ຜູ້ເສຍຊີວິດນ້ຳຖ້ວມຢູ່ແຂວງປາປົວ ຂອງອິນໂດເນເຊຍເພີ່ມເກີນ 70 ຄົນ

       ຈຳນວນຜູ້ເສຍຊີວິດຈາກເຫດນ້ຳຖ້ວມກະທັນຫັນ ຢູ່ແຂວງປາປົວ ທາງຕາເວັນອອກຂອງອິນໂດເນເຊຍ ເຊິ່ງເກີດຂຶ້ນໃນອາທິດຜ່ານມາ ເພີ່ມເປັນຫລາຍກວ່າ 70 ຄົນ.

       ສຳນັກຂ່າວຕ່າງປະເທດລາຍງານວ່າ: ສຳນັກງານບໍລິຫານຈັດການໄພພິບັດແຫ່ງຊາດ (BNPB) ລາຍງານໃນວັນທີ 17 ມີນາວ່າ: ຈຳນວນຜູ້ເສຍຊີວິດຈາກອຸທົກກະໄພກະທັນຫັນ ຢູ່ແຂວງປາປົວ ທາງຕາເວັນອອກຂອງປະເທດ ເຊິ່ງເກີດຂຶ້ນໃນທ້າຍອາທິດຜ່ານມາ ເພີ່ມເປັນຫລາຍກວ່າ 70 ຄົນ, ແຕ່ມີຜູ້ໄດ້ຮັບບາດເຈັບອີກຫລາຍກວ່າ 70 ຄົນເຊັ່ນກັນ, ແຕ່ຍັງບໍ່ມີຜູ້ສູນຫາຍທີ່ຕາມລາຍງານຢ່າງເປັນທາງຢູ່ທີ່ 63 ຄົນ ແລະ ປະຊາຊົນຫລາຍກວ່າ 4.000 ຄົນຕ້ອງອົບພະຍົບ.

        ເຖິງຢ່າງໃດກໍຕາມ, ທ່ານ ຊູໂຕໂປ ປູຣໂວ ນູໂກຣໂຮ ໂຄສົກຂອງ BNPB ຍອມຮັບວ່າ: ການລົງພື້ນທີ່ຂອງເຈົ້າໜ້າທີ່ເພື່ອສົ່ງມອບການຊ່ວຍເຫລືອເປັນໄປຢ່າງລຳບາກ ເນື່ອງຈາກເກີດດິນເຈື່ອນ ແລະ ຕົ້ນໄມ້ຫັກປິດກັ້ນຖະໜົນສາຍສຳຄັນ. ໃນເວລາດຽວກັນ ລະດັບນ້ຳສູງ ແລະ ໄຫລຊຸໄດ້ທຳລາຍຂົວສາຍສຳຄັນແຫ່ງໜຶ່ງ ແລະ ມີເຮືອນຫລາຍກວ່າ 300 ຫລັງຕ້ອງຈົມຢູ່ໃຕ້ລະດັບນ້ຳສູງກວ່າ 1 ແມັດ ໂດຍສະເພາະຢູ່ເຂດໂດໂຍ, ສ່ວນລັດຖະບານປະກາດສະຖານະການສຸກເສີນຢູ່ແຂວງປາປົວເປັນເວລາ 14 ວັນ ເລີ່ມແຕ່ວັນທີ 17 ມີນາເປັນຕົ້ນໄປ.