ເບິ່ງຄືນການອະນຸຍາດ ໃຫ້ມີອາວຸເສິກຄອບຄຸມ
ໂດຍ: ທ່ຽງທຳ
ສະບາຍດີ, ເພື່ອນຜູ້ອ່ານ ທີ່ຮັກແພງ, ຫລາຍຄົນກໍອາດ ຄິດຄືທ່ຽງທຳວ່າ: ຢາກໃຫ້ ພາກສ່ວນມີໜ້າທີ່ຮັບຜິດ ຊອບໃນການອອກໃບທະບຽນໃຫ້ຜູ້ມີສິດຖືປືນເພື່ອປ້ອງກັນໂຕ ແລະ ມາດຕະການຄຸ້ມຄອງອາວຸດເສິກຢູ່ ປະເທດເຮົາ, ໃຫ້ຮັດກຸມກວ່າເກົ່າ, ພາຍຫລັງເຫັນວ່າ: ການນຳໃຊ້ອາວຸເສິກໄປໃນທາງ ທີ່ບໍ່ຖືກຕ້ອງນັບມື້ເພີ່ມຂຶ້ນ, ກໍດັ່ງພາກເຮົາໄດ້ເຫັນຈາກສື່ຕ່າງໆ ສ່ອງແສງມາ, ກິນ ເຫລົ້າເມົາເບຍມາລົດຕຳກັນເລັກໆນ້ອຍໆ ກໍຈັບປືນອອກມາຂູ່ “ມຶງລູກໃຜ, ມຶງເປັນລູກໃຜ, ມຶງແມ່ນລູກໃຜ” ຕ່າງໆນານາ ເກີດຂຶ້ນສ້າງຕົນເປັນຜູ້ເກັ່ງຜູ້ກ້າວ່າມີປືນຄອບຄອງນາຍນັ້ນຖານະນີ້ ຢ່າງອວດອົງທະນົງຕົວ, ບໍ່ຢ້ານໃຜ, ບໍ່ເຄົາລົບລະບຽບ ກົດໝາຍ ແລະ ເມື່ອມໍ່ໆນີ້ ກໍມີເຫດການຈົກປືນມາຂູ່ປະຊາຊົນຢູ່ບ່ອນຂັດແຍ່ງທີ່ດິນນາໄຮ, ນາໂນ, ຍິ່ງຂຶ້ນຟ້ານາບຂູ່ຜູ້ອື່ນດ້ວຍຄວາມທ້າທາຍໂສກດີແຕ່ຝ່າຍໜຶ່ງ ບໍ່ມີປືນ.
ຖ້າມີກໍບໍ່ຮູ້ວ່າເຫດການສະເທືອນຂວັນດັ່ງກ່າວຈະກ້າວໄປເຖິງໃສ ແລະ ກໍຍັງມີ ປາກົດການທີ່ຫວາດກົວອື່ນໆ ເກີດຂຶ້ນໃນຖັນແຖວໄວໜຸ່ມ ຢູ່ຕາມເທັກ, ຕາມບາ, ບາງຄັ້ງກໍເຖິງຂັນເສຍຊີວິດມາຫລາຍລາຍ, ກໍຍ້ອນຄວາມບໍ່ເຂັ້ມງວດໃນການຄຸ້ມຄອງອາວຸດເສິກ.
ມີຫລາຍກໍລະນີໃຫ້ເຫັນ ໃນຈຳນວນຜູ້ມີອາວຸດເສິກ ໄວ້ໃນຄອບຄອງນັ້ນ, ບາງຄົນກໍຍັງບໍ່ທັນເຖິງຖານະຕຳແໜ່ງຖືປືນກັນຕົວເອງ.
ແຕ່ກໍມີປືນຂຶ້ນທະບຽນຄັກແນ່ ແລະ ມີຫລາຍຄົນກໍ ລັກລອບຊື້ເອົາມາຄອບຄອງ ກໍຍັງມີຢູ່ຕໍ່ສະພາບດັ່ງກ່າວ ຈິ່ງຂໍຮຽກຮ້ອງໃຫ້ຂະແໜງມີອຳນາດໃນການຄຸ້ມຄອງ ອາວຸດເສິກຕ້ອງໄດ້ເພີ່ມທະວີຄວາມເຂັ້ມງວດກວດຂັ້ນເພື່ອບໍ່ໃຫ້ສິ່ງນີ້ກັບກາຍມາເປັນໄພຂົ່ມຂູ່ຕໍ່ສັງຄົມ ແລະ ຖ້າໃຜລະເມີດກໍຕ້ອງໄດ້ລົງລະບຽບວິໄນໃຫ້ເໝາະສົມ./.
