ຫລາຍປະເທດໂຈະການບິນໂບອິ້ງ 737 ແມັກ 8
ສາຍການບິນໃນຫລາຍປະເທດຕັດສິນໃຈໂຈະການບິນຂອງເຮືອບິນໂບອິ້ງ 737 ແມັກ 8 ຫລັງເຮືອບິນຮຸ້ນດັ່ງກ່າວຂອງເອທິໂອປີຕົກ ມີຜູ້ເສຍຊີວິດທັງໝົດໃນວັນທີ 10 ມີນາ.
ເຫດການເຮືອບິນໂດຍສານສາຍການບິນເອທິໂອປີຕົກໃນວັນທີ 10 ມີນາ ເຊິ່ງເຮັດໃຫ້ມີຜູ້ເສຍຊີວິດທັງໝົດ 157 ຄົນ ເຮັດໃຫ້ຫລາຍປະເທດເກີດຄວາມກັງວົນກ່ຽວກັບຄວາມປອດໄພຂອງເຮືອບິນໂບອິ້ງ 737 ແມັກ 8, ໃນວັນທີ 11 ມີນາ ທາງການຈີນໄດ້ສັ່ງໃຫ້ສາຍການບິນທຸກແຫ່ງຢຸດການບິນຂອງເຮືອບິນໂບອິ້ງ 737 ແມັກ 8 ໄປກ່ອນ. ຂະນະທີ່ ອິນໂດເນເຊຍ ລະບຸວ່າ: ຈະກວດສອບ ແລະ ຢຸດການບິນໄປກ່ອນຊົ່ວຄາວ. ນອກຈາກນີ້ ຍັງມີສາຍການບິນອີກຫລາຍປະເທດທີ່ຕັດສິນໃຈຢຸດໃຊ້ເຮືອບິນຮຸ້ນນີ້ເຊັ່ນກັນ ບໍ່ວ່າຈະເປັນສາຍການບິນເອທິໂອປີ, ອາຟຣິກາໃຕ້, ໂອມານ, ຕວກກີ, ດູໄບ, ຣັດເຊຍ, ສິງກະໂປ, ສ.ເກົາຫລີ ແລະ ອາກຊັງຕິນ.
ຂະນະທີ່ອາເມລິກາ ແລະ ການາດາ ຍັງໝັ້ນໃຈຄວາມປອດໄພຂອງເຮືອບິນໂບອິ້ງ 737 ແມັກ 8 ທີ່ມີໃຊ້ຢູ່ 350 ລຳທົ່ວໂລກ. ສ່ວນບໍລິສັດໂບອິ້ງອ້າງວ່າ: ເຮືອບິນຮຸ້ນນີ້ໄດ້ຮັບຄວາມນິຍົມຫລາຍ ໂດຍມີຄຳສັ່ງຊື້ຫລາຍກວ່າ 5.000 ລຳ ແລະ ບໍ່ມີເຫດຜົນທີ່ຈະຍົກເລີກການໃຊ້ເຮືອບິນຮຸ້ນດັ່ງກ່າວ, ສ່ວນຄວາມຄືບໜ້າໃນການສອບສວນເຫດເຮືອບິນເອທິໂອປີຕົກໃນວັນທີ 11 ມີນາ ເຈົ້າໜ້າທີ່ພົບກັບບັນທຶກຂໍ້ມູນການບິນ ແລະ ກັບບັນທຶກສຽງພາຍໃນຫ້ອງນັກບິນແລ້ວ, ຂະນະທີ່ມີຜູ້ເຫັນເຫດການບອກວ່າ: ເຫັນຄວັນໄຟເກີດຂຶ້ນບໍລິເວນທ້າຍຂອງເຮືອບິນກ່ອນເຮືອບິນຈະຕົກພື້ນຈົນເກີດລະເບີດຢ່າງຮຸນແຮງ. ສ່ວນຜູ້ຊ່ຽວຊານຂອງອາເມລິກາ ລະບຸວ່າ: ສາເຫດເຮັດໃຫ້ເຮືອບິນຕົກອາດຈະມາຈາກຫລາຍປັດໄຈບວກເຂົ້າກັນ.
