ລາວ ຮ່ວມກັບສະຫະພາບເອີຣົບຈັດສຳມະນາກ່ຽວກັບສິດທິເສລີພາບໃນການສະແດງຄຳຄິດເຫັນ ແລະສິ່ງທ້າທາຍຈາກຂ່າວປອມ

ກອງປະຊຸມສຳມະນາກ່ຽວກັບສິດທິເສລີພາບໃນການສະແດງຄຳຄິດຄຳເຫັນ ແລະສິ່ງທ້າທາຍຈາກຂ່າວປອມ ໄດ້ຈັດຂຶ້ນໃນວັນທີ 6 ມີນານີ້ ຢູ່ທີ່ນະະຄອນຫລວງວຽງຈັນ ໂດຍການເຂົ້າຮ່ວມຂອງທ່ານ ສະຫວັນຄອນ ຣາດຊະມົນຕີ ຮອງລັດຖະມົນຕີກະຊວງຖະແຫລງຂ່າວ ວັດທະນະທຳ ແລະທ່ອງທ່ຽວ ພ້ອມດ້ວຍຜູ້ຕາງໜ້າອົງການຈັດຕັ້ງສາກົນປະຈຳລາວເຂົ້າຮ່ວມຟັງນຳ

    ກອງປະຊຸມສຳມະນາຄັ້ງນີ້ ເພື່ອແນໃສ່ແລກປ່ຽນຄຳຄິດເຫັນຕໍ່ການເພື່ອແກ້ໄຂບັນຫາຂ່າວປອມ ແລະສະເໜີວິທີທາງເລືອກໃນການນຳໃຊ້ຂໍ້ມູນຂ່າວສ   ານເທີ່ຖືກຕ້ອງ ຈາກບັນດາສຳນັກຂ່າວສາກົນເຊັ່ນ: ຝຣັ່ງ, ຜູ້ຕາງໜ້າສູນການສຶກສາດ້່ານສື່ຂໍ້ມູນ ແລະລາຍການຂ່າວຈາກມະຫາວິທະຍາໄລຮົງກົງ, ໂຄງການສື່ໃນອາຊີ ແລະສິງກະໂປ. ນອກນີ້ຍັງມີການກ່າວເຖິງສິດທິການສະແດງຄຳຄິດເຫັນພາຍໃຕ້ລັດຖະທຳມະນູນ -ກົດໝາຍສາກົນ, ພາກພື້ນ ແລະພາຍໃນປະເທດໂດຍວິທະຍາກອນຈາກກົມສົນທິສັນຍາ ແລະກົດໝາຍ ກະຊວງການຕ່າງປະເທດອີກ.

    ໂອກາດດຽວກັນ ທ່ານສະຫວັນຄອນ ຣາດຊະມົນຕີ ໄດ້ມີຄຳເຫັນ ຕໍ່ກອງປະຊຸມວ່າ: ສິດທິເສລີພາບການສະແດງຄຳຄິດຄຳເຫັນ ລວມທັງເສລີພ່າບໃນການຊອກສະແຫວງຫາ, ຮັບເອົາ ແລະ ເຜີຍແຜ່ຂໍ້ມູນຂ່າວສານ ແລະແນວຄວາມຄິດ ຜ່ານຮູບການຕ່າງໆນັ້ນແມ່ນສິດເສລີພາບຂັ້ນພື້ນຖານຂອງມະນຸດ ເຊິ່ງຖືກຄໍ້າປະກັນດ້ວຍສົນທິສັນຍາ, ເອກະສານສາກົນ ແລະພາກພື້ນ ແຕ່ການປະຕິບັດສິດດັ່ງກ່າວຕ້ອງຄຽງຄູ່ກັບພັນທະ, ມີຄວາມຮັບຜິດຊອບ ແລະຢູ່ໃນຂອບເຂດບົນພື້ນຖານຂອງຂໍ້ກົດໝາຍທີ່ກຳນົດໄວ້ ເພື່ອຮັບປະກັນບໍ່ໃຫ້ມີການລະເມີດສິດທິ ແລະ ກຽດສັກສີຂອງຄົນອື່ນ, ພ້ອມເປັນການປົກປັກຮັກສາຄວາມໝັ້ນຄົງຂອງຊາດ, ຄວາມເປັນລະບຽບຮຽບຮ້ອຍຂອງສັງຄົມ, ຄວາມຜາສຸກ ແລະຈັນຍາທຳຂອງສັງຄົມ. ທັງນີ້ກໍເພື່ອຮັບປະກັນເຖິງຄວາມປອດໄພທາງດ້ານລະບົບການເມືອງ, ກົດໝາຍ, ການຂະຫຍາຍຕົວຂອງເສດຖະກິດ, ສັງຄົມ, ວັດທະນະທຳ, ຄວາມເປັນຈິງທາງດ້ານປະຫວັດສາດ. ເຊິ່ງປັດຈຸບັນນີ້ລັດຖະບານໄດ້ມີນະໂຍບາຍໃນການສະແດງຄຳຄິດເຫັນ, ການເຜີຍແຜ່ຂໍ້ມູນຂ່າວສານ ພ້ອມດຽວກັນກໍໄດ້ສ້າງຕັ້ງສູນສະກັດກັ້ນ ເພື່ອແກ້ໄຂເຫດສຸກເສີນທາງຄອມພິວເຕີ ດ້ວຍການເຮັດທຸກວິທີທາງໃນການສະກັດກັ້ນຂ່າວປອມ, ຂໍ້ມູນບິດເບືອນ ໃຫ້ປະຊາຊົນໄດ້ຮັບຂໍ້ມູນ ແລະ ຂ່າວທີ່ໜ້າເຊື່ອຖືເພື່ອສ້າງຄວາມໝັ້ນຄົງຂອງຊາດ, ອຳນວຍຄວາມສະດວກ, ວ່ອງໄວ ແລະທັນນສະໄໝ ຮັບໃຊ້ແກ່ການພັດທະນາເສດຖະກິດ-ສັງຄົມຂອງຊາດ ໃຫ້ມີຄວາມຈະເລີນສີວິໄລຂຶ້ນ.