ລາວ​ເລັ່ງຍົກ​ສູງ​ຄຸນ​ນະພາ​ບການ​ປິ່ນປົວ

ລາວ​ເລັ່ງຍົກ​ສູງ​ຄຸນ​ນະພາ​ບການ​ປິ່ນປົວ - advert banner 728 90 728x90 - ລາວ​ເລັ່ງຍົກ​ສູງ​ຄຸນ​ນະພາ​ບການ​ປິ່ນປົວ

      ກະຊວງ​ສາທາລະນະ​ສຸກ ​ໃຫ້​ຮູ້​ວ່າ: ປັດຈຸບັນ ຕາໜ່າງບໍລິການ​ປິ່ນປົວ​ຢູ່​ປະ​ເທດ​ເຮົາ​ສືບ​ຕໍ່​ຂະຫຍາຍຕົວ ​ແລະ ປົກ​ຄຸມ​ກວ້າງຂວາງ​ກວ່າ​ເກົ່າ, ຄຸນ​ນະພາ​ບການ​ປິ່ນປົວກໍ​ດີ​ຂຶ້ນ ນັບ​ແຕ່​ໂຮງໝໍ​ສູນ​ກາງ​ຮອດ​ທ້ອງ​ຖິ່ນ ​ໂດຍ​ສະ​ເພາະ​ໂຮງໝໍ​ສູນ​ກາງ​ມີ​ຄວາມ​ອາດ​ສາມາດ​ປິ່ນປົວ​ລົງ​ເລິກ​ສະ​ເພາະ​ດ້ານ​ດ້ວຍ​ອຸປະກອນ​ການ​ແພດ​ທັນ​ສະ​ໄໝ ​ເປັນຕົ້ນສາມາດ​ຜ່າຕັດ​ປ່ຽນ​ວາວ​ຫົວ​ໃຈ, ​ແຍ່​ເສັ້ນ​ເລືອດ​ຫົວ​ໃຈ, ​ໃສ່​ຈັກກະ​ຕຸ້ນ​ຫົວ​ໃຈ, ຜ່າຕັດ​ສະໝອງ, ກະດູກ​ສັນຫລັງ, ປ່ຽນ​ຫົວ​ກະດູກ​ກົກຂາ, ຜ່າຕັດ​ຜ່ານ​ທໍ່​ລະບົບ​ຕ່າງໆ, ຟອກ​ໝາກ​ໄຂ່ຫລັງ, ຟອກ​ຕັບ ​ແລະ ປິ່ນປົວ​ມະ​ເຮັງ​ຕ່າງໆ. ສ່ວນ​ໂຮງໝໍ​​ແຂວງ​ກໍ​ສາມາດ​ໃຫ້​ບໍລິການ​ປິ່ນປົວ​ໃກ້​ຄຽງ​ກັບ​ໂຮງໝໍ​ສູນ​ກາງ, ​ໂຮງໝໍ​ເມືອງ​ກໍ​ມີ​ຄວາມສາມາດ​ແກ້​ໄຂ​ສຸກ​ເສີນ, ຜ່າຕັດ​ຊ່ວຍ​ເກີດລູກ ອັນ​ໄດ້​ຊ່ວຍ​ຫລຸດຜ່ອນ​ການ​ຕາຍ​ຂອງ​ແມ່ ​ແລະ ​ເດັກ​ດີ​ຂຶ້ນ. ສຳລັບ​ສຸກສາລາ​ກໍ​ໄດ້​ຮັບ​ການ​ປັບປຸງ ສາມາດ​ໃຫ້​ບໍລິການ​ແມ່ ​ແລະ ​ເດັກ​ເຊັ່ນ: ສັກ​ຢາ​ກັນ​ພະຍາດ, ການ​ຄຸມ​ກຳ​ເນີ​ດ, ການ​ເກີດ​ລູກ​ທີ່​ປອດ​ໄພ ​ແລະ ກວດ​ສຸຂະພາບ​​ອື່ນໆ​ໄດ້​ດີ​ຂຶ້ນ.

ລາວ​ເລັ່ງຍົກ​ສູງ​ຄຸນ​ນະພາ​ບການ​ປິ່ນປົວ - lattana 1 - ລາວ​ເລັ່ງຍົກ​ສູງ​ຄຸນ​ນະພາ​ບການ​ປິ່ນປົວ

      ​ເວົ້າລວມ​ແລ້ວ ການ​ບໍລິການ​ປິ່ນປົວ​ໄດ້​ສືບ​ຕໍ່​ປັບປຸງ ​ແລະ ຂະຫຍາຍຕົວ​ຢ່າງ​ເປັນ​ລະບົບ ​ແລະ ມີ​ຄຸນ​ນະພາ​ບດີ​ຂຶ້ນ, ປະຊາຊົນ​ບັນດາ​ເຜົ່າ​ສາມາດ​ເຂົ້າ​ເຖິງ​ການ​ບໍລິການ​ປິ່ນປົວ​ທີ່​ມີ​ມາດຕະຖານ​ສູງ, ພະນັກງານ​ແພດ​ໝໍ​ສ່ວນ​ໃຫຍ່​ແມ່ນ​ມີ​ຄວາມ​ຮັບຜິດຊອບ​ຕໍ່ໜ້າ​ທີ່​ສູງ-ມີ​ຈັນ​ຍາ​ບັນ ​ແລະ ອັນ​ສຳຄັນ​ແມ່ນ​ໄດ້​ເຂົ້າ​ເຖິງ​ບໍລິການ​ຂັ້ນພື້ນຖານ ​ໂດຍ​ບໍ່​ມີ​ສິ່ງ​ກີດ​ກັ້ນທາງ​ດ້ານ​ການ​ເງິນ.

     ແຕ່ຄຽງ​ຄູ່ກັນນັ້ນກໍ​ຍັງ​ມີ​ຂໍ້ຄົງຄ້າງ​ທີ່​ຈະ​ຕ້ອງ​ເອົາ​ໃຈ​ໃສ່​ປັບປຸງ​ການ​ບໍລິການ​ໃຫ້​ມີ​ຄຸນ​ນະພາ​ບ​ເປັນ​ທີ່​ຍອມຮັບ​ຂອງ​ສັງຄົມ ​ເປັນຕົ້ນພື້ນຖານ​ໂຄງ​ລ່າງ​ຍັງ​ບໍ່​ໄດ້​ມາດຕະຖານ, ສິ່ງ​ອຳນວຍ​ຄວາມ​ສະດວກ ກໍ​ຄື​ອຸປະກອນ​ເຄື່ອງມື​ການ​ແພດ​ຍັງ​ບໍ່​ທັນ​ພຽງພໍ, ​ເຕັກ​ໂນ​ໂລ​ຊີ​ບໍ່​ທັນ​ສູງ, ພະນັກງານ​ແພດ​ໝໍ​ຈຳນວນ​ໜຶ່ງ​ລະດັບ​ຄວາມ​ຮູ້-ຄວາມ​ສາມາດ​ຍັງ​ຈຳກັດ, ຂາດ​ຊ່ຽວຊານ​ລົງ​ເລິກ​ຂະ​ແໜງ​ການ, ຈັນ​ຍາ​ບັນນ້ຳ​ໃຈ​ຮັບຜິດຊອບ​ບໍ່​ທັນ​ສູງ ​ແລະ ​ແລ່ນນຳ​ຜົນ​ປະ​ໂຫຍ​ດ, ຄວາມ​ສາມາດ​ຊອກ​ຫາ​ພະຍາດ, ບົ່ງມະຕິ ​ແລະ ປິ່ນປົວ​ບໍ່​ທັນ​ຊັດ​ເຈນ ​ແລະ ວ່ອງ​ໄວ​ທັນ​ກັບ​ຄວາມ​ຕ້ອງການ. ນອກຈາກ​ນີ້ ການ​ບໍລິການ​ປິ່ນປົວ​ຂອງ​ພາກ​ເອກະ​ຊົນ ​ເຖິງ​ວ່າ​ມີ​ການ​ຂະຫຍາຍຕົວ, ​ແຕ່​ຄຸນ​ນະພາ​ບບໍ່​ສູງ, ​ໂຄສະນາ​ເກີນ​ຂອບ​ເຂດ ​ແລະ ລາຄາ​ບໍ່​ສົມ​ເຫດ​ສົມ​ຜົນ. ນອກ​ນີ້ ງົບປະມານ​ທີ່​ລັດຖະບານ​ສະໜອງ​ໃຫ້​ຂະ​ແໜງ​ສາທາລະນະ​ສຸກ​ກໍ​ມີ​ຈຳກັດ. ​ແນວ​ໃດ​ກໍ​ຕາມ, ຄາດໝາຍ​ຮອດ​ປີ 2020 ຂະ​ແໜງ​ສາທາລະນະ​ສຸກຕ້ອງໄດ້​ປັບປຸງ​ການ​ບໍລິການ​ຂອງ​ສຸກສາລາ​ໃຫ້​ສາມາດ​ຊ່ວຍ​ເກີດ​ທຳ​ມະ​ຊາດ​ໃຫ້​ໄດ້ 80%, ​ໃຫ້​ບໍລິການ​ປິ່ນປົວ​ທີ່​ມີ​ຄຸນ​ນະພາ​ບ​ແກ່​ປະຊາຊົນ​ຕາມ​ຄຳ​ຂວັນ 5 ດີ 1 ພໍ​ໃຈ ຂອງ​ໂຮງໝໍ​ນັບ​ແຕ່​ສູນ​ກາງ​ຮອດ​ທ້ອງ​ຖິ່ນ​ ​ແລະ ຫັນ​ເປັນ​ທັນ​ສະ​ໄໝ​ເທື່ອ​ລະ​ກ້າວ

ລາວ​ເລັ່ງຍົກ​ສູງ​ຄຸນ​ນະພາ​ບການ​ປິ່ນປົວ - 1 1 - ລາວ​ເລັ່ງຍົກ​ສູງ​ຄຸນ​ນະພາ​ບການ​ປິ່ນປົວ