ວິທີຫລຸດອາການເຈັບຫົວຢ່າງໄດ້ຜົນ

     ການກິນຢາແກ້ປວດ ຫລື ພາຣາເຊຕາໂມນຕະຫລອດນັ້ນບໍ່ດີຕໍ່ການເຮັດວຽກຂອງຮ່າງກາຍ. ມື້ນີ້ພວກເຮົາຈຶ່ງນຳເອົາວິທີຊ່ວຍຫລຸດຜ່ອນ ອາການເຈັບຫົວໄດ້ທັນທີມາແນະນຳທ່ານ.

     – ໃຊ້ອຸນຫະພູມບຳບັດ : ການອາບນຳ້ອຸ່ນຊ່ວຍຜ່ອນຄາຍອາການເກັງຂອງກ້າມຊີ້ນ ແລະ ສາມາດຫລຸດອາການເຈັບຫົວໄດ້, ແຕ່ຫາກບໍ່ສາມາດອາບນຳ້ໄດ້ ສາມາດໃຊ້ການປະຄົບຮ້ອນແທນໄດ້.

     – ອະໂຣມ່າ : ອະໂຣມ່າ ຫລື ນຳ້ມັນຫອມລະເຫີຍ ກິ່ນລາເວັນເດີ ຊ່ວຍຫລຸດອາການເຈັບຫົວໄດ້ ຄວນນວດອະໂຣມ່າຕັ້ງແຕ່ບໍລິເວນໜ້າຜາກໄລ່ລົງມາ ແລະ ຄວນນວດໃນຫ້ອງທີ່ມີແສງສະຫວ່າງອ່ອນໆ ແລະ ມິດງຽບ ເພື່ອຄວາມຜ່ອນຄາຍທີ່ດີສຸດ ນອກຈາກນີ້ ຈາກການວິໄຈຂອງ Shiraz University ພົບວ່າ ນຳ້ມັນເປບເປີມິ້ນ ຊ່ວຍຫລຸດອາການເຈັບຫົວໄມເກຣນໄດ້ນຳ.

     – ດື່ມນຳ້ : ການສູນເສຍນຳ້ໃນຮ່າງກາຍ ເປັນສາເຫດຂອງການເຈັບຫົວ ຫາກຈະປ້ອງກັນ ຫລື ຫລຸດຜ່ອນອາການເຈັບຫົວ ຈຶ່ງບໍ່ຄວນໃຫ້ຮ່າງກາຍສູນເສຍນຳ້ຈົນເກີນໄປ ໂດຍການດື່ມນຳ້ທົດແທນ.

     – ໃຊ້ພືດສະໝຸນໄພ : ຂີງ ເປັນພືດສະໝຸນໄພທີ່ຮູ້ກັນດີຢູ່ແລ້ວວ່າສາມາດຊ່ວຍຫລຸດຜ່ອນອາການເຈັບຫົວໄດ້ ລວມໄປເຖິງໄມເກຣນໄດ້ ທ່ານສາມາດດື່ມໂດຍປະສົມຂີງບົດໃສ່ນຳ້ດື່ມ.

     – ນວດມື ບໍລິເວນລະຫ່ວາງນິ້ວໂປ້ ແລະ ນິ້ວຊີ້ :  ການນວດບໍລິເວນດັ່ງກ່າວຈະຊ່ວຍຫລຸດຄວາມເຄັ່ງຄຽດຂອງຫົວ ແລະ ກ້າມຊີ້ນຄໍ ເຊິ່ງກ່ຽວຂ້ອງກັບອາການເຈັບຫົວ.

    – ນວດບໍລິເວນງ່ອນ : ການກົດຈຸດບໍລິເວນງ່ອນ ລະຫ່ວາງກ້າມຊີ້ນຄໍໃນທ່າຕັ້ງ ເຊິ່ງເປັນຖານຂອງກະໂຫລກ ຈະຊ່ວຍຫລຸດອາການເຈັບຫົວທີ່ເກີດຈາກຄວາມເຄັ່ງຄຽດຢູ່ຄໍ ນອກຈາກນີ້ ຍັງຊ່ວຍຫລຸດອາການເຈັບຫົວໄມເກຣນໄດ້ນຳ.

     – ກົດບໍລິເວນລະຫ່ວາງກາງຄິ້ວ: ການນວດກົດຈຸດບໍລິເວນກາງລະຫ່ວາງຄິ້ວສອງເບື້ອງ ຈະຊ່ວຍຫລຸດອາການເຈັບຫົວທີ່ເກີດຈາກການປວດຕາ ແລະ ໄຊນັສຜົ້ງດັງໄດ້ ບີບກົດເລື້ອຍໆຈົນກ່ວາອາການຈະດີຂຶ້ນ.

     – ນວດບໍລິເວນກົກບ່າໄຫລ່ ຫລື ສະບັກຫລັງ : ຊ່ວຍຫລຸດອາການເກັງກ້າມຊີ້ນຄໍ ແລະ ບ່າໄຫລ່ ຊ່ວຍຫລຸດອາການເຈັບຫົວໄດ້ ໃຊ້ນິ້ວໂປ້ນວດເປັນວົງມົນ ແລະ ອອກແຮງກົດໃສ່ບໍລິເວນກົກບ່າ ຫລື ສະບັກຫລັງ ເປັນເວລາ 1 ນາທີ ເຮັດຊຳ້ແບບເກົ່າອີກເບື້ອງໜຶ່ງ.

     – ນວດຂະໝັບ: ການນວດຂະໝັບທັງສອງເບື້ອງຈະຊ່ວຍຫລຸດອາການເຈັບຫົວທີ່ກ່ຽວຂ້ອງກັບໄມເກຣນ ໃຊ້ນິ້ວຊີ້ ແລະ ນິ້ວກາງກົດເບົາໆບໍລິເວນຂະໝັບທັງສອງເບື້ອງຈົນກ່ວາອາການຈະດີຂຶ້ນ.