ໄຟໄໝ້ປ່າສະຫງວນພູພະນັງອາດເກີດຈາກການຈູດໄຮ່, ຈູດສວນ ແລະ ດັງໄຟແຕ່ງຢູ່ຄົວກິນໃນປ່າ
ທ່ານເຈົ້າເມືອງສັງທອງ ໃຫ້ຮູ້ວ່າ: ພາຍຫລັງເກີດເຫດໄຟໄໝ້ປ່າສະຫງວນແຫ່ງຊາດພູພະນັງ,
ເມືອງສັງທອງນະຄອນຫລວງວຽງຈັນ ແຕ່ວັນທີ 7 ມີນາ ມານີ້,
ອົງການປົກຄອງເມືອງສັງທອງ ແລະ ກຳລັງ ປກສ, ປກຊ ພ້ອມດ້ວຍ ປະຊາຊົນເຂດໃກ້ຄຽງໄດ້ຮ່ວມກັນມອດໄຟຢ່າງເປັນເຈົ້າການ, ຂະນະທີ່ມາຮອດປັດຈຸບັນສາມາດຄວບຄຸມໄຟໄດ້ກ່ວາ 90%.
ທ່ານເຈົ້າເມືອງສັງທອງ
ໃຫ້ຮູ້ວ່າ:
ສາເຫດຕົ້ນຕໍຂອງການເກີດໄຟໄໝ້ລາມປ່າດັ່ງກ່າວ,
ແມ່ນຍ້ອນປະຊາຊົນຈໍານວນໜຶ່ງຈູດໄຮ່ ແລະ ສວນຢ່າງຂາດສະຕິ ລະມັດລະວັງ, ໂດຍບໍ່ໄດ້ເຮັດແລວປ້ອງກັນໄຟໄວ້ກ່ອນຈິ່ງຈູດ ແລະ ຈູດແລ້ວ ແຕ່ບໍ່ມອດໄຟ. ປັດຈຸບັນກໍາລັງເລັ່ງສືບສວນ-ສອບສວນຫາຜູ້ທີ່ຈູດປ່ານັ້ນມາດຳເນີນຄະດີຕາມລະບຽບກົດໝາຍ. ໄຟໄໝ້ປ່າສະຫງວນດັ່ງກ່າວມີ 2 ຈຸດໃຫຍ່ຄື:
ເຂດບ້ານເພຍລາດ, ບ້ານທ່ານາຂາມມີປະມານ 20
ເຮັກຕາ ແລະ ປ່າເຂດບ້ານຫີນສິ່ວ, ບ້ານໄຮ່ໃຕ້ມີ 10
ເຮັກຕາ. ນອກນີ້, ຍັງໄໝ້ລາມໄປຫາປ່າເຂດພູຜາເດືອນມີປະມານ 30 ເຮັກຕາ,
ດອນຫໍບ້ານອ່າງນ້ອຍ 15 ເຮັກຕາ,
ບ້ານຊໍ້ 10 ເຮັກຕາ ແລະ
ບ້ານຫ້ວຍຫາງ 10
ເຮັກຕາ, ແຕ່ດ້ວຍຄວາມເອົາໃຈໃສ່ຂອງຫລາຍພາກສ່ວນໃນການສະກັດກັ້ນແຕ່ຫົວທີນັ້ນມາຮອດປັດຈຸບັນ, ສາມາດດັບມອດໄຟໄດ້ແລ້ວ 90% ແລະ ກໍເຫລືອພຽງແຕ່ຕໍໄມ້ໄໝ້ເທົ່ານັ້ນທີ່ຍັງບໍ່ສາ ມາດເອົານໍ້າຂຶ້ນໄປຫົດໄດ້, ແນວໃດກໍຕາມ ຂໍຮຽກຮ້ອງປະຊາຊົນຈົ່ງມີສະ ຕິລະມັດລະວັງການໃຊ້ຟືນໄຟໃນການທຳມາຫາກິນ, ກໍຄືການຈູດໄຮ່-ຈູດສວນ, ເຊິ່ງຕ້ອງໄດ້ປ້ອງກັນຢ່າງປອດໄພເພື່ອບໍ່ໃຫ້ໄຟໄໝ້ລາມໄປເປັນບໍລິເວນກວ້າງ, ຊຶ່ງຈະສ້າງຄວາມເສຍຫາຍຕໍ່ປ່າໄມ້, ສິ່ງແວດລ້ອມ ກໍຄືລະບົບນິເວດວິທະຍາຂອງບ້ານເມືອງເຮົາ.
