ອິນໂດເນເຊຍ ຫວັງເປັນປະເທດທຳອິດໃນອາຊຽນ ຄວ້າສິດເປັນເຈົ້າພາບໂອລິມປິກ ປີ 2032
ເມື່ອບໍ່ດົນມານີ້, ປະເທດອິນໂດເນເຊຍ ສະເໜີຕົວຊີງສິດເປັນເຈົ້າພາບຈັດການແຂ່ງຂັນກິລາໂອລິມປິກ ລະດູຮ້ອນ (Summer Olypics) ຄັ້ງທີ 35 ໃນປີ 2032 ຖ້າຫາກຊະນະການຄັດເລືອກ ຈະກາຍເປັນປະເທດທຳອິດໃນອາຊຽນໄດ້ສິດເປັນເຈົ້າພາບລາຍການດັ່ງກ່າວ.
ອິນໂດເນເຊຍ ມີຄວາມມຸ່ງໝັ້ນຈະສ້າງບັນຍາກາດໃໝ່ ແລະ ສີສັນອັນໃໝ່ໃນການເປັນເຈົ້າພາບກິລາໂອລິມປິກ ປີ 2032 ເຊິ່ງຈະເປັນງານກິລາໃຫຍ່ສຸດຂອງປະເທດ ທີ່ໄດ້ຮັບກຽດເປັນເຈົ້າພາບຕໍ່ຈາກເອຊຽນເກມ 2 ຄັ້ງໃນປີ 1962 ແລະ ຄັ້ງຫລ້າສຸດປີ 2018. ຖ້າຫາກວ່າ ອິນໂດເນເຊຍໄດ້ສິດເປັນເຈົ້າພາບ ຈະກາຍເປັນປະເທດທີ 4 ຂອງອາຊີຕໍ່ຈາກຍີ່ປຸ່ນ, ສາທາລະນະລັດເກົາຫລີ ແລະ ສປ ຈີນ ແຕ່ອິນໂດເນເຊຍມີຄູ່ແຂ່ງຫລາຍປະເທດ ເປັນຕົ້ນປະເທດໃນອາຊີນຳກັນເຊັ່ນ: ອິນເດຍ, ສປ ຈີນ, ສອງເກົາຫລີຄື: ສາທາລະນະລັດເກົາຫລີ ແລະ ສປປ ເກົາຫລີ ທີ່ສະເໜີເປັນເຈົ້າພາບຮ່ວມ ລວມທັງ 2 ປະເທດຈາກອາຊຽນ ມາເລເຊຍ-ສິງກະໂປ ສະເໜີເປັນເຈົ້າພາບຮ່ວມ.
ນອກຈາກນີ້ ຍັງມີເອຢິບ, ການາ, ອາຟຣິກາໃຕ້, ເຢຍລະມັນ, ຮົງກາລີ, ຣັດເຊຍ, ສະເປນ, ເນເທີແລນ, ອົດສະຕຣາລີ ແລະ ອາເຈນຕິນາ. ການປະກາດເຈົ້າພາບຈະມີຂຶ້ນໃນປີ 2025, ສ່ວນເຈົ້າພາບໂອແລມປິກ ປີ 2020 ແມ່ນຍີ່ປຸ່ນ, 2024 ຝຣັ່ງ ແລະ 2028 ສະຫະລັດອາເມລິກາ.
