ທ່ຽວ​ຊົມ​ທະ​ເລ​ໝອກ ​ເມືອງ​ໃໝ່​ໄຊ​ສະຖານ

- advert banner 728 90 728x90 - ທ່ຽວ​ຊົມ​ທະ​ເລ​ໝອກ ​ເມືອງ​ໃໝ່​ໄຊ​ສະຖານ

​ໂດຍ: ​ເດຊາ ກັນລະຍາ

- lattana 1 - ທ່ຽວ​ຊົມ​ທະ​ເລ​ໝອກ ​ເມືອງ​ໃໝ່​ໄຊ​ສະຖານ

ເມືອງໄຊສະຖານເປັນ ເມືອງສ້າງຂຶ້ນໃໝ່ເມື່ອປີ 2009 ເຊິ່ງຕັ້ງຢູ່ຫ່າງຈາກ ເທດສະບານແຂວງໄຊຍະບູລີໄປທາງທິດຕາເວັນຕົກ ປະມານ 64 ກິໂລແມັດ, ເປັນເມືອງພູດອຍ, ສູງຈາກລະດັບນ້ຳທະເລປະມານ 1.400 ແມັດ, ທິດ  ເໜືອຕິດກັບເມືອງ ຫົງສາ, ທິດໃຕ້ຕິດກັບເມືອງພຽງ, ທິດຕາເວັນອອກຕິດກັບ ເມືອງໄຊຍະບູລີ ແລະ ທິດຕາເວັນຕົກຕິດກັບລາຊະອານາຈັກໄທ, ເປັນເມືອງທີ່ມີປ່າໄມ້ປົກຫຸ້ມອາກາດເຢັນສະບາຍຕະຫຼອດປີ, ອຸນຫະພູມຕຳສຸດ 4-5 ອົງສາ, ປະກອບມີທົ່ວເມືອງມີ 21 ບ້ານ, ມີພົນລະເມືອງທັງໝົດ 15.200 ຄົນ, ກວມເອົາປະມານ 50 %, ສ່ວນໃຫຍ່ ເປັນຊົນເຜົ່າໄປຣ່ ກວມເອົາ 99,06%, ເຊິ່ງໃນເມື່ອກ່ອນ ແມ່ນຂຶ້ນກັບ ເມືອງໄຊຍະບູລີ ມີທັງໝົດ 18 ບ້ານ, ຊີວິດການເປັນຢູ່ຂອງປະຊາຊົນ ໃນເວລານັ້ນແມ່ນມີຄວາມລຳບາກທຸກຍາກຂາດເຂີນ ຫລາຍການດຳລົງຊີວິດຂອງເຂົາເຈົ້າສ່ວນໃຫຍ່ແມ່ນ ຖາງປ່າເຮັດໄຮ່ແບບເລື່ອນລອຍ, ພື້ນຖານໂຄງລ່າງບໍ່ ທັນໄດ້ຮັບການພັດທະນາ, ການໄປມາຫາສູ່ກັນຂອງ ປະຊາຊົນແມ່ນພົບຄວາມຫຍຸ້ງຍາກຫລາຍຍ້ອນບໍ່ມີ ເສັ້ນທາງຄົມມະນາຄົມເຂົ້າເຖິງ, ການເຊື່ອຖືງົມງວາຍ, ຮີດຄອງປະເພນີເກົ່າແກ່ຫລ້າຫລັງແບບຄອງເດີມຍັງກົດໜ່ວງທ່ວງດຶງການພັດທະນາເສດຖະກິດ-ສັງຄົມຂອງປະຊາຊົນເຂດນີ້ຄອບຄົວທຸກຍາກກວມເຖິງ 95% ຂອງຄອບຄົວທັງໝົດ.

- 742 - ທ່ຽວ​ຊົມ​ທະ​ເລ​ໝອກ ​ເມືອງ​ໃໝ່​ໄຊ​ສະຖານ
(ພິທີສູ່ຂໍເຜົ່າໄປຣ່)

ມາຮອດທ້າຍເດືອນທັນວາ 2009 ແຂວງໄຊຍະບູລີ ໄດ້ປະກາດສ້າງຕັ້ງເປັນເມືອງໃໝ່ໄຊສະຖານຂຶ້ນຢ່າງເປັນທາງການ ແລະ ຕະຫລອດ 9 ປີຜ່ານມາເມືອງ ໄຊສະຖານໄດ້ຮັບການພັດທະນາດີຂຶ້ນ, ໂດຍລັດຖະບານໄດ້ສຸມທຶນຮອນເຂົ້າສ້າງສາພັດທະນາ, ມາຮອດປັດຈຸບັນສາມາດລົບລ້າງຄວາມທຸກຍາກໄດ້ແລ້ວ 65 %, ຂອງຈຳນວນຄອບຄົວທັງ ໝົດ, ຊີວິດການເປັນຢູ່ຂອງ ປະຊາຊົນໄດ້ຮັບການພັດທະນາດີຂຶ້ນເປັນລຳດັບ, ພື້ນຖານໂຄງລ່າງໄດ້ມີການກໍ່ສ້າງ, ຖະໜົນຫົນທາງສະດວກສະບາຍທຽວໄດ້ຕະຫລອດປີ.

- 457 - ທ່ຽວ​ຊົມ​ທະ​ເລ​ໝອກ ​ເມືອງ​ໃໝ່​ໄຊ​ສະຖານ
(ຕາດນ້ຳປວດ)

ຈຸດເດັ່ນທີ່ເປັນເອກະລັກຂອງເມືອງແມ່ນວັດທະນະທຳ, ການນຸ່ງຖື, ການຂັບລຳ ທີ່ເປັນເອກະລັກເປັນຕົ້ນແມ່ນຂັບສະເລາະ ຕ່ອຍເກິ່ງ ເຊິ່ງ ເປັນສິລະປະດົນຕີພື້ນບ້ານ ທີ່ໂດດເດັ່ນຂອງເຜົ່າໄປຣ່ ແລະ ຄຽງຄູ່ກັນນັ້ນການທ່ອງທ່ຽວໄດ້ມີການພັດທະນາດີຂຶ້ນ ເປັນຕົ້ນແມ່ນການທ່ຽວຊົມພູຜາທະເລໝອກໃນລະຫວ່າງເດຶອນຕຸລາ ຫາ ເດຶອນມັງກອນ, ຊົມຕົ້ນໝ້ຽງໃຫຍ່ 1.000 ປີ, ຊິມຊາພື້ນເມືອງ ທີ່ເປັນສິນຄ້າໂອດ໋ອບຂອງ ທ້ອງຖິ່ນ ແລະ ທ່ຽວຊົມນ້ຳຕົກຕາດນ້ຳປວດ, ມີສວນສະຕໍເບິຣີ ຫລຶ ແລະ ຊາພື້ນ ເມືອງ(ຊາທຳມະຊາດ) ໃຫ້ບັນດາແຂກ, ນັກທ່ອງທ່ຽວ ໄດ້ຊົມ, ໄດ້ຊິມ ແລະ ເປັນ ຂອງຂວັນຕິດໄມ້, ຕິດມືໄປ ຝາກຕ້ອນໝູ່ຄູ່ອິກດ້ວຍ,   ພ້ອມນັ້ນຍັງໄດ້ສຳຜັດກັບ ເຮືອນຊານ ແລະ ວິຖີຊີວິດ ຂອງຊົນເຜົ່າໄປຣເຊິ່ງບໍ່ມີບ່ອນໃດຈະມາປຽບປານໄດ້.

- 3369747 - ທ່ຽວ​ຊົມ​ທະ​ເລ​ໝອກ ​ເມືອງ​ໃໝ່​ໄຊ​ສະຖານ

 ນອກນີ້ເມືອງໃໝ່ໄຊ ສະຖານຍັງມີຈຸດຊົມວິວໄວ້ ຄອຍບໍລິການໃຫ້ແກ່ນັກ ທ່ອງທ່ຽວໄດ້ຊົມທິວທັດທຳມະຊາດ ແລະ ມີຕູບໃຫ້ ພັກເຊົາແບບອະຕະຍາໄສ, ໃນກໍລະນີບັນດາແຂກ ຫລຶ ນັກທ່ອງທ່ຽວຢາກຈະມາຕັ້ງຄ້າຍ, ກາງເຕັ້ນນອນພັກ ຜ່ອນສຳຜັດກັບອາກາດສົດ, ເບິ່ງຕາເວັນຕົກລັບຂອບຟ້າ, ນອນນັບດວງດາວ ເທິງຂອບຟ້າ, ຕື່ນເຊົ້າມາໄດ້ ຊົມທະເລໝອກຂາວກະຈາຍໄປທົ່ວບໍລິເວນເກີນວ່າງົດງາມ ແລະ ປະທັບໃຈ.

- 3369 - ທ່ຽວ​ຊົມ​ທະ​ເລ​ໝອກ ​ເມືອງ​ໃໝ່​ໄຊ​ສະຖານ