ຈີນສັ່ງສາຍການບິນໃນປະເທດຢຸດໃຊ້ໂບອິ້ງ ຮຸ້ນດຽວກັບເອທິໂອປີແອລາຍທີ່ຕົກ
ສື່ຈີນລາຍງານວ່າ: ທາງການຈີນສັ່ງໃຫ້ສາຍການບິນພາຍໃນປະເທດຢຸດການໃຊ້ເຮືອບິນໂບອິ້ງ 737 ແມັກ (737 Max) ຮຸ້ນດຽວກັບຂອງສາຍການບິນເອທິໂອປີ ແອລາຍ ທີ່ຕົກມີຜູ້ເສຍຊີວິດທັງໝົດໃນວັນທີ 10 ມີນານີ້.
ວາລະສານໄສຊິງຂອງຈີນອ້າງແຫລ່ງຂ່າວວ່າ: ສຳນັກງານການບິນພົນລະເຮືອນຂອງຈີນມີຄຳສັ່ງໃຫ້ສາຍການບິນພາຍໃນປະເທດຢຸດໃຊ້ເຮືອບິນໂບອິ້ງ 737 ແມັກ ທີ່ມີຢູ່ປະມານ 60 ລຳ ແລ້ວປ່ຽນໄປໃຊ້ຮຸ້ນ 737-800 ແທນ ຫລັງຈາກເຮືອບິນໂບອິ້ງ 737 ແມັກ 8 ຂອງເອທິໂອປີ ແອລາຍ ຕົກຫລັງບິນຂຶ້ນຈາກນະຄອນຫລວງແອດດິສອາບາບາຂອງເອທິໂອປີ ເພື່ອມຸ່ງໜ້າໄປນະຄອນຫລວງໄນໂຣບີຂອງເກນຢາໄດ້ບໍ່ເທົ່າໃດນາທີ ເຮັດໃຫ້ຜູ້ໂດຍສານເສຍຊີວິດທັງໝົດ 157 ຄົນ. ສ່ວນເວັບໄຊໜັງສືພິມໄຊນາບິສິເນສນິວ ລາຍງານວ່າ: ສຳນັກງານການບິນພົນລະເຮືອນຂອງຈີນມີຄຳສັ່ງ (ບໍ່ເປັນລາຍລັກອັກສອນ) ຖືເປັນຄັ້ງທີສອງແລ້ວທີ່ເຮືອບິນຮຸ້ນນີ້ເກີດອຸປະຕິເຫດ ທັງທີ່ເປັນເຮືອບິນຮຸ້ນຫລ້າສຸດຂອງໂບອິ້ງ ຫາກໍນຳມາໃຫ້ບໍລິການໃນປີ 2017, ຄັ້ງທຳອິດເກີດຂຶ້ນຕໍ່ສາຍການບິນໄລອ້ອນແອຂອງອິນໂດເນເຊຍໃນເດືອນຕຸລາປີກ່ອນ ເປັນຖ້ຽວບິນພາຍໃນປະເທດ ຕົກຫລັງບິນຂຶ້ນໄດ້ 13 ນາທີ ຜູ້ໂດຍສານ ແລະ ຈຸບິນ 189 ຄົນເສຍຊີວິດໝົດ ສາເຫດຂອງອຸປະຕິເຫດຄັ້ງທຳອິດຍັງຢູ່ລະຫວ່າງການສອບສວນ. ລາຍງານເບື້ອງຕົ້ນໃນເດືອນພະຈິກໄລຍະທີ່ຍັງບໍ່ພົບກັບບັນທຶກສຽງໃນຫ້ອງນັກບິນຊີ້ໃສ່ບັນຫາການສ້ອມແປງ, ການຝຶກອົບຮົມ ແລະ ການແກ້ໄຂບັນຫາຂອງໂບອິ້ງເລື່ອງລະບົບປ້ອງກັນເຄື່ອງຈັກຢຸດກາງອາກາດ.
