ຍັງມີເຈົ້າຂອງພາຫະນະຈຳນວນຫລາຍບໍ່ທັນເສຍຄ່າທາງປະຈຳປີ 2019
ຮອງຫົວໜ້າພະແນກສ່ວຍສາອາກອນນະຄອນຫລວງວຽງຈັນ ໃຫ້ຮູ້ວ່າ: ພາຍຫລັງໄດ້ປະກາດແຈ້ງໃຫ້ບຸກຄົນ, ນິຕິບຸກຄົນ ແລະ ອົງການຈັດຕັ້ງຕ່າງໆທີ່ເປັນເຈົ້າຂອງພາຫະນະມາເສຍຄ່າທາງປະຈຳປີ 2019 ນັບແຕ່ຕົ້ນປີມານີ້, ມາຮອດປັດຈຸບັນປາກົດວ່າມີເຈົ້າຂອງພາຫະນະໄດ້ມາເສຍຄ່າທາງພຽງແຕ່ຈຳນວນແສນກວ່າຄັນເທົ່ານັ້ນ (ຈາກຈຳນວນທັງໝົດ 4 ແສນກວ່າຄັນ) ແລະ ໄດ້ເງິນຈາກການເກັບຄ່າທາງແລ້ວ 18 ຕື້ກວ່າກີບ ໃນນີ້ລົດຈັກກວມເປັນສ່ວນໃຫຍ່ ແລະ ລົດສ່ວນບຸກຄົນກວມເປັນສ່ວນຫລາຍ. ແນວໃດກໍຕາມ, ເຈົ້າຂອງພາຫະນະທີ່ຍັງບໍ່ທັນມາເສຍຄ່າທາງປີນີ້ຍັງມີຈຳນວນກວ່າ 3 ແສນຄັນ ຖ້າກາຍວັນທີ 1 ເມສາເປັນຕົ້ນໄປແມ່ນຈະຖືກປັບໄໝໃນອັດຕາ 0,1% ຕໍ່ວັນຂອງມູນຄ່າເສຍຄ່າທາງແຕ່ລະປະເພດລົດ. ສຳລັບກໍລະນີເຈົ້າຂອງລົດຫາກຍັງບໍ່ທັນໄດ້ເສຍຄ່າທາງໃນປີຜ່ານມານັ້ນ ນອກຈາກໄດ້ເສຍຄືນຢ້ອນຫລັງໃນອັດຕາທີ່ກຳນົດໄວ້ແລ້ວ ຍັງຈະຖືກປັບໄໝ 60% ຂອງອັດຕາປີ 2017 ແລະ 40% ຂອງອັດຕາປີ 2018 ອີກດ້ວຍ.
ພະແນກດັ່ງກ່າວ ໃຫ້ຮູ້ວ່າ: ໃນປີ 2017 ແລະ 2018 ມີເຈົ້າຂອງລົດມາເສຍຄ່າທາງພຽງ 50% ຂອງຈຳນວນພາຫະນະທັງໝົດ ໄດ້ລາຍຮັບເກືອບ 60 ຕື້ກີບຂອງແຕ່ລະປີ. ສະນັ້ນ ຖ້າຫາກເຈົ້າຂອງພາຫະນະປະເພດຕ່າງໆມາເສຍຄ່າທາງຄົບທັງໝົດກໍຈະເຮັດໃຫ້ການເກັບລາຍຮັບຈາກວຽກງານດັ່ງກ່າວໄດ້ຫລາຍຂຶ້ນກວ່າເກົ່າ.
