ໂບອິ້ງກຳລັງສະຫລຸບເລື່ອງປັບປຸງຊັອບແວ ປັບປຸງແຜນອົບຮົມເຮືອບິນ 737 ແມັກ
ໂບອິ້ງກຳລັງສະຫລຸບເລື່ອງການປັບປຸງຊັອບແວ ແລະ ການປັບປຸງການຝຶກອົບຮົມນັກບິນສຳລັບເຮືອບິນຮຸ້ນ 737 ແມັກ ທີ່ຕົກມາແລ້ວ 2 ລຳ ພາຍໃນເວລາຫ່າງກັນບໍ່ຮອດ 5 ເດືອນ ແລະ ຖືກຫ້າມບິນທົ່ວໂລກໃນປັດຈຸບັນ.
ໂບອິ້ງຖະແຫລງໃນເວັບໄຊວ່າ: ເປັນການປັບປຸງເພື່ອແກ້ໄຂວິທີການທີ່ລະບົບຄວບຄຸມການບິນຂອງເຮືອບິນ MCAS ຕອບສະໜອງຕໍ່ການປ້ອນຂໍ້ມູນເຊັນເຊີທີ່ຜິດພາດ ໂດຍລະບຸວ່າ: ບໍລິສັດໄດ້ດຳເນີນການເລື່ອງປັບປຸງຊັອບແວລະບົບ ແລະ ໜ້າຈໍສະແດງຜົນໃຫ້ນັກບິນມາໂດຍຕະຫລອດ ນັບແຕ່ເກີດເຫດສາຍການບິນໄລອອນແອຕົກໃນທະເລຊະວາເມື່ອທ້າຍປີກ່ອນ ລວມທັງການປັບປຸງການຝຶກອົບຮົມນັກບິນນຳອີກ. ໂຄສົກສະຫະພາບນັກບິນ ສາຍການບິນອາເມລິກາແອລາຍ ແລະ ນັກບິນທີ່ຂັບເຮືອບິນຮຸ້ນນີ້ ເປີດເຜີຍວ່າ: ແນວຄິດໜຶ່ງໃນການປັບປຸງການຝຶກອົບຮົມນັກບິນຄື: ເພີ່ມການສອນທາງໄອແພດ 10-15 ນາທີ, ເລື່ອງການເຮັດວຽກຂອງຊັອບແວໃໝ່. ຂະນະທີ່ແຫລ່ງຂ່າວຄາດວ່າ: ຈະຍັງບໍ່ມີການກຳນົດເລື່ອງການຝຶກອົບຮົມໃໝ່ຢ່າງຈະແຈ້ງຈົນກວ່າຈະແກ້ໄຂບັນຫາຊັອບແວໄດ້ ແລະ ເຊື່ອວ່າໂບອິ້ງຈະເປີດເຜີຍຊັອບແວທີ່ປັບປຸງໃໝ່ແລ້ວພາຍໃນ 7-10 ວັນ.
ສ່ວນເອທິໂອປີຖະແຫລງໃນວັນທີ 17 ມີນາວ່າ: ຜົນການວິເຄາະເບື້ອງຕົ້ນກັບດຳ 2 ກັບ ຂອງເຮືອບິນສາຍການບິນເອທິໂອປີແອລາຍທີ່ຕົກຫລັງບິນຂຶ້ນຈາກສະໜາມບິນໄດ້ບໍ່ເທົ່າໃດນາທີ ເສຍຊີວິດທັງໝົດ 157 ຄົນ ໃນວັນທີ 10 ມີນານີ້ ມີຄວາມຄ້າຍຄືຢ່າງຈະແຈ້ງກັບເຫດເຮືອບິນໄລອອນແອຂອງອິນໂດເນເຊຍຕົກໃນວັນທີ 29 ຕຸລາ ເສຍຊີວິດທັງໝົດ 189 ຄົນ.
