ທຸລະກິດປຸງແຕ່ງໄມ້ຕ້ອງຕິດພັນກັບການປົກປັກຮັກສາສິ່ງແວດລ້ອມ

     ໃນທ້າຍອາທິດຜ່ານມານີ້, ຜູ້ປະກອບການທຸລະກິດປຸງແຕ່ງໄມ້ ແລະ ເຈົ້າໜ້າທີ່ກ່ຽວຂ້ອງຈາກຂະແໜງກະສິກຳ-ປ່າໄມ້, ອຸດສາຫະກຳ ແລະ ການຄ້ານະຄອນຫລວງວຽງຈັນ ໄດ້ຮ່ວມກັນປຶກສາຫາລືກ່ຽວກັບການຜະລິດທີ່ສະ ອາດເປັນມິດຕໍ່ສິ່ງແວດລ້ອມໃນໂຮງງານປຸງແຕ່ງໄມ້ ໂດຍການເປັນປະທານ ຂອງທ່ານຫົວໜ້າພະແນກອຸດສາຫະກຳ ແລະ ການຄ້ານະຄອນຫລວງວຽງຈັນ ເພື່ອແນໃສ່ປັບປຸງການເຄື່ອນໄຫວຂອງຫົວໜ່ວຍທຸລະກິດໄມ້ໃຫ້ທັນສະໄໝ, ມີຄຸນນະພາບ ແລະ ຍືນຍົງ, ພ້ອມທັງສ້າງມູນຄ່າເພີ່ມໃຫ້ຜະລິດຕະພັນດີຂຶ້ນກວ່າເກົ່າ.

   ຜູ້ເຂົ້າຮ່ວມໄດ້ຮຽນຮູ້ຕື່ມກ່ຽວກັບກົນໄກ ແລະ ລະບຽບການຕ່າງໆໃນການຄຸ້ມຄອງການເຄື່ອນໄຫວຂອງໂຮງງານ, ມາດຕະຖານຄວາມປອດໄພຂອງຜູ້ອອກແຮງງານ, ມາດຕະຖານດ້ານເຕັກນິກ, ການຜະລິດ ແລະ ຄຸນນະພາບຂອງຜະລິດຕະພັນ ເພື່ອຫລຸດຜ່ອນການສ້າງມົນລະພິດຕໍ່ສິ່ງ ແວດລ້ອມ ແລະ ສັງຄົມ, ການນຳໃຊ້ຊັບພະຍາກອນປ່າໄມ້ໃຫ້ເກີດປະໂຫຍດ ສູງສຸດ, ເພື່ອສ້າງມູນຄ່າເພີ່ມ ລວມເຖິງການຄຸ້ມຄອງກິດຈະການປຸງແຕ່ງໄມ້ໃຫ້ເຄື່ອນໄຫວຖືກຕ້ອງຕາມລະ ບຽບກົດໝາຍ.

      ກະຊວງອຸດສາຫະກຳ ແລະ ການຄ້າ ໃຫ້ຮູ້ວ່າ: ພາຍຫລັງມີຄຳສັ່ງເລກ ທີ 15/ນຍ ວ່າດ້ວຍການຄຸ້ມຄອງໄມ້, ທຸລະກິດໄມ້ ແລະ ການເຄື່ອນຍ້າຍໄມ້ ອອກມານີ້ ເຫັນວ່າການຄຸ້ມຄອງຊັບພະຍາກອນທຳມະຊາດ ແລະ ສິ່ງແວດ ລ້ອມ ໂດຍສະເພາະແມ່ນໄມ້ໄດ້ມີປະສິດທິຜົນກວ່າເກົ່າ, ສາມາດສະກັດກັ້ນ ການລັກລອບຕັດໄມ້ແບບຊະຊາຍໃນທົ່ວປະເທດ, ພ້ອມທັງດັດສົມໂຮງງານປຸງ ແຕ່ງໄມ້ທີ່ເຄື່ອນໄຫວບໍ່ຖືກຕ້ອງຕາມລະບຽບກົດໝາຍໃຫ້ໄດ້ມາດຕະຖານດີຂຶ້ນກວ່າເກົ່າ. ກະຕຸກຊຸກຍູ້ໃຫ້ໂຮງງານປຸງແຕ່ງໄມ້ຍົກລະດັບຄວາມອາດສາມາດການຜະລິດສິນຄ້າສຳເລັດຂອງຕົນດີຂຶ້ນ ສາມາດສ້າງມູນຄ່າເພີ່ມໃຫ້ຜະລິດຕະພັນ ແລະ ປະກອບສ່ວນເຂົ້າໃນການພັດທະນາເສດຖະກິດຂອງຊາດໄດ້ເຕີບໃຫຍ່ເຂັ້ມແຂງ.