ທົ່ວປະເທດສາມາດປັກດໍາເຂົ້ານາແຊງໄດ້ພຽງ 90% ຂອງເນື້ອທີແຜນການ

ກະຊວງກະສິກໍາ ແລະ ປ່າໄມ້ ໃຫ້ຮູ້ວ່າ: ປັດຈຸບັນຊາວກະສິກອນໃນຂອບເຂດທົ່ວປະເທດ ພວມສຸມໃສ່ບົວລະບັດຮັກສາເຂົ້ານາແຊງດ້ວຍການເສຍຫຍ້າ, ໃສ່ຝຸ່ນ ແລະ ເກັບຮັກສານໍ້າໃຫ້ພຽງພໍ ເພື່ອຍົກສະມັດຕະພາບການຜະລິດໃນເນື້ອທີ່ປັກດໍາ 89 ພັນກວ່າເຮັກຕາ ເທົ່າກັບ 90% ຂອງເນື້ອທີ່ແຜນການ. ສ່ວນການປູກພືດລະດູແລ້ງບັນລຸໄດ້ 125.925 ເຮັກຕາ ເທົ່າກັບ 80% ຂອງເນື້ອທີ່ແຜນການ. ພືດທີ່ປູກຫຼາຍກວ່າໝູ່ແມ່ນສາລີອາຫານສັດ, ສາລີຫວານ, ຢາສູບ, ອ້ອຍ, ມັນຕົ້ນ, ຖົ່ວດິນ ແລະ ມັນຕ່າງໆ, ໃນນັ້ນ, ແຂວງທີ່ປູກຫຼາຍກວ່າໝູ່ແມ່ບັນດັນແຂວງພາກກາງ ປະຕິບັດໄດ້ 47 ພັນກວ່າເຮັກຕາ, ພາກເໜືອ 51 ພັນກວ່າເຮັກຕາ ແລະ ພາກໃຕ້ 26 ພັນກວ່າເຮັກຕາ.

    ກະຊວງກະສິກໍາ ແລະ ປ່າໄມ້ ໃຫ້ຮູ້ອີກວ່າ: ໃນໜຶ່ງເດືອນຜ່ານມານີ້, ໜ່ວຍງານຂອງຕົນສາມາດຢຶດໄມ້ທີ່ຜິດລະບຽບກົດໝາຍ ຢູ່ແຂວງຫົວພັນ, ຫຼວງພະບາງ, ບໍລິຄໍາໄຊ, ຄໍາມ່ວນ ແລະ ສະຫວັນນະເຂດໄດ້ 147 ເມັດກ້ອນ, ໄມ້ດູ່ 191 ພັນກວ່າກິໂລ, ໄມ້ຂະຍຸງ 174 ກິໂລ, ກັກລົດວີໂວ້ໄດ້ 1 ຄັນ, ລົດຮຸນໄດ 1 ຄັນ, ລົດ 4 ລໍ້ໄດ້ 4 ຄັນ, ລົດເມ 2 ຄັນ ແລະ ລົດລີເບຼໂລ 1 ຄັນ, ນອກນີ້, ຢຶດໝໍ້ຊ໋ອດປາໄດ້ 49 ໜ່ວຍ ແລະ ໄດ້ດໍາເນີນຄະດີຜູ້ຕ້ອງຫາ ທັງໝົດ 21 ລາຍ, ໃນນັ້ນມີຄະດີ ກ່ຽວກັບໄມ້ 19 ລາຍ ແລະ ເຄື່ອງປ່າຂອງດົງ 2 ລາຍ ແລະ ພວມ ສືບສວນ-ສອບສວນ 14 ລາຍ ແລະ ພ້ອມນັ້ນຍັງສາມາດຢຶດສັດນໍ້າ-ສັດປ່າຫຼວງຫຼາຍ ໄດ້ 27 ກວ່າກິໂລ ແລະ ເຄື່ອງຂອງດົງ (ເຄືອໃສ້ຊ້າງ) 2 ພັນກິໂລ ແລະ ຢາງແປກ 30 ໂຕນ. ສ່ວນຜູ້ກະທໍາຜິດແມ່ນໄດ້ສຶກສາອົບຮົມ ແລະ ປັບໄໝຕາມລະບຽບກົດໝາຍ ແລະ ລົງຕິດຕາມກວດກາການເຂົ້າບຸກລຸກທີ່ດິນປ່າໄມ້ ຢູ່ເມືອງໄຊຍະບູລີ ມີເນື້ອທີ່ 2,35 ເຮັກຕາ, ເມືອງບໍ່ແຕນ ໄຟໄໝ້ປ່າ 356 ເຮັກຕາ, ຖາງປ່າເຮັດໄຮ່ 11,46 ເຮັກຕາ, ເມືອງແກ່ນທ້າວ ໄຟໄໝ້ປ່າ 168 ເຮັກຕາ ແລະ ຢູ່ ແຂວງອຸດົມໄຊມີ 6 ເຮັກຕາ.