ຫວຽດນາມຫ້າມໂບອິ້ງ 737 ແມັກຜ່ານນ່ານຟ້າ
ກົມການບິນພົນລະເຮືອນຫວຽດນາມ (CAAV) ຕັດສິນໃຈສັ່ງປິດນ່ານຟ້າເພື່ອຫ້າມບໍ່ໃຫ້ເຮືອບິນໂບອິ້ງ 737 ແມັກ ບິນຜ່ານນັບແຕ່ເວລາ 10:00 ໂມງ ຕາມເວລາທ້ອງຖິ່ນວັນທີ 13 ມີນາ, ຫລັງຈາກເຮືອບິນຮຸ້ນດັ່ງກ່າວຂອງສາຍການບິນເອທິໂອປີ ແອລາຍ ປະສົບອຸປະຕິເຫດຕົກ ໃນວັນທີ 10 ມີນາ ຈົນເປັນເຫດໃຫ້ຜູ້ໂດຍສານ ແລະ ຈຸບິນລວມ 157 ຄົນເສຍຊີວິດທັງໝົດ.
ກົມການບິນພົນລະເຮືອນຫວຽດນາມອອກປະກາດໃນເວັບໄຊວ່າ: ຫລັງຈາກທີ່ໄດ້ມີການຕີລາຄາຂໍ້ມູນກ່ຽວກັບການໃຫ້ບໍລິການເຮືອບິນໂບອິ້ງ 737 ແມັກ ເພື່ອເປັນການສ້າງຫລັກປະກັນດ້ານຄວາມປອດໄພ CAAV ຈຶ່ງຕັດສິນໃຈບໍ່ອະນຸຍາດໃນການມອບສິດໃໝ່ ລວມທັງໂຈະໃບອະນຸຍາດການບິນສຳລັບຖ້ຽວບິນທີ່ໃຊ້ເຮືອບິນໂບອິ້ງ 737 ແມັກ ເໜືອນ່ານຟ້າຫວຽດນາມ. ຄຳສັ່ງນີ້ຈະມີຜົນບັງຄັບໃຊ້ໃນເວລາ 10:00 ໂມງ ຕາມເວລາທ້ອງຖິ່ນ ວັນທີ 13 ມີນາ 2019 ຈົນກວ່າຈະມີປະກາດໃໝ່.
ກ່ອນໜ້ານີ້ ສຳນັກງານຄວາມປອດໄພດ້ານການບິນເອີຣົບ (ອີຊາ) ໄດ້ຕັດສິນຢຸດການໃຫ້ບໍລິການເຮືອບິນໂບອິ້ງ 737 ແມັກ ທັງໝົດໃນເອີຣົບ ເຊິ່ງລວມທັງເຮືອບິນໂບອິ້ງ 737 ແມັກ 8 ແລະ ເຮືອບິນໂບອິ້ງ 737 ແມັກ 9.
