ສໍາຫລວດຄວາມເປັນໄປໄດ້ໂຄງການພັດທະນາແຫລ່ງທ່ອງທ່ຽວຄົບວົງຈອນແຄມອ່າງນໍ້າງື່ມ 1

- advert banner 728 90 728x90 - ສໍາຫລວດຄວາມເປັນໄປໄດ້ໂຄງການພັດທະນາແຫລ່ງທ່ອງທ່ຽວຄົບວົງຈອນແຄມອ່າງນໍ້າງື່ມ 1

 ອໍານາດການປົກຄອງແຂວງວຽງຈັນ, ໄດ້ຕົກລົງອະນຸມັດໃຫ້ບໍລິສັດເອກະຊົນຈາກ ສປຈີນ ດໍາເນີນການສຶກສາຄວາມເປັນໄປໄດ້ໂຄງການພັດທະນາແຫລ່ງທ່ອງທ່ຽວຄົບວົງຈອນແຄມອ່າງນໍ້າງື່ມ 1 ເມືອງແກ້ວອຸດົມ, ແຂວງວຽງຈັນ ເພື່ອແນໃສ່ຮອງຮັບການຂະຫຍາຍຕົວດ້ານການທ່ອງທ່ຽວພາຍໃນແຂວງ, ໄປຄຽງຄູ່ກັບການພັດທະນາພື້ນຖານໂຄງລ່າງ, ສ້າງວຽກເຮັດງານທໍາ ແລະ ສ້າງລາຍຮັບໃຫ້ປະຊາຊົນໃນທ້ອງຖິ່ນດີຂຶ້ນ.

- lattana 1 - ສໍາຫລວດຄວາມເປັນໄປໄດ້ໂຄງການພັດທະນາແຫລ່ງທ່ອງທ່ຽວຄົບວົງຈອນແຄມອ່າງນໍ້າງື່ມ 1

  ພິທິລົງນາມການສໍາຫລວດໂຄງການດັ່ງກ່າວມີຂຶ້ນໃນວັນທີ 11 ມີນານີ້,​ ທີ່ແຂວງວຽງຈັນລະຫວ່າງທ່ານ ຄໍາສອນ ສູນສະຫວັດ ຮອງຫົວໜ້າພະແນກແຜນການ ແລະ ການລົງທຶນແຂວງ ແລະ ທ່ານ ຈາງຢາວມິງ ປະທານບໍລິສັດ ຈີນຊິງຫາວຢູນ ການຄ້າຂາເຂົ້າ-ຂາອອກ ຈໍາກັດ, ໂດຍມີທ່ານ ວີດົງ ໄຊຍະສອນ ເຈົ້າແຂວງວຽງຈັນ, ທ່ານ ບຸນເພັງ ສາຍນໍລະສິງ ປະທານສະພາປະຊາຊົນແຂວງ, ພ້ອມດ້ວຍຜູ້ຕາງໜ້າພະແນກການຕ່າງໆອ້ອມຂ້າງແຂວງເຂົ້າຮ່ວມເປັນສັກຂີພິຍານ.

  ໂຄງການນີ້, ມີພື້ນທີ່ເຂດສໍາຫລວດຢູ່ແຄມອ່າງນໍ້າງື່ມ 1 ໃນເນື້ອທີ່ທັງໝົດ 20 ເຮັກຕາຢູ່ເມືອງແກ້ວອຸດົມ, ມີໄລຍະເວລາສໍາຫລວດ 12 ເດືອນໃຫ້ສໍາເລັດ, ໂດຍໃຫ້ຮັບປະກັນຂໍ້ມູນລະອຽດຂອງພື້ນທີ່, ການອອກແບບໂຄງການ ທັງໝົດ, ການສຶກສາຜົນກະທົບຕໍ່ສິ່ງແວດລ້ອມ-ສັງຄົມ ໃຫ້ສອດຄ່ອງຕາມລະບຽບກົດໝາຍ ສປປ ລາວ. 

   ບໍລິສັດຜູ້ສໍາຫລວດ ໃຫ້ຮູ້ວ່າ: ໂຄງການນີ້ປະກອບມີ: ເຂດທີ່ພັກອາໄສ, ໂຮງແຮມ, ສູນອາຫານ, ເຂດການຄ້າ, ການບັນເທິງ ແລະ ສິ່ງອໍານວຍຄວາມສະດວກອື່ນໆ, ເພື່ອຮອງຮັບບໍລິການນັກທ່ອງທ່ຽວທັງພາຍໃນ ແລະ ຕ່າງປະເທດໃຫ້ມີຄຸນນະພາບ, ທັງເປັນບ່ອນສ້າງວຽກເຮັດງານທໍາ, ສ້າງອາຊີບ ແລະ ສ້າງລາຍຮັບໃຫ້ປະຊາຊົນທ້ອງຖິ່ນ ກໍຄືປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງເປັນຢ່າງດີ.