ເປີດງານສັບປະດາ ແມ່ນໍ້າຂອງ-ແມ່ນໍ້າລ້ານຊ້າງ ປະຈໍາປີ 2019

ໃນວັນທີ 14 ມີນານີ້, ກົມເສດຖະກິດ ກະຊວງການຕ່າງປະເທດ ໃນນາມກອງເລຂາແຫ່ງຊາດແມ່ນໍ້າຂອງ-ແມ່ນນໍ້າລ້ານຊ້າງ ຮ່ວມກັບ ສະຖານເອກອັກຄະລັດຖະທູດ ສປ ຈີນ ປະຈໍາລາວ, ໄດ້ຈັດງານສັບປະດາ ແມ່ນໍ້າຂອງ-ແມ່ນໍ້າລ້ານຊ້າງ ປະຈໍາປີ 2019,  ຂຶ້ນຢູ່ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ທອງຜ່ານ ສະຫວັນເພັດ ຮອງລັດຖະມົນຕີ ກະຊວງການຕ່າງປະເທດ, ທ່ານ ຈຽງ ຈາຍຕົງ ເອກອັກຄະລັດຖະທູດ ສປ ຈີນ ປະຈໍາລາວ, ມີບັນດາຜູ້ຕາງໜ້າຈາກປະເທດສະມາຊິກ ແມ່ນນໍ້າຂອງ-ແມ່ນໍ້າລ້ານຊ້າງ (ກຳປູເຈຍ, ຈີນ, ລາວ, ມຽນມາ, ໄທ ແລະ ຫວຽດນາມ) ເຂົ້າຮ່ວມນໍາດ້ວຍ.

ທ່ານ ທອງຜ່ານ ສະຫວັນເພັດ ໃຫ້ຮູ້ວ່າ: ການຈັດງານຄັ້ງນີ້ ເພື່ອສືບຕໍ່ຈັດຕັ້ງປະຕິບັດຜົນຂອງກອງປະຊຸມຜູ້ນໍາແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2, ພ້ອມທັງເປັນການສະເຫຼີມສະຫຼອງວັນສ້າງຕັ້ງຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄົບຮອບ 3 ປີ ແລະ ທັງເປັນການເຜີຍແຜ່ຄວາມຮູ້ກ່ຽວກັບຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໃຫ້ບັນດາກະຊວງຂະແໜງການ, ສະຖາບັນຄົ້ນຄວ້າ, ນັກສຶກສາ ແລະ ສື່ມວນຊົນເຂົ້າຮ່ວມ. ນອກນັ້ນ, ຍັງເປັນການເພີ່ມທະວີ ຮັດແໜ້າການພົວພັນຮ່ວມມື, ແລກປ່ຽນວັດທະນາທໍາ ແລະ ຊຸກຍູ້ການທ່ອງທ່ຽວ ລະຫວ່າງ ປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງອີກດ້ວຍ.

ໃນງານສັບປະດາ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງນີ້, ປະກອບມີກິດຈະກໍາຕ່າງໆເຊັ່ນ: ປາຖະກະຖາກ່ຽວກັບໂອກາດ ແລະ ສິ່ງທ້າທາຍຂອງຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ, ປະກວດຮູບຖ່າຍກ່ຽວກັບວັດທະນາທໍາ ແລະ ເອກະລັກຂອງປະເທດສະມາຊິກ ແມ່ນໍ້າຂອງ-ແມ່ນໍ້າລ້ານຊ້າງ, ສາຍຮູບເງົາສາລະຄະດີເລື່ອງສັ້ນ ກ່ຽວກັບວັດທະນາທໍາ ແລະ ການທ່ອງທ່ຽວຂອງປະເທດສະມາຊິກ.