ເຊລຊີ ໄດ້ເວລາປົດ ຊາຣີ ພົ້ນຜູ້ຈັດການແລ້ວ

      ດິ ເອັກເພຣສ ສື່ຂອງອັງກິດ ລາຍງານວ່າ ເຊລຊີ ອາດຈະປົດ ເມົາຣິຊິໂອ ຊາຣີ ພົ້ນຈາກການເປັນຜູ້ຈັດການທີມຂອງພວກເຂົາໃນຊ່ວງການແຂ່ງຂັນທີມຊາດ ໂດຍ ຈານຟຣັງໂກ້ ໂຊລ່າ ຫລື ສະຕີບ ຮໍແລນ ອາດຈະໄດ້ຄຸມທີມຕໍ່ຈາກລາວ.

      ຫລາຍວັນກ່ອນໜ້ານີ້ ຊາຣີ ຕົກເປັນຂ່າວລືກ່ຽວກັບການຖືກໄລ່ອອກຢ່າງໜັກ ຫລັງຈາກລາວພາທີມສ້າງຜົນງານໄດ້ໜ້າຜິດຫວັງ ເຊັ່ນການເສຍ ແມນເຊັສເຕີ ຊິຕີ້ ແບບຂາດລອຍໃນລີກ 0-6 ແລະ ຕົກຮອບ 5 ໃນການແຂ່ງຂັນ ເອັຟເອ ຄັບ ຈາກການເສຍ ແມນເຊັສເຕີ ຢູໄນເຕັດ ຄາສະໜາມ ສະແຕມຟອດ ບຣິດ 0-2 ເປັນຕົ້ນ.

      ເຖິງວ່າກະແສດັ່ງກ່າວຈະງຽບລົງໄປ ຫລັງຈາກ ເຊລຊີ ເກັບໄຊຊະນະໄດ້ເຖິງ 4 ເກມ ຈາກທັງໝົດ 5 ນັດໃນທຸກລາຍການ ກ່ອນລົງຫລິ້ນເກມລີກກັບ ເອັບເວີຕັນ ໃນວັນທີ 17 ມີນາຜ່ານມາ ແຕ່ພໍຮອດນັດກັບ ເອັຟເວີຕັນ ລູກທີມຂອງ ຊາຣີ ພັດສ້າງຜົນງານໄດ້ໜ້າຜິດຫວັງຈົນອອກໄປເສຍແບບສຸດຊັອກ 0-2 ເຮັດໃຫ້ພວກເຂົາພາດໂອກາດຈະແຊງ ແມນເຊັສເຕີ ຢູໄນເຕັດ ຂຶ້ນໄປເປັນທີ 5 ຂອງຕາຕະລາງຄະແນນ.

     ທັງນີ້ ຖ້າຫາກ ຊາຣີ ຖືກປົດອອກຈາກຕຳແໜ່ງແທ້ ເຊລຊີ ອາດຈະດັນ ຈານຟຣັງໂກ້ ໂຊລ່າ ມືຂວາຂອງ ຊາຣີ ມາເປັນຜູ້ຈັດການທີມໄປກ່ອນ ຫລື ເອົາ ສະຕີບ ຮໍແລນ ຜູ້ຊ່ວຍຜູ້ຈັດການທີມຊາດອັງກິດມາເປັນຜູ້ຈັດການຂອງທີມ ໂດຍ ຮໍແລນ ເຄີຍເຮັດວຽກໃຫ້ ເຊລຊີ ມາແລ້ວ.