ຄົນນັບລ້ານໃນມະນິລາຜະເຊີນ ບັນຫາຂາດເຂີນນ້ຳຮຸນແຮງທີ່ສຸດ
ນະຄອນຫລວງມະນິລາຂອງຟີລິບປິນຜະເຊີນວິກິດຂາດເຂີນນ້ຳຮຸນແຮງທີ່ສຸດໃນຮອບຫລາຍປີ ເຮັດໃຫ້ຫລາຍຄອບຄົວຕ້ອງຫາພາຊະນະມາລໍຖ້າຕໍ່ແຖວ ເພື່ອຮັບປັນສ່ວນນ້ຳຈາກລົດບັນທຸກນ້ຳ, ສ່ວນຢູ່ໂຮງໝໍບາງແຫ່ງຮອງຮັບສະເພາະຄົນໄຂ້ສຸກເສີນເທົ່ານັ້ນ.
ໃນແຕ່ລະວັນທໍ່ປະປາບໍ່ມີນ້ຳໄຫລເປັນເວລາແຕ່ 4-20 ຊົ່ວໂມງຕາມເຮືອນກວ່າເຄິ່ງໜຶ່ງຂອງນະຄອນຫລວງມະນິລາທີ່ມີປະຊາກອນ 12 ລ້ານຄົນ ເນື່ອງຈາກບໍ່ມີຝົນຕົກ ແລະ ລະບົບສາທາລະນຸປະໂພກບໍ່ພຽງພໍ, ສະພາບຂາດເຂີນນ້ຳໃນເມືອງຫລວງຂອງຟີລິບປິນມີມາແຕ່ທ້າຍອາທິດຜ່ານມາ, ບາງພື້ນທີ່ເບື້ອງຕາເວັນອອກຂອງເມືອງຫລວງວິກິດໜັກເຖິງຂັ້ນບໍ່ມີນ້ຳໄຫລອອກມາ, ບໍລິສັດນ້ຳປະປາມະນິລາ ເຊິ່ງເປັນໜຶ່ງໃນສອງຜູ້ໃຫ້ບໍລິການໃນເມືອງຫລວງຟີລິບປິນ ຖະແຫລງວ່າ: ຈະໃຊ້ແຜນຕັດການສົ່ງນ້ຳໃຫ້ເທົ່າທຽມກັນໃນທຸກພື້ນທີ່ຂອງນະຄອນຫລວງມະນິລາ ເພື່ອປັນສ່ວນນ້ຳໃຫ້ທົ່ວເຖິງ. ອຳນວຍການບໍລິສັດນ້ຳປະປາມະນິລາ ກ່າວວ່າ: ຄັ້ງນີ້ເປັນວິກິດຂາດເຂີນນ້ຳຄັ້ງຮຸນແຮງທີ່ສຸດຂອງນະຄອນຫລວງມະນິລາ ໂດຍໃນປີຜ່ານມາ ເກີດບັນຫາຮຸນແຮງເຊັ່ນກັນ, ແຕ່ມີຝົນຕົກໜັກເຮັດໃຫ້ຫລຸດພົ້ນວິກິດໄປໄດ້, ຄາດກັນວ່າສະພາບຂາດເຂີນນ້ຳຈະມີໄປຈົນເຖິງເດືອນກໍລະກົດ ເຊິ່ງຈະເປັນໄລຍະເຂົ້າສູ່ລະດູຝົນ.
