ເສດຖະກິດຕວກກີເຂົ້າສູ່ສະພາບຫລຸດຖອຍ ເປັນຄັ້ງທຳອິດໃນຮອບ 10 ປີ
ສະຖາບັນສະຖິຕິຕວກກີລາຍງານວ່າ: ເສດຖະກິດຕວກກີເຂົ້າສູ່ສະພາບຫລຸດຖອຍເປັນຄັ້ງທຳອິດນັບແຕ່ປີ 2009 ພຽງບໍ່ເທົ່າໃດອາທິດກ່ອນລັດຖະບານປະທານາທິບໍດີ ເຣເຈບ ທາຍຍິບ ແອໂດອານ ຂອງຕວກກີ ຈະລົງສະໜາມເລືອກຕັ້ງທ້ອງຖິ່ນ ໂດຍບັນຫາເສດຖະກິດ ແລະ ເງິນເຟີ້ເປັນເລື່ອງສຳຄັນຂອງຜູ້ມີສິດເລືອກຕັ້ງ.
ຂະແໜງການຜະລິດຂອງຕວກກີຫລຸດລົງ 2,4% ໃນໄຕມາດສຸດທ້າຍຂອງປີຜ່ານມາ ເມື່ອທຽບໃສ່ໄຕມາດ 3 ເຊິ່ງຫລຸດລົງເຊັ່ນກັນ. ການຫລຸດລົງຕິດຕໍ່ກັນມາສອງໄຕມາດໃນເສດຖະກິດຂະແໜງການຜະລິດຖືວ່າເປັນສະພາບເສດຖະກິດຫລຸດຖອຍ. ສຳລັບເສດຖະກິດຕວກກີໂດຍລວມຂະຫຍາຍຕົວ 2,6% ໃນປີ 2018 ແຕ່ຖືວ່າຕໍ່າກວ່າຕົວເລກເສດຖະກິດເຕີບໃຫຍ່ 7,4%, ສ້າງສະຖິຕິສູງເປັນປະຫວັດສາດໃນປີ 2017 ເສດຖະກິດຂະຫຍາຍຕົວຊ້າ ແລະ ວິກິດຄ່າເງິນຕວກກີໃນປີຜ່ານມາ ເປັນບັນຫາສຳລັບປະທານາທິບໍດີ ແອໂດອານ ແລະ ລັດຖະບານພັກເອເຄພີທີ່ກຳລັງຈະເຂົ້າສູ່ການເລືອກຕັ້ງໃນວັນທີ 31 ມີນາ ຫລັງຈາກຜູ້ນຳຕວກກີມັກກ່າວວ່າ: ເສດຖະກິດຕວກກີເຕີບໃຫຍ່ຢ່າງແຂງແກ່ນໃນໄລຍະທີ່ທ່ານດຳລົງຕຳແໜ່ງ.
