ຫວຽດນາມກຳລັງຝຶກຊ້ອມ ຮັບມືກັບພະຍາດໝູຢ່າງໜັກ

      ອີງຕາມຂ່າວສານ vnexpressnews ລົງວັນທີ 18/3/2019 ໃຫ້ຮູ້ວ່າ: ຫວຽດນາມກຳລັງຈັດຕັ້ງການຝຶກຊ້ອມຮັບມືກັບພະຍາດໝູອາຟຣິກາຢ່າງໜັກ ໂດຍບັນດາເຈົ້າໜ້າທີ່ກ່ຽວຂ້ອງໄດ້ຈັດຕັ້ງປະຕິບັດວິທີການຮັບມືແບບຈຳລອງຢ່າງກະທັນຫັນຄື: ລາຍງານສະພາບການຂອງພະຍາດ, ເອົາຕົວຢ່າງພະຍາດ, ກຳນົດເຂດເກີດພະຍາດ, ປິດເສັ້ນທາງເຂົ້າ-ອອກໃນເຂດເກີດພະຍາດຕະຫລອດ 24 ຊົ່ວໂມງ, ຈັດຕັ້ງໜ່ວຍກວດກາ 2 ໜ່ວຍຂຶ້ນທັນທີ ເພື່ອປຸກລະດົມ ແລະ ຕິດຕາມການລະບາດຂອງພະຍາດດັ່ງກ່າວຢູ່ແຕ່ລະບ້ານ, ໃຊ້ໂທລະໂຄ່ງຂອງບ້ານເພີ່ມລາຍການອອກອາກາດ ເພື່ອປຸກລະດົມການຕ້ານພະຍາດໝູອາຟຣິກາໃຫ້ມີປະສິດທິຜົນສູງ.

       ຈັດຕັ້ງໜ່ວຍງານ “ຕອບໂຕ້ໄວ” ເຊິ່ງປະກອບດ້ວຍພະນັກງານຈາກກົມສັດຕະວະແພດ, ໜ່ວຍງານປະຈຳຮາກຖານ ເຊິ່ງທັງໝົດໄດ້ປະກອບອຸປະກອນ ແລະ ເຄື່ອງມືຢ່າງພຽງພໍ ເພື່ອຕະຫລຸມບອນເຂົ້າຫາຈຸດເກີດເຫດ, ພະນັກງານແຕ່ລະຄົນຈະໃສ່ຊຸດປ້ອງກັນຄວາມປອດໄພ. ໃນການປະຕິບັດໜ້າທີ່ເຮັດທົດລອງໃນຄັ້ງນີ້ຢູ່ໃນເຂດພະຍາດເກີດຂຶ້ນ ເຊິ່ງປັດຈຸບັນໄດ້ພົບເຫັນໝູຫລາຍກວ່າ 100 ໂຕຕິດພະຍາດ ແລະ ຖືກທຳລາຍຖິ້ມ, ລົງສີດຢາໃສ່ບ່ອນທີ່ເກີດພະຍາດ ແລະ ຂອບເຂດໃກ້ຄຽງ. ພາຍຫລັງພະນັກງານສັດຕະວະແພດສີດຢາຂ້າເຊື້ອແລ້ວ ເພິ່ນກໍຮຽກຮ້ອງໃຫ້ອຳນາດການປົກຄອງໃນເຂດທີ່ເກີດພະຍາດໝູນັ້ນ ຈົ່ງສຸມທຸກກຳລັງເຂົ້າໃສ່ເພື່ອກຳຈັດຈຸດເກີດພະຍາດໃຫ້ໄດ້ ແລະ ບໍ່ໃຫ້ພະຍາດກັບຄືນມາລະບາດອີກ, ຢຸດຕິການເຄື່ອນຍ້າຍໝູ, ຜະລິດຕະພັນໝູຈາກບ່ອນທີ່ມີເຊື້ອພະຍາດໄປຫາບ່ອນອື່ນຢ່າງເດັດຂາດ, ຄອບຄົວໃດຢາກລ້ຽງໝູຄືນອີກກໍຕ້ອງແມ່ນພາຍຫລັງ 30 ວັນທີ່ໄດ້ທຳລາຍໝູເປັນພະຍາດໄປແລ້ວ. ໜ່ວຍງານ “ຕອບໂຕ້ໄວ” ຕ້ອງທຳຄວາມສະອາດຄອກໝູທັນທີ, ສີດຢາຂ້າເຊື້ອ, ໂຮຍປູນຂາວໃຫ້ທົ່ວຄອກ. ໝູທີ່ເປັນພະຍາດຈະໄດ້ເອົາໄປລວມກັນ ເພື່ອຂຸດຂຸມຝັງ, ກ່ອນຈະຝັງຕ້ອງສີດຢາຂ້າເຊື້ອ ແລະ ໂຮຍປູນຂາວລົງໃສ່ຢ່າງລະອຽດຮອບຄອບ, ເຄື່ອງນຸ່ງປ້ອງກັນພະຍາດຂອງພະນັກງານກໍຕ້ອງເອົາຝັງໄປນຳກັນກັບໝູ. ທັງໝົດອຸປະກອນທີ່ຢູ່ໃນຂົງເຂດເກີດພະຍາດກໍລ້ວນແຕ່ໄດ້ສີດຢາຂ້າເຊື້ອເຊັ່ນດຽວກັນ ເພື່ອຫລີກເວັ້ນການແຜ່ລາມໄປໃສ່ບ່ອນອື່ນ.

        ການຕ້ານພະຍາດໝູອາຟຣິກາໃນຄັ້ງນີ້ ນອກຈາກການເຮັດທົດລອງປ້ອງກັນແລ້ວ ຍັງຈະຕ້ອງໄດ້ສືບຕໍ່ເຮັດຂະບວນການອະນາໄມສະພາບແວດລ້ອມໃນພື້ນທີ່ມີການລະບາດຕື່ມອີກ, ພ້ອມຈັດຕັ້ງພະນັກງານຂະແໜງການກ່ຽວຂ້ອງເປັນ 5 ຈຸຂຶ້ນ ເພື່ອໄປກວດກາບັນດາຄຸ້ມບ້ານ, ເມືອງ ເພື່ອເຝົ້າລະວັງ, ຕິດຕາມສະພາບພະຍາດລະບາດຢູ່ຮາກຖານໃຫ້ທັນການ ເພື່ອສະກັດກັ້ນຢ່າງມີຜົນ ແລະ ບໍ່ໃຫ້ແຜ່ລາມອອກໄປບ່ອນອື່ນ.