ຣອນນີ ແທງເຊັນຈູຣີທີ 1.000 ຄວ້າແຊ້ມເພລເຢີສ
ວິນາທີທີ່ “ເດິຣ໊ອກເກັດ” ຮອນນີ ໂອຊຸລລິແວນ ນັກສະນຸກເກີຂວັນໃຈມະຫາຊົນ ເຮັດເຊັນຈູຣີເບຣກໃນເຟຣມທີ 14 ຂອງການແຂ່ງຂັນສະນຸກເກີລາຍການໂຄຣັລ ເພລເຢີສ ແຊມປ້ຽນຊິບ 2019 ຮອບຊີງຊະນະເລີດ ໃນວັນທີ 10 ມີນາຜ່ານມາ ຢູ່ປະເທດອັງກິດ ດ້ວຍການແທງໄມ້ດຽວ 134 ຄະແນນ.
ນອກຈາກຈະເຮັດໃຫ້ລາວ ເອົາຊະນະ ນີລ ໂຣເບີດສັນ ນັກສະນຸກເກີມື 8 ຂອງໂລກຈາກອົດສະຕຣາລີ 10-4 ເຟຣມ ພ້ອມກັບປ້ອງກັນແຊ້ມໄດ້ສຳເລັດແລ້ວ ຍັງເຮັດໃຫ້ນັກສະນຸກເກີຊາວອັງກິດຄົນນີ້ ກາຍເປັນຄົນທຳອິດທີ່ເຮັດເຊັນຈູຣີເບຣກ ຫລື ແທງໄມດ້ດຽວເກີນ 100 ຄະແນນ ຄົບ 1.000 ຄັ້ງນຳອີກ ແລະ ເຊັນຈູຣີເບຣກຄັ້ງທີ 1.000 ຂອງລາວ ໄດ້ເກີດຂຶ້ນໃນເຟຣມປິດທ້າຍການແຂ່ງຂັນລາຍການໂຄຣັລ ເພລເຢີສ ແຊມປ້ຽນຊິບ 2019 ພໍດີ ແລະ ໃນເຟຣມສຸດທ້າຍ ຣອນນີ ໄດ້ກວາດໝົດໂຕະຂອງແທ້ ເນື່ອງຈາກຕອນຕົບດຳລູກສຸດທ້າຍ ຂາວແລ່ນຟາດ 2 ຊິ່ງມາລົງຫລຸມກາງນຳອີກ ຖືວ່າເປັນການປິດສາກຢ່າງງົດງາມແທ້ຈິງ ເພາະບໍ່ເຫລືອລູກເທິງໂຕະ.
ການຄວ້າແຊ້ມເພລເຢີສ ແຊມປ້ຽນຊິບ 2019 ນອກຈາກຈະເຮັດໃຫ້ ຣອນນີ ໄດ້ເງິນລາງວັນ 125.000 ປອນແລ້ວ ຍັງເຮັດໃຫ້ ເດິຣ໊ອກເກັດ ໄວ 43 ປີ ໄດ້ຄະແນນສະສົມອັນດັບໂລກເພີ່ມອີກ 125.000 ຄະແນນ ເລື່ອນຈາກອັນດັບ 3 ຂຶ້ນໄປຢູ່ອັນດັບ 2 ຂອງໂລກແລ້ວ ໂດຍມີຄະແນນຕາມຫລັງ ມາກ ເຊລບີ້ ມື 1 ຂອງໂລກຈາກອັງກິດ 71.725 ຄະແນນ.
ຈາກຜົນສຳເລັດໃນຄັ້ງນີ້ ເຮັດໃຫ້ເວລາປັດຈຸບັນ ຣອນນີ ໂອຊຸລລິແວນ ຄວ້າແຊ້ມລາຍການເກັບຄະແນນສະສົມອັນດັບໂລກ ຫລື ເວິລແຣງກິ້ງ ໄປແລ້ວທັງໝົດ 35 ລາຍການ ຕາມຫລັງ ສະຕີເຟນ ເຮນດີ້ ຕຳນານນັກສະນຸກເກີຊາວສະແດ ເຊິ່ງເປັນຜູ້ທີ່ຄວ້າແຊ້ມເວິລແຣງກິ້ງຫລາຍທີ່ສຸດໃນໂລກ ພຽງ 1 ລາຍການເທົ່ານັ້ນ.
ສຳລັບການແຂ່ງຂັນສະນຸກເກີອາຊີບໂລກໃນລະດູການ 2018-2019 ເຫລືອອີກ 3 ລາຍການ ປະກອບມີ ທົວແຊມປ້ຽນຊິບ 2019 ທີ່ປະເທດເວລ ລະຫວ່າງວັນທີ 19-24 ມີນາ ເຊິ່ງລາຍການນີ້ຖືກຈັດຂຶ້ນເປັນຄັ້ງທຳອິດ, ໄຊນ່າ ໂອເພັນ 2019 ທີ່ປະເທດຈີນ ລະຫວ່າງວັນທີ 1-7 ເມສາ ແລະ ເວິລແຊມປ້ຽນຊິບ ຊິງແຊ້ມໂລກ 2019 ທີ່ປະເທດອັງກິດ ລະຫວ່າງວັນທີ 20 ເມສາ ຫາ 6 ພຶດສະພາ.
ແຕ່ວ່າ ຣອນນີ້ ໄດ້ຖອນຕົວຈາກການແຂ່ງຂັນໄຊນາ ໂອເພັນ 2019 ຈຶ່ງເຮັດໃຫ້ລາວເຫລືອໂປຣແກຣມລົງແຂ່ງຂັນໃນລະດູການນີ້ອີກພຽງ 2 ລາຍການເທົ່ານັ້ນຄື: ທົວແຊມປ້ຽນຊິບ ແລະ ຊີງແຊ້ມໂລກ.
