກ້ວຍ, ໝາກລະແຊ້ງ ແລະ ອາວມອນ, ສ່ວນປາກິດສະຖານສົ່ງອອກພົມ, ເສື້ອຜ້າ, ໝາກກ້ຽງ, ໝາກມ່ວງ ແລະ ສະໝຸນໄພ.
