ທພລ ຈັບມືກັບ 5 ຄູ່ຮ່ວມທຸລະກິດ ເພື່ອຊໍາລະສະສາງສິນເຊື່ອລູກຄ້າ
ໃນວັນທີ 14 ມີນາ 2019 ທະນາຄານພັດທະນາລາວ (ທພລ) ຮ່ວມກັບຄູ່ຮ່ວມທຸລະກິດ ປະກອບມີສະຖາບັນການເງິນ ປະຕູຄໍາ, ສະຖາບັນການເງິນ ເນັກ, ສະຖາບັນການເງິນ ຊັບທະວີ, ສະຖາບັນການເງິນ ເພັດອຸໄລ ແລະ ບໍລິສັດ ກຸງສີເຊົ່າສິນເຊື່ອ ໄດ້ຮ່ວມລົງນາມ ວ່າດ້ວຍການຮ່ວມມືໃນການຮັບຊໍາລະສະສາງສິນເຊື່ອຂອງລູກຄ້າແຕ່ລະບໍລິສັດ, ແຕ່ລະສະຖາບັນຜ່ານ ທພລ ໃຫ້ຫຼາກຫຼາຍຊ່ອງທາງ ຊຶ່ງມີຂຶ້ນໃນວັນທີ 14 ມີນານີ້ ທີ່ ທພລ ໂດຍການເຂົ້າຮ່ວມຂອງຜູ້ຕາງໜ້າຈາກທະນາຄານ ແຫ່ງ ສປປ ລາວ, ຄະນະ ອໍານວຍການ, ບັນດາບໍລິສັດເຊົ່າສິນເຊື່ອດັ່ງກ່າວ ແລະ ພາກສ່ວນກ່ຽວຂ້ອງຕ່າງໆເຂົ້າຮ່ວມນຳດ້ວຍ.
ທ່ານ ອາຄົມ ປຣະເສີດ ຜູ້ອໍານວຍການ ທພລ ໄດ້ແຈ້ງຄວາມເປັນມາຂອງການຫັນໄປສູ່ຄວາມທັນສະໄໝ, ພ້ອມ ກັບຄວາມພ້ອມໃນການພັດທະນາລະບົບຮັບຊໍາລະສະສາງຜ່ານຊ່ອງທາງຕ່າງໆຂອງ ທພລ ຊຶ່ງ ທພລ ເປັນທະນາຄານທຸລະກິດ ລັດ ແລະ ມີ 18 ສາຂາ, 78 ໜ່ວຍບໍລິການ, 18 ໜ່ວຍແລກປ່ຽນຢູ່ແຕ່ລະແຂວງ, ບັນດາເມືອງ ແລະ ບ່ອນຊຸມຊົນໜາແໜ້ນ ທີ່ພ້ອມໃຫ້ບໍລິການແກ່ສັງຄົມໃນຂອບເຂດທົ່ວປະເທດ ຊຶ່ງນັບແຕ່ມື້ສ້າງຕັ້ງມາເຖີງປັດຈຸບັນ ໄດ້ມີການສ້າງຄວາມໝັ້ນຄົງໃຫ້ກັບ ທະນາຄານ ກໍ່ຄືການພັດທະນາຫັນເອົາການບໍລິການຂອງທະນາຄານໄປສູ່ຄວາມທັນສະໄໝ ເພື່ອຮອງຮັບກັບການບໍລິການຮັບໃຊ້ສັງຄົມ, ສ້າງຄວາມສະດວກ ວ່ອງໄວ ທັງຮັບປະກັນເພື່ອສາມາດແຂ່ງຂັນໃນດ້ານການບໍລິການໃນຍຸກປະຈຸບັນ ແລະ ອະນາຄົດ.
ດ້ວຍເຫດຜົນດັ່ງກ່າວ ທພລ ຈຶ່ງໄດ້ຕັດສິນໃຈລົງທຶນ ນຳເອົາເຕັກໂນໂລຊີເຂົ້າມາຮັບໃຊ້ໃນການບໍລິການຈາກ Bank 2000 ມາເປັນ Core Banking [ T24 ] ທີ່ເປັນມາດຖານສາກົນ ຊຶ່ງສາມາດພັດທະນາຮູບແບບການບໍລິການທີ່ຫຼາກຫຼາຍ; ພ້ອມດຽວກັນນີ້; ທພລ, ກໍາລັງກຽມທີ່ຈະເປີດໂຕຢ່າງເປັນທາງການໃນໄວໆນີ້ ກໍ່ຄື LDB On Bank ເປັນການໃຫ້ບໍລິການດໍາ ເນີນທຸລະກໍາທາງການເງິນສໍາລັບນິຕິບຸກຄົນທີ່ສະດວກສະບາຍ ແລະ ຮັບປະກັນຄວາມປອດໄພ ເປັນການປະກອບສ່ວນອັນສໍາ ຄັນເຂົ້າໃນການພັດທະນາຍົກລະດັບລະບົບການບໍລິການຊໍາລະສະສາງພາຍໃນ ແລະ ຕ່າງປະເທດໃຫ້ຫັນເຂົ້າສູ່ລະບົບການຊໍາລະ ຜ່ານທະນາຄານໃຫ້ຫຼາຍຂຶ້ນ ເພື່ອຫຼຸດຜ່ອນການຊໍາລະສະສາງດ້ວຍການນໍາໃຊ້ເງິນສົດ, ປະຢັດເວລາ ທັງຮັບປະກັນບໍ່ຕົກເຮ່ຍ ເສຍຫາຍ ແລະ ສາມາດນຳລາຍຮັບດັ່ງກ່າວມາເປັນທືນໃນການພັດທະນາຄອບຄົວ ແລະ ສ້າງສາປະເທດຊາດ.
# ຂ່າວ-ພາບ: ຣັດສະໝີ ດວງສັດຈະ
