ແຂວງອຸດົມໄຊທຳລາຍສວນຝິ່ນກວ່າ 50 ເຮັກຕາ.
ເມື່ອບໍ່ດົນມານີ້, ກອງບັນຊາການ ປກຊ-ປກສ ສົມທົບກັບອຳນາດການປົກຄອງເມືອງໄຊແຂວງອຸດົມໄຊ, ໄດ້ນຳກຳລັງລົງທຳລາຍສວນຝິ່ນທີ່ພວມອອກດອກໃນຈຳນວນ 70 ກວ່າຕອນ ລວມມີເນື້ອທີ່ທັງໝົດ 53 ເຮັກຕາ ນອນໃນພື້ນທີ່ 10 ບ້ານຂອງເມືອງດັ່ງກ່າວ, ເຊິ່ງປະຊາຊົນຈຳນວນໜຶ່ງລັກລອບປູກຢູ່ຕາມຮ່ອມພູທຸລະກັນດານ ແລະ ມີຄວາມຫຍຸ້ງຍາກຕໍ່ການກວດກາຂອງເຈົ້າໜ້າທີ່. ສຳລັບຜູ້ລັກລອບປູກຝິ່ນເທື່ອນີ້ ເຈົ້າໜ້າທີ່ໄດ້ດຳເນີນການສຶກສາອົບຮົມກ່າວເຕືອນ ເພື່ອບໍ່ໃຫ້ເຂົາເຈົ້າກັບມາປູກພືດທີ່ຜິດລະບຽບກົດໝາຍດັ່ງກ່າວນີ້ອີກ, ພ້ອມທັງແນະນຳເຂົາເຈົ້າໄປປູກພືດອື່ນໆທີ່ຖືກຕ້ອງສອດຄ່ອງກັບລະບຽບກົດໝາຍ ເພື່ອຜະລິດເປັນສິນຄ້າພັດທະນາຊີວິດການເປັນຢູ່ຂອງຕົນໃຫ້ດີຂຶ້ນ ແລະ ສາມາດຫລຸດພົ້ນຈາກຄວາມທຸກຍາກໄດ້ເທື່ອລະກ້າວ.
ປັດຈຸບັນ ສະພາບການລັກລອບປູກຝິ່ນແມ່ນເກີດມີຫລາຍ ໂດຍສະເພາະບັນດາແຂວງພາກເໜືອ ເຊິ່ງໃນໄລຍະ 2-3 ເດືອນມານີ້ ໄດ້ມີເຈົ້າໜ້າທີ່ ແລະ ອຳນາດການປົກຄອງຫລາຍທ້ອງຖິ່ນລົງທຳລາຍສວນຝິ່ນຢ່າງລຽນຕິດ ເພື່ອດັບສູນການປູກພືດຜິດກົດໝາຍດັ່ງກ່າວໃຫ້ໝົດໄປຢ່າງສິ້ນເຊີງ.
