“ສຸລາພາເພ”
ໂດຍ: ທິດກ່ຳ
ກ່ອນອື່ນ, ທິດກ່ຳຕ້ອງຂໍໂທດທີ່ໄດ້ເອົາເລື່ອງສຸລາ ບາຢອງມາເວົ້າມາວ່າສູ່ກັນຟັງໃນຄໍລຳສຳລັບມື້ນີ້. ອັນສາ ເຫດກໍເນື່ອງຈາກວ່າໃນຕົ້ນປີ 2019 ມັນມີເຫດການ ແລະ ປາກົດການຫຶກເຫີມໂດດເດັ່ນໃນແຫລ່ງຂ່າວຄາວຕ່າງໆ, ໂດຍສະເພາະແມ່ນໃນສື່ອອນລາຍທີ່ແຜ່ກະຈາຍໄປທົ່ວສັງຄົມລາວ ຫລື ອາດເວົ້າໄດ້ວ່າ ກະຈາຍໄປທົ່ວໂລກ.
ເຫດການທີ່ເກີດຂຶ້ນລາຍ ທີໜຶ່ງກໍແມ່ນໃນເວລາ 15 ໂມງປາຍຂອງວັນທີ 20 ມັງກອນ 2019 ທີ່ຜ່ານມາ, ໄດ້ມີລົດກະບະຣີໂວເລກທະບຽນ 4668 ປ້າຍກະຊວງໄປຕຳເອົາລົດຈັກ ແລ້ວແກ່ລາກໄປຫລາຍຮ້ອຍແມັດ ແລະ ເປັນຈັ່ງບຸນຄົນທີ່ຂັບຂີ່ລົດຈັກນັ້ນ ບໍ່ມີໃຜເສຍຊີວິດຍ້ອນ.
ຕໍ່ກໍລະນີດັ່ງກ່າວ, ຜ່ານການເອົາຂໍ້ມູນຊອກຫາສາເຫດກໍວ່າເປັນຍ້ອນເມົາຈົນບໍ່ຮູ້ສະຕິ ແລະ ຜູ້ຂັບຂີ່ນັ້ນກໍບໍ່ອື່ນໄກເປັນນາຍຕຳຫລວດຂັ້ນນາຍພັນ, ສ່ວນລາຍທີສອງກໍແມ່ນໃນເວລາ 3 ໂມງ ເຊົ້າ ຂອງວັນທີ 4 ມີນາທີ່ຜ່ານມາສົດໆຮ້ອນໆ, ໄດ້ມີ ການເວົ້າວ່າຜິດຖຽງນາບຂູ່ກັນຢູ່ເສັ້ນທາງດົງໂດກ ແຖວຫລັກ 9 ໂດຍມີວາທະວ່າ: “ມຶງເປັນລູກໃຜ?” ທັງດ່າທັງຊີ້ໜ້າຊີ້ຕາຈົກເອົາປືນສັນອອກມາຂູ່ເດປາຍປືນຂຶ້ນຟ້າເວົ້າຕ່າງໆນາໆ ປືນອາກາກູກະມີຢູ່ໃນລົດວ່າຊັ້ນ! ຕໍ່ກໍລະນີດັ່ງກ່າວ ມາເບິ່ງເຫດຜົນ ກໍແມ່ນຍ້ອນເມົາ ໂດຍຜູ້ທີ່ມີປາກສຽງໃສ່ໝູ່ນັ້ນຂັບລົດໄປຕຳເອົາກົ້ນລົດຄັນທີ່ ແລ່ນໄປທາງໜ້າ ຈາກນັ້ນຈຶ່ງເກີດມີບັນຫາຖົກຖຽງກັນເວົ້າຕ່າງໆນາໆ ດີແຕ່ຜູ້ທີ່ຂັບລົດຄັນທາງໜ້ານັ້ນບໍ່ມີອາລົມຄຽດຂົມຮ້າຍກາດ ຫລື ມີປາກມີສຽງຕອບໂຕ້, ມີພຽງແຕ່ ຮຽກຮ້ອງມີຫຍັງໃຫ້ຄ່ອຍເວົ້າວ່າເຈລະຈາກັນແບບສັນຕິ.
ແຕ່ຜູ້ທີ່ໄປຕຳເອົາກົ້ນລົດໝໍນັ້ນ ຍິ່ງມີການປານີປະນອມເທົ່າໃດ ເພິ່ນກໍຍິ່ງຂຶ້ນໝື້ຂຶ້ນເຈຍຄືວ່າຕົນມີສິດອຳນາດເປັນລູກຜູ້ໃຫຍ່, ບໍ່ເກງກົວໃຜໃນໂລກເມືອງຄົນເພາະປືນກູກະມີ, ນາຍກູກະເປັນປະມານນັ້ນ.
ຕາມເຮົາວ່າໃນ ສອງເຫດການທີ່ໄດ້ເກີດຂຶ້ນນີ້, ເຖິງວ່າມັນຍັງບໍ່ທັນມີຜົນເສຍຫາຍຕໍ່ຊັບສິນເງິນຄຳຢ່າງ ຫລວງຫລາຍພາຍມາກຕໍ່ບຸກຄົນ, ຕໍ່ຊາດ ແລະ ຕໍ່ປະຊາຊົນກໍຕາມ, ແຕ່ມັນພົວພັນ ເຖິງບົດບາດໜ້າທີ່, ກຽດສັກສີຂອງປະເທດຊາດບ້ານ ເມືອງ ແລະ ຍັງພົວພັນໄປ ເຖິງຜົນປະໂຫຍດ, ອະທິປະໄຕ, ສິນທຳ, ຈະລິຍະທຳ ແລະ ສິດສະເໝີພາບລະຫວ່າງບຸກຄົນ, ກຸ່ມຄົນລາມ ໄປຮອດຕົວບົດກົດໝາຍ ຂອງບ້ານເມືອງຄືວ່າມັນບໍ່ ມີຂື່ມີແປ, ບໍ່ມີອັນໃດທີ່ຈະ ສັກສິດ, ບໍ່ມີໃຜເກງກົວ ແລະ ຢ້ານກົວ, ເບິ່ງຄືວ່າໃຜຢາກເຮັດຫຍັງກໍໄດ້, ຢາກດ່າໃຜກໍດ່າ, ຢືດຖືເອົາສິດອຳນາດ ແລະ ຖານະຕຳແໜ່ງມາ ເປັນຕົວວັດໃນການດຳລົງຊີວິດ ແລະ ການຍືນຍົງຄົງຕົວຢູ່ໃນສັງຄົມບ້ານເມືອງເຮົາ.
