ຮູ້ໝວດເລືອດ ຮູ້ນິໄສ
ຢູ່ຍີ່ປຸ່ນ ເວລາສຳພາດເອົາຄົນເຂົ້າເຮັດວຽກ ເພິ່ນມັກຈະຖາມເຖິງໝວດເລືອດຂອງຜູ້ທີ່ຖືກສຳພາດຢູ່ສະເໝີ ນີ້ແມ່ນວິທີການນິຍົມກັນທີ່ສຸດຂອງຄົນຍີ່ປຸ່ນ. ທັງນີ້ກໍເພື່ອໃຫ້ຮູ້ໄດ້ບຸກຄະລິກກະພາບຂອງຜູ້ທີ່ຈະເຂົ້າເຮັດວຽກ. ການອ່ານບຸກຄະລິກກະພາບຄົນໂດຍຜ່ານການສຳພາດກ່ຽວກັບໝວດເລືອດ ແມ່ນມີຄວາມຊັດເຈນດີພໍສົມຄວນ. ດ້ວຍເຫດນີ້ຢູ່ຍີ່ປຸ່ນເພິ່ນຈຶ່ງມັກນຳໃຊ້ໝວດເລືອດເປັນພື້ນຖານໃນການວິເຄາະ, ວິໄຈບຸກຄະລິກ ແລະ ເດົາດວງຊະຕາຂອງຄົນ. ຜ່ານການເຮັດສຳຫລວດຂອງເພິ່ນໃຫ້ຮູ້ວ່າ: ມີຜູ້ຊາຍ 29% ແລະ ຜູ້ຍິງ 45% ເຊື່ອວ່າມັນເປັນຄວາມຈິງ. ການທີ່ຮູ້ໝວດເລືອດຂອງກັນ ແລະ ກັນມັນມີຄວາມສຳຄັນຫລາຍ, ພິເສດແມ່ນຜູ້ມີໝວດເລືອດທີ່ຫາຍາກ ເພື່ອວ່າໃນກໍລະນີຫາກມີການຊ່ວຍເຫລືອໃຫ້ເລືອດກັນກໍຈະງ່າຍຂຶ້ນ ຍ້ອນເຫດນັ້ນ 99% ຄົນຍີ່ປຸ່ນຍ່ອມຮູ້ດີໝວດເລືອດຂອງຕົນວ່າແມ່ນໝວດເລືອດໃດ.
ໝວດເລືອດ A: ຄົນທີ່ມີໝວດເລືອດ A ໂດຍທົ່ວໄປແລ້ວເປັນຄົນໃຈດີ, ມັກຄວາມເປັນລະບຽບຮຽບຮ້ອຍ, ບໍ່ມັກສິ່ງມະຍຸມະຍະ, ເຮັດວຽກແມ່ນມີແຜນລະອຽດ, ມີການກະກຽມຢ່າງຮອບຄອບກ່ອນຈະລົງມືເຮັດ, ເປັນຄົນຈິງຈັງ, ມັກຄວາມສະອາດ ທັງເປັນຄົນໃຈດີ ແຕ່ຍ້ອນເປັນຄົນລະບຽບ ແລະ ເຄັ່ງຂັດເກີນໄປ ຈຶ່ງກາຍເປັນຈຸດອ່ອນຂອງເຂົາເສຍເອງ ເຊັ່ນເປັນຄົນກະວົນກະວາຍ ແລະ ເຄັ່ງຕຶງຢູ່ສະເໝີ.
ໝວດເລືອດ O: ຄົນທີ່ມີໝວດເລືອດ O ເປັນຄົນສຸກະທັດ, ເບິ່ງໂລກໃນແງ່ດີ, ມີຄວາມເບີກບານ, ເປັນຄົນມີຄວາມສາມາດໃນການຊີ້ນຳ-ນຳພາ, ຮູ້ຈັກສົ່ງແຮງບັນດານໃຈໃຫ້ຄົນອື່ນ, ເປັນຄົນຊອບເຮັດວຽກໃນພາລະກິດທີ່ຍິ່ງໃຫຍ່, ມັກໃສ່ໃຈແຕ່ວຽກໃຫຍ່ໆ, ບໍ່ໃສ່ໃຈກັບວຽກນ້ອຍມະຍິກມະຍອຍ, ການດຳລົງຊີວິດ ແລະ ເຮັດວຽກຂອງເຂົາແມ່ນມີລັກສະນະຮ້ອນແຮງ, ມີສຸຂະພາບແຂງແຮງດີ ແລະ ມີການປັບຕົວເຂົ້າກັບສະພາບແວດລ້ອມໄດ້ດີ.
ນີ້ເປັນໝວດເລືອດຂອງບັນດານັກປາດອາຈານ ແລະ ນັກການທູດ. ພວກເຮົາຈະເຫັນວ່າຜູ້ທີ່ມີໝວດເລືອດ O ມັກຈະເປັນຄົນເບີກບານມ່ວນຊື່ນ, ມີຄວາມເປັນກັນເອງ ແຕ່ເປັນຄົນມັກໜ້າອາຍຈົ່ງຈຽມ, ມີຄວາມເປັນຕົນເອງສູງ ຈຶ່ງເປັນຄົນຢາກຂີ້ຖີ່ແດ່ຈັກໜ້ອຍ, ເປັນຄົນເດັດຂາດມັກເອົາແຕ່ໃຈຕົນເອງ, ມັກຫຶງຫວງ ແລະ ເປັນຄົນບໍ່ມັກຕົງເວລາ.
ໝວດເລືອດ B: ຄົນທີ່ມີໝວດເລືອດ B ເປັນຄົນມີຫົວຄິດປະດິດສ້າງ ແລະ ຟົດຟື້ນ. ນີ້ແມ່ນໝວດເລືອດຂອງຄົນທີ່ມີຫົວຄິດປະດິດສ້າງ, ຊອກຮູ້ຊອກເຫັນ, ມີຈິດວິນຍານດ້ານສິລະປິນ. ຍ້ອນແນວນັ້ນ ເຂົາຈຶ່ງມັກເຮັດວຽກຕາມຄວາມມັກຂອງຕົນເອງ ມັກຈະເຮັດ ບໍ່ມັກບໍ່ເຮັດ ເຊິ່ງແຕກຕ່າງກັບຄົນທີ່ມີໝວດເລືອດ A ຢ່າງສິ້ນເຊີງ, ເປັນຄົນບໍ່ມັກຢູ່ໃນລະບຽບການ. ຍ້ອນແນວນັ້ນ ຄົນທີ່ມີໝວດເລືອດ B ຈຶ່ງຖືກມອງວ່າເປັນຄົນໃຈນ້ອຍ ແລະ ຂາດຄວາມຮັບຜິດຊອບ.
ຈຸດເດັ່ນຂອງຄົນໝວດເລືອດ B ມີນິໄສມັກເສລີ, ບໍ່ມັກຜູກມັດ ບັງຄັບ, ມີແນວຄິດເປີດກວ້າງ. ສະນັ້ນ ຈຶ່ງເຮັດໃຫ້ຄົນຢູ່ອ້ອມຂ້າງຮູ້ສຶກສະບາຍໃຈ, ມີຄວາມເບີກບານ ແຕ່ເຂົາກໍເປັນຄົນລຶກລັບເຂົ້າໃຈຍາກ ແລະ ມັກປ່ຽນແປງຢູ່ຕະຫລອດເວລາ, ຄົນອ້ອມຂ້າງອາດສັບສົນ ເພາະບໍ່ຮູ້ວ່າເຂົາຄິດຫຍັງ ແລະ ຈະປ່ຽນແປງເມື່ອໃດ. ຖ້າຜູ້ຖືກສຳພາດເຂົ້າເຮັດວຽກຫາກມີໝວດເລືອດ B ແມ່ນໄດ້ຮັບຄວາມນິຍົມໜ້ອຍກວ່າໝູ່.
ໝວດເລືອດ AB: ຄົນທີ່ມີໝວດເລືອດ AB ຖືກຕີລາຄາວ່າເປັນຄົນແປກປະຫລາດ, ມີນິໄສທີ່ເຂົ້າໃຈຍາກ ແລະ ສັບສົນ ທັງເປັນຄົນຂີ້ອາຍ ອາດເວົ້າໄດ້ວ່າມີສະພາບປ່ຽນແປງຜິດປົກກະຕິຢ່າງບຶດແດດບຶດຝົນ ແຕ່ເຂົາກໍເປັນຄົນເປີດເຜີຍໄດ້ດີພໍສົມຄວນ, ເປັນຄົນທຸ່ນທ່ຽງ ເຖິງແມ່ນວ່າຈະມີຫຍັງເກີດຂຶ້ນກໍຕາມ ເຂົາກໍຮັກສາອາການໄດ້ດີ ຈົນເຖິງຂັ້ນວ່າຄືບໍ່ມີຫຍັງເກີດຂຶ້ນເລີຍ ສາມາດໄວ້ວາງໃຈໄດ້, ມີຄວາມຮັບຜິດຊອບ, ມີຄວາມຕັດສິນໃຈສູງຢ່າງມີເຫດມີຜົນ, ພາວະວິໄສ ແລະ ສຽບແຫລມ. ເຂົາອາດຈະຕັດສິນໃຈເຮັດວຽກໃດວຽກໜຶ່ງທີ່ບໍ່ມີຜົນປະໂຫຍດໃຫ້ແກ່ຕົນເອງ, ຍິ່ງໄປກວ່ານັ້ນເຂົາຍອມເສຍສະຫລະທຸກຢ່າງເພື່ອສ່ວນລວມ, ເຂົາມັກປະພຶດດ້ວຍຄວາມເດັດຂາດ ແຕ່ມັກປ່ຽນແປງ.
ຄົນທີ່ມີໝວດເລືອດ AB ມັກຈະໄດ້ຮັບຜົນກະທົບຈາກສະພາບແວດລ້ອມພາຍນອກ, ເປັນຄົນໃຈຮ້າຍ ແລະ ມັກຫງວມເຫງົາ. ຕາມທັດສະນະຂອງຄົນຍີ່ປຸ່ນແລ້ວ ແມ່ນບໍ່ມັກຄົນປະເພດນີ້. ອີງຕາມການສຳຫລວດຢູ່ໃນບໍລິສັດຕ່າງໆຂອງຍີ່ປຸ່ນໃຫ້ເຫັນວ່າ ບໍ່ມີໃຜມັກເຮັດວຽກຮ່ວມກັບຄົນປະເພດນີ້. ຄົນທີ່ມີໝວດເລືອດ AB ມັກຈະເກັ່ງໃນເລື່ອງເກັບມ້ຽນ, ສຳເນົາເອກະສານ ແລະ ງານວິໄຈ. ໝວດເລືອດ AB ແມ່ນໝວດເລືອດຂອງນັກວິເຄາະ, ນັກວິຈານເປັນສ່ວນໃຫຍ່.
ການປະສົມປະສານກັນລະຫວ່າງໝວດເລືອດ:
A+A: ສອງຄົນທີ່ມີນິໄສແບບດຽວກັນ ເຂົາເຈົ້າມັກຈະເຫັນອົກເຫັນໃຈ ແລະ ສ້າງເງື່ອນໄຂໃຫ້ກັນ ແລະ ກັນໃນເວລາມີການພົວພັນກັນ.
A+O: ຜູ້ທີ່ມີໝວດເລືອດ A ເປັນຄົນສະດຸ້ງໄວ, ຄົນທີ່ມີໝວດເລືອດ O ຊ້ຳພັດເປັນຄົນບໍ່ມັກໃສ່ໃຈກັບສິ່ງເລັກໆນ້ອຍໆ. ສະນັ້ນ ມັກຈະເຄັ່ງຕຶງ ແລະ ຖືກກົດດັນໃນເມື່ອຢູ່ນຳກັນ.
A+B: ທັງຜູ້ມີໝວດເລືອດ A ແລະ B ລ້ວນແຕ່ເປັນຄົນເພີດເພີນໄປຕາມອັນສະເພາະຂອງໃຜລາວ. ຜູ້ທີ່ມີໝວດເລືອດ B ບໍ່ມີຄວາມສະບາຍໃຈກັບການຫລົງໆລືມໆຂອງຜູ້ທີ່ມີໝວດເລືອດ A.
A+AB: ນິໄສຂອງຄົນທີ່ມີໝວດເລືອດ AB ຂຶ້ນຢູ່ກັບຊັດສ່ວນຂອງ A ແລະ B. ຊັດສ່ວນໃດເດັ່ນກວ່າຈະສົ່ງຜົນສະທ້ອນເຖິງສາຍສຳພັນລະຫວ່າງສອງຄົນວ່າຈະຖືກຕ້ອງປອງດອງ ແລະ ເຂົ້າຫາກັນໄດ້ ຫລື ບໍ່. ສ່ວນໃຫຍ່ເຂົາເຈົ້າສາມາດຮັກສາສາຍສຳພັນນຳກັນໄດ້ດີ.
O+O: ຄວາມຈິງໃຈຂອງໝວດເລືອດ O ມີສູງ ແຕ່ໃຫ້ສອງຄົນມາຢູ່ນຳກັນແມ່ນຈະບໍ່ຖືກກັນ ເພາະເຂົາເຈົ້າບໍ່ມີຄວາມອົດກັ້ນເຊິ່ງກັນ ແລະ ກັນ.
O+B: ຄົນໝວດເລືອດ O ເປັນຄົນມີຄວາມອົດທົນ, ເບີກບານມ່ວນຊື່ນ ໃຈກວ້າງຂວາງດີ, ມີຄວາມເປັນອິດສະຫລະພາບ, ມີຄວາມສຳພັນທີ່ດີ.
O+AB: ລັກສະນະງ່າຍດາຍ ແລະ ບໍລິສຸດຂອງຄົນທີ່ມີໝວດເລືອດ O ອາດຈະພົບຄວາມສັບສົນໃນເມື່ອຫາກມີການພົວພັນກັບຄົນທີ່ມີໝວດເລືອດ AB ເຊິ່ງເປັນຄົນໃນຕົວ ແລະ ສັບສົນ ແຕ່ຄົນທີ່ມີໝວດເລືອດ O ຈະມີຄວາມອົດທົນ ແລະ ຈະກາຍເປັນເພື່ອນທີ່ດີໄດ້, ພ້ອມທີ່ຈະຊ່ວຍເຫລືອ AB ໃນເວລາພົບຄວາມຫຍຸ້ງຍາກ.
B+B: ສອງຄົນນີ້ມີຄວາມັກຮັກຄ້າຍຄືກັນ ແລະ ອາດເປັນເພື່ອນທີ່ດີນຳກັນໄດ້, ແຕ່ຖ້າຫາກເຂົ້າກັນບໍ່ໄດ້ກໍຈະເກີດມຫັນຕະໄພໄດ້.
B+AB: ສອງນິໄສນີ້ຮູ້ເຄົາລົບເຊິ່ງກັນ ແລະ ກັນ. ສອງຄົນນີ້ອາດມີສາຍສຳພັນທີ່ດີນຳກັນ ຂໍແຕ່ຢ່າລ່ວງເກີນຄວາມເປັນສ່ວນຕົວຂອງກັນ ແລະ ກັນ.
AB+AB: ອັນນີ້ເປັນໝວດເລືອດທີ່ຫາຍາກ, ຖ້າສອງຄົນຢູ່ໃນໝວດນີ້ພົບກັນຈະມີຄວາມສຳພັນທີ່ແຂງແກ່ນ. ການເຫັນອົກເຫັນໃຈເຊິ່ງກັນ ແລະ ກັນນັ້ນຈະເຮັດໃຫ້ເຂົາເຈົ້າມີຄວາມຮັກແພງກັນຫລາຍຂຶ້ນກວ່າເກົ່າ.
