ເບົາຫວານປ້ອງກັນໄດ້ ດູແລໂຕເອງແນວໃດໃຫ້ຫ່າງໄກພະຍາດນີ້

- advert banner 728 90 728x90 - ເບົາຫວານປ້ອງກັນໄດ້ ດູແລໂຕເອງແນວໃດໃຫ້ຫ່າງໄກພະຍາດນີ້

     ພະຍາດເບົາຫວານນັ້ນໃກ້ໂຕ ເປັນໄດ້ທຸກເພດທຸກໄວ ການຄຳນຶງຮູ້ ແລະ ເທົ່າທັນພະຍາດເບົາຫວານເປັນສິ່ງສຳຄັນ. ພະຍາດເບົາຫວານບໍ່ພຽງສົ່ງຜົນກັບຄຸນນະພາບຊີວິດ, ແຕ່ຍັງອາດຮຸນແຮງຫລາຍຂຶ້ນຖ້າບໍ່ໄດ້ຮັບການດູແລທີ່ດີ. ສະນັ້ນ ການປ້ອງກັນກ່ອນເກີດພະຍາດເບົາຫວານຈຶ່ງແມ່ນສິ່ງສຳຄັນ. ການຫັນມາເອົາໃຈໃສ່ຄົນໃນຄອບຄົວຈະຊ່ວຍໃຫ້ຫ່າງໄກພະຍາດ ຫາກທຸກຄົນມີຄວາມເຂົ້າໃຈທີ່ຖືກຕ້ອງ ແລະ ດູແລເອົາໃຈໃສ່ຢ່າງຖືກວິທີ, ປັບປ່ຽນພຶດຕິກຳໄປພ້ອມໆກັນ, ການກິນອາຫານ, ການອອກກຳລັງກາຍ ຍ່ອມຊ່ວຍໃຫ້ທຸກຄົນຫ່າງໄກຈາກພະຍາດເບົາຫວານໄດ້.

- lattana 1 - ເບົາຫວານປ້ອງກັນໄດ້ ດູແລໂຕເອງແນວໃດໃຫ້ຫ່າງໄກພະຍາດນີ້

     ສະມາຊິກໃນຄອບຄົວມີຫລາກຫລາຍໄວ ດັ່ງນັ້ນ ໃນແຕ່ລະຊ່ວງໄວ ການດູແລໃຫ້ຫ່າງໄກຈາກເບົາຫວານຈຶ່ງມີຄວາມແຕກຕ່າງກັນ ເພາະການຮັບຮູ້ ແລະ ພຶດຕິກຳການໃຊ້ຊີວິດມີຄວາມສ່ຽງທີ່ແຕກຕ່າງກັນ ໂດຍແບ່ງອອກເປັນ 4 ໄວ ດັ່ງນີ້ :

     1. ໄວເດັກເຖິງຊັ້ນປະຖົມ : ພໍ່ແມ່ຕ້ອງເປັນແບບຢ່າງທີ່ດີໃຫ້ກັບລູກ, ກິນອາຫານໃຫ້ຄົບ 5 ໝວດໝູ່ ໃນປະລິມານທີ່ເໝາະສົມ, ລະວັງນຳ້ຕານ, ແປ້ງ ແລະ ໄຂມັນ, ເນັ້ນໃຫ້ລູກດື່ມນຳ້ບໍລິສຸດ ແລະ ນົມຈືດແທນນຳ້ຫວານ ແລະ ນຳ້ອັດລົມ,ສອນໃຫ້ອອກກຳລັງກາຍສະໝໍ່າສະເໝີ ຫລື ພໍ່ແມ່ອອກກຳລັງກາຍກັບລູກຫລັງເລີກຮຽນ. ໃນເດັກທີ່ອາຍຸຫລາຍກ່ວາ 10 ປິ ແລະ ມີນຳ້ ໜັກເກີນມາດຕະຖານເຖິງຂັ້ນຕຸ້ຍ ຄວນໄດ້ຮັບການກວດລະດັບນຳ້ຕານ ແລະ ບົ່ງມະຕິພະຍາດເບົາຫວານ.

     2. ໄວໜຸ່ມ : ໃນໄວນີ້ການປູກຝັງ ພຶດຕິກຳການກິນເນັ້ນໂປຣຕິນ, ຜັກ ແລະ ໝາກໄມ້, ຫລຸດແປ້ງ, ນຳ້ຕານ ແລະ ໄຂມັນ ແລະ ລະວັງນຳ້ໜັກໂຕບໍ່ໃຫ້ເກີນມາດຕະຖານ, ເນັ້ນການອອກກຳລັງກາຍເປັນປະຈຳ. ພໍ່ແມ່ຄວນສະໜັບສະໜູນທາງດ້ານກິລາທີ່ລູກສົນໃຈ, ແຕ່ຫາກລູກຕິດເກມ, ຕິດໂລກອອນລາຍ, ມັກນອນເບິ່ງແຕ່ໂທລະພາບ ຕ້ອງແນະນຳໃຫ້ລູກເຮັດກິດຈະກຳທີ່ເປັນປະ ໂຫຍດຕື່ມ ແລະ ໃຊ້ເວລາໃຫ້ເໝາະສົມ.

     3. ໄວເຮັດວຽກ : ຄວນມີການຄວບຄຸມເລື່ອງການກິນອາຫານ ແລະ ນຳ້ໜັກບໍ່ໃຫ້ເກີນມາດຕະຖານ ລະວັງປະລິມານແປ້ງ ແລະ ນຳ້ຕານໃນແຕ່ລະມື້ ເຖິງວ່າຈະດົນປານໃດຢ່າຖືເບົາການອອກກຳລັງກາຍ, ຄວນເຮັດໃຫ້ໄດ້ອາທິດລະ 5 ມື້ ເທື່ອລະບໍ່ຕໍ່າກ່ວາ 30 ນາທີ, ກວດສຸຂະພາບເບິ່ງເບົາຫວານເປັນປະຈຳທຸກປີ ຫາກຢາກມີລູກຕ້ອງປຶກສາທ່ານໝໍຢ່າງລະອຽດ ເພາະແມ່ຍິງມີໂອກາດເປັນເບົາຫວານໃນເວລາຖືພາໄດ້. ນອກຈາກນີ້, ຖ້າມີກຳມະພັນຄົນໃນຄອບຄົວເຄີຍເປັນພະຍາດເບົາຫວານກໍຈະມີໂອກາດເປັນພະຍາດນີ້ເພີ່ມຂຶ້ນ 50% ເພາະເມື່ອອາຍຸເພີ່ມຂຶ້ນ ຄວາມສ່ຽງໃນການເປັນເບົາຫວານຈະເພີ່ມຂຶ້ນໄປນຳ ເນື່ອງຈາກຄວາມເສື່ອມຂອງຮ່າງກາຍຕາມໄວ.

     4. ໄວຜູ້ເຖົ້າ : ລະວັງການກິນແປ້ງ ແລະ ນຳ້ຕານ, ຄວບຄຸມປະລິມານນຳ້ຕານໃນແຕ່ລະມື້ຢ່າງເຄັ່ງຄັດ, ເນັ້ນການກິນຜັກ – ໝາກໄມ້ທີ່ມີໄຟເບີ ຫລື ເສັ້ນໄຍອາຫານອ່າວຫລາຍ ເພາະຈະຊ່ວຍຄວບຄຸມລະດັບນຳ້ຕານ ແລະ ໄຂມັນໃນເລືອດ, ອອກກຳລັງກາຍສະໝໍ່າສະເໝີ, ເນັ້ນກິລາທີ່ຊ່ວຍເພີ່ມກ້າມຊີ້ນ ເຊັ່ນ : ຍົກນຳ້ໜັກ, ໂຢຄະ ເປັນຕົ້ນ. ຄວບຄຸມນຳ້ໜັກໃຫ້ຢູ່ໃນເກນມາດຕະຖານ, ກວດເຊັກເບົາຫວານທຸກປີ ຫລື ຫາກປ່ວຍເປັນພະຍາດເບົາຫວານ ຄວນດູແລຕົນເອງ ແລະ ກິນຢາປິ່ນປົວຕາມແພດສັ່ງຢ່າງເຄັ່ງຄັດ.

   ເຕັກນິກງ່າຍໆເພື່ອປ້ອງກັນເບົາຫວານແມ່ນ ບໍລິໂພກນຳ້ຕານບໍ່ເກີນ 6 ບ່ວງກາເຟ ຫລື 24 ກຣາມຕໍ່ມື້, ເລືອກກິນຜັກ – ໝາກໄມ້ນຳ້ຕານໜ້ອຍ ເຊັ່ນ : ໝາກສີດາ, ໝາກຫຸ່ງ, ໝາກກ້ຽງ, ໝາກມ່ວງດິບ, ໝາກກ້ຽງໃຫຍ່,​ ໝາກແອັບເປິ້ນຂຽວ ເປັນຕົ້ນ, ຫລຸດ ຫລື ງົດການດື່ມຊາ, ກາເຟ, ນຳ້ອັດລົມ, ເຂົ້າໜົມຫວານ, ກິນໄດ້ອາທິດລະເທື່ອ, ເລືອກກິນອາຫານຄາໂບໄຮເດຣດບໍ່ຜັດສີ, ກາກໄຍສູງ ເຊັ່ນ : ເຂົ້າເໝົ້າ, ເຂົ້າກໍ່າ, ຖົ່ວແກ່ນແຫ້ງ ເປັນຕົ້ນ, ອ່ານສະຫລາກຂ້າງຜະລິດຕະພັນອາຫານເພື່ອພິຈາລະນາປະລິມານນຳ້ຕານທີ່ແນ່ນອນກ່ອນຊື້ມາກິນ, ການຖູແຂ້ວ ຫລື ບ້ວນປາກທັນທີຫລັງອາຫານຊ່ວຍຫລຸດຄວາມຢາກຂອງຫວານຫລັງອາຫານໄດ້ ສິ່ງສຳຄັນແມ່ນເນັ້ນການອອກກຳລັງກາຍ ແລະ ໝັ່ນກວດສຸຂະພາບເປັນປະຈຳທຸກປີ.