ກະຊວງ ຖວທ ຈັດເຝິກອົບຮົມບົດບາດຍິງ-ຊາຍໃຫ້ພະນັກງານເພດຍິງ
ໃນວັນທີ 12-13 ມີນາ 2019 ກະຊວງຖະແຫລງຂ່າວ ວັດທະນະທຳ ແລະທ່ອງທ່ຽວ (ຖວທ) ໄດ້ຈັດການອົບຮົມ ໃນຫົວຂໍ້ “ບົດບາດຍິງ-ຊາຍ ໃນການບໍລິຫານ ແລະ ທັກສະຄວາມເປັນຜູ້ນຳ” ຂຶ້ນທີ່ຫໍວັດທະນະທຳແຫ່ງຊາດ ເພື່ອຍົກລະດັບຂີດຄວາມສາມາດ ແລະ ສ້າງຄວາມເຂັ້ມແຂງໃຫ້ພະນັກງານ ເພດຍິງ ເພີ່ມທະວີບົດ ບາດນຳພາ ໃນລະດັບຂັ້ນບໍລິຫານທຸກຂົງເຂດ ຂອງຂະແໜງຖະແຫລງຂ່າວ, ວັດທະນະທຳ ແລະ ທ່ອງທ່ຽວ. ໂດຍການເປັນປະທານຂອງທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງດັ່ງກ່າວ ທັງເປັນປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ(ຄກມດ), ມີບັນດາຜູ້ຕາງໜ້າຈາກກົມ, ກອງ ແລະ ໂຮງຮຽນອ້ອມຂ້າງກະຊວງ ຖວທ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນຈຳນວນຫລາຍ.
ການຝຶກອົບຮົມໃນຄັ້ງນີ້, ແນໃສ່ເຮັດພະນັກງານເພດຍິງ ໄດ້ເຂົ້າໃຈເຖິງຄວາມສຳຄັນ, ທັກສະໃນການບໍລິຫານ ແລະ ການນຳພາທີ່ດີ, ລວມທັງການພັດທະນາຕົນເອງ ໃນການບໍລິຫານວຽກງານຢ່າງມີຄວາມຮັບຜິດຊອບ ແລະຮັບປະກັນໃຫ້ການຈັດຕັ້ງ ປະຕິບັດວຽກງານຢຸ່ໃນຂະແຫນງການມີປະສິດທິຜົນດີຂຶ້ນ ເພື່ອກ້າວໄປສູ່ການບໍລິຫານ ທີ່ທັນສະໄໝ ແລະ ວ່ອງໄວ.
ໃນໂອກາດດັ່ງກ່າວ, ທ່ານ ສະຫວັນຄອນ ລາຊະມຸນຕີ ໄດ້ມີຄຳເຫັນວ່າ: ການອົບຮົມຄັ້ງນີ້, ຈະເຮັດໃຫ້ແມ່ຍິງໃນຂົງເຂດຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກໍຄືກົນໄກຄະນະກຳມະການເພື່ອຄວາມກ້າວຫນ້າແມ່ຍິງ ແລະ ແມ່-ເດັກ ໄດ້ຮັບການຍົກລະດັບຄວາມຮູ້ຄວາມເຂົ້າໃຈຢ່າງເລິກເຊິ່ງ ກ່ຽວກັບ ການປະຕິບັດວຽກງານຕົວຈິງໃນສັງຄົມ ແລະ ການເຂົ້າຮ່ວມເຄື່ອນໄຫວໃນຊີວິດ ວັດທະນະທຳ-ສັງຄົມ, ສະທ້ອນໃຫ້ເຫັນເຖິງຄວາມຫມາຍສຳຄັນ ບົດບາດແມ່ຍິງທີ່ມີສ່ວນຮ່ວມ ໃນການພັດທະນາເສດຖະກິດ-ສັງຄົມຂອງຊາດ, ເພີ່ມການມີສ່ວນຮ່ວມ ຂອງແມ່ຍິງເຂົ້າໃນການວາງແຜນ ແລະ ນະໂຍບາຍການພັດທະນາຕ່າງໆ ຂອງຂະແຫນງການໃຫ້ດີຂຶ້ນ, ທັງສ້າງຄວາມເຂັ້ມແຂງໃຫ້ແມ່ຍິງໄດ້ຮຽນຮູ້ຕື່ມຕໍ່ວຽກງານ ການບໍລິຫານ ແລະ ການນຳພາທີ່ດີ.
