ເຫຼົ້າຢາ ພາເພ

ເຫຼົ້າຢາ ພາເພ - advert banner 728 90 728x90 - ເຫຼົ້າຢາ ພາເພ

ໂດຍ : ມຶກບໍ່ແຫ້ງ

ເຫຼົ້າຢາ ພາເພ - new3 - ເຫຼົ້າຢາ ພາເພ

ການດື່ມທາດເຫຼົ້າເຂົ້າໃນຮ່າງກາຍແລ້ວຂັບຂີ່ນັ້ນ ຍັງຄວບຄຸມກັນຢ່າງທົ່ວເຖິງບໍ່ທັນໄດ້ຕາມລະບຽບກົດໝາຍ ເຊິ່ງກາຍເປັນໄພອັນໜ້າເປັນຫ່ວງ.

ອີງຕາມຂໍ້ມູນຂອງເຈົ້າໜ້າທີ່ ໃຫ້ຮູ້ວ່າ ການດື່ມສິ່ງມຶນເມົາ ແລ້ວຂັບຂີ່ ເປັນສາເຫດຕົ້ນຕໍ ຂອງອຸບັດເຫດ ໃນ ສປປລາວ. ໂດຍສະເລ່ຍແລ້ວ ຄົນລາວ ຕາຍຍ້ອນອຸບັດເຫດເທິງທ້ອງຖະໜົນ ມື້ໜຶ່ງ ປະມານ 3 ຄົນ. ເພາະສະນັ້ນ, ຈຶ່ງຖືໄດ້ວ່າ ການເກີດອຸບັດເຫດເທິງທ້ອງຖະໜົນ ເປັນສາເຫດການຕາຍ ແລະການເສຍອົງຄະໃນ ສປປລາວ ຫຼາຍທີ່ສຸດ ເຊິ່ງທັງໝົດນີ້ ແມ່ນມີສ່ວນກ່ຽວຂ້ອງເປັນຢ່າງຍິ່ງຕໍ່ກັບການ ຂັບຂີ່ເວລາມຶນເມົາ.

ແນ່ນອນ ອີງຕາມກົດລະບຽບຈະລາຈອນແລ້ວ ການຂັບຂີ່ເວລາ ມຶນເມົາ ແມ່ນມີຄວາມຜິດ 100% ແລະ ເມື່ອບໍ່ດົນມານີ້ ເຈົ້າໜ້າທີ່ ໄດ້ປະກາດແຈ້ງການ ກ່ຽວກັບການປັບໄໝ ຜູ້ຂັບຂີ່ເວລາ ມຶນເມົາ ຫຼາຍເທົ່າ ເມື່ອເດືອນທີ່ຜ່ານມາ ແຕ່ປານນັ້ນ ກໍຍັງເຫັນຈະແຈ້ງວ່າ ຜູ້ຄົນທີ່ ດື່ມທາດເຫຼົ້າ ຈົນມຶນເມົາ ແລ້ວຂັບຂີ່ນັ້ນ ຍັງມີໃຫ້ເຫັນຢູ່ທົ່ວໄປ.

ໃນເດືອນ ກຸມພາ ຫາ ເດືອນ ມີນາ 2019, ສັງຄົມສະທ້ານໃຈ ເມື່ອເຫັນ ສອງກໍລະນີທີ່ໂດ່ງດັງ ຄື “ເມົານໍ້າໝາກຂາມປ້ອມ” ແລ້ວຂັບຂີ່ລົດ ຈົນເກີດອຸບັດເຫດ ລາກແກ່ເອົາລົດຈັກຂອງຄູ່ກໍລະນີ ໄປໄກເຕີບ ໃນເວລາກາງເວັນ ແດດແດ້, ແລະ ກໍລະນີ ທີສອງ ແມ່ນ ເກີດຂຶ້ນໃນເວລາ ຄໍ່າຄືນ ທີ່ຂ້ອນຂ້າງເດິກ ທີ່ມີ ການຕຳກົ້ນລົດກັນ ຈົນເກີດມີການຖົກຖຽງ ແລະນາບຂູ່ກັນ ທີ່ສັງຄົມເອີ້ນວ່າ ກໍລະນີ “ມຶງລູກໃຜ”.

ທັງສອງກໍລະນີ ນີ້ ແມ່ນໄດ້ຮັບ ສຽງວິພາກວິຈານ ຈາກສັງຄົມຫຼາຍທີ່ສຸດ, ຍິ່ງສູ່ມື້ນີ້ ການເຜີຍແຜ່ ຂ່າວ-ເຫດການ ຜ່ານທາງສື່ອອນລາຍ ກາຍເປັນທີ່ຮັບຮູ້ທົ່ວສັງຄົມ ຢ່າງໄວວານັ້ນ ມັນໄດ້ສະທ້ອນໃຫ້ພວກເຮົາ ເຫັນຫຼາຍຢ່າງ ທີ່ຈະຕ້ອງຕັ້ງໜ້າ ເພີ່ມຄວາມເຂັ້ມຂຸ້ນໃນການຈັດຕັ້ງປະຕິບັດລະບຽບ ກົດໝາຍບ້ານເມືອງ ໂດຍສະເພາະ ການດື່ມ ທີ່ຂາດຄວາມຮັບຜິດຊອບ.

ເຫຼົ້າຢາ ພາເພ - lattana 1 - ເຫຼົ້າຢາ ພາເພ

ຄວາມຈິງແລ້ວ ເຈົ້າໜ້າທີ່ໄດ້ ພະຍາຍາມໃນການ ກວດກາ ແລະຄວບຄຸມ ເລື່ອງການດື່ມສິ່ງມຶນເມົາແລ້ວຂັບຂີ່ ເລື້ອຍມາ, ຈາກການໂຄສະນາ ຜ່ານທາງ ວິທະຍຸ, ໂທລະພາບ, ການຕິດປ້າຍ ເຕືອນ “ເມົາແລ້ວຂັບ ດັບຄາທີ່” ຕາມຖະໜົນສາຍຕ່າງໆ ຈົນເຖິງການ ເວົ້າໃສ່ ເຄື່ອງຂະຫຍາຍສຽງ ໃນເຂດໄຟອຳນາດ ໂດຍສະເພາະ ເວລາ ໄປການຕອນເຊົ້າ ແຕ່ເຖິງປານນັ້ນ ຜູ້ຄົນກໍບໍ່ຍອມເອົາຫົວໃສ່ໃຈຊາ ພໍເທົ່າໃດ.

ເຊິ່ງມັນອາດຍັງບໍ່ພຽງພໍ! ບົດຮຽນຫຼາຍປະເທດ ເພິ່ນເຂັ້ມງວດ ແລະ ໃສ່ໂທດໜັກທີ່ສຸດ, ຕົວຢ່າງ ເຊັ່ນ ຢູ່ ໂປໂລຍ ຖ້າເຫັນການຂັບຂີ່ລົດ (ຮວມທັງລົດຖີບ) ເວລາມຶນເມົາ ຈະຖືກເຈາະປ່ອງ ໃບຂັບຂີ່ ໂລດ, ຖ້າຖືກເຈາະຮອດ 3​ ເທື່ອ ແມ່ນບໍ່ສາມາດຂັບລົດໄດ້ ຕະຫຼອດຊີວິດ. ຢູ່ ສປ ຈີນ ເພິ່ນກໍປາບໜັກ ເລື່ອງນີ້ບໍ່ແມ່ນຢອກ.

ມັນອາດຮອດເວລາ ໃນການບັງຄັບໃຊ້ລະບຽບກົດໝາຍຢ່າງເຄັ່ງຄັດ, ເຊິ່ງກ່ອນອື່ນໝົດ ພວກເຮົາຕ້ອງຕັດສິນໃຈ ລົງທຶນໃສ່ຂະແໜງນີ້ເພີ່ມຂຶ້ນ ເລີ່ມແຕ່ ຈັດຊື້ ເຄື່ອງເປົ່າ ເພື່ອກວດກາລະດັບ ທາດເຫຼົ້າໃນຮ່າງກາຍໃຫ້ ແກ່ເຈົ້າໜ້າ ທີ່ຕຳຫຼວດ ຈົນໄປເຖິງ ການຕິດຕັ້ງກ້ອງວົງຈອນ ຕາມທ້ອງຖະໜົນ ແລະ ການຈັດສັນ ບຸກຄະລາກອນພຽງພໍໃນການ ປະຈຳການ ໂດຍສະເພາະ ຍາມຄໍ່າຄືນ.

ອີກອັນໜຶ່ງ, ເມື່ອເດືອນກຸມພາ ທີ່ຜ່ານມາ ນະຄອນຫຼວງວຽງຈັນ ກໍປະກາດຈະແຈ້ງວ່າ ພະນັກງານລັດ ຕ້ອງເປັນແບບຢ່າງໃນການປະຕິບັດລະບຽບ ຈະລາຈອນ, ຖ້າລະເມີດ ຈະຖືກໃສ່ໂທດໜັກກວ່າປະຊາຊົນທົ່ວໄປ, ອັນນີ້ ກ່ຽວຂ້ອງ ໂດຍກົງກັບ ສອງກໍລະນີ ທີ່ກ່າວມາຂ້າງເທິງ ເຊິ່ງປະຊາຊົນ ກໍຢາກເຫັນຄວາມສັກສິດ ຂອງບັນດາ ລະບຽບກົດໝາຍ ກ່ຽວກັບຈະລາຈອນຫຼາຍຂຶ້ນ ກ່ອນທີ່ ບ້ານເມືອງ ຈະເປ່ເພ ຍ້ອນເຫຼົ້າ-ເບຍ ໄປກວ່ານີ້.

error: Content is protected !!