ຢູຟາ ຕັ້ງຂໍ້ຫາ ໂດ້ ພຶດຕິກຳບໍ່ເໝາະສົມ
ຄຣິສເຕຍໂນ ໂຣນັລໂດ້ ດາວເຕະຊຸບເປີສະຕາຂອງ ຢູເວນຕຸສ ຍັກໃຫຍ່ແຫ່ງກັລໂຊ ເຊເຣຍ ອາ ອີຕາລີ ຖືກສະຫະພັນບານເຕະເອີຣົບ (ຢູຟາ) ຕັ້ງຂໍ້ຫາປະພຶດບໍ່ເໝາະສົມ ຈາກກໍລະນີທີ່ລາວສະຫລອງການຍິງປະຕູດ້ວຍທ່າທາງທີ່ບໍ່ເໝາະສົມ ໃນເກມ ຢູຟາ ແຊມປ້ຽນລີກ ຮອບ 16 ທີມສຸດທ້າຍນັດ 2 ເຊິ່ງດາວເຕະທີມຊາດໂປຣຕຸເກດ ຍິງແຮັດທິກພາທີມເປີດບ້ານເອົາຊະນະ ແອດເລຕິໂກ ມາດຣິດ 3-0 ໃນກາງອາທິດຜ່ານມາ ພ້ອມແຊງເຂົ້າຮອບດ້ວຍປະຕູລວມ 3-2 ໃນທີ່ສຸດ.
ໃນເກມດັ່ງກ່າວ ໂຣນັລໂດ້ ສະຫລອງຫລັງຍິງຈຸດໂທດເປັນປະຕູຂຶ້ນນຳ 3-0 ດ້ວຍການທຳທ່າຮຽນແບບ ດີເອໂກ ຊິເມໂອເນ ຜູ້ຈັດການທີມແອັດເລຕິໂກ ມາດຣິດ ທີ່ເຄີຍສະແດງອາການດີໃຈໃນເກມທຳອິດທີ່ ຣີລ ເບຕິສ ເປີດບ້ານເອົາຊະນະ ຢູເວນຕຸສ 2-0 ດ້ວຍການໃຊ້ 2 ມືກຸມໃສ່ເປົ້າໂສ້ງ ໂດຍໃນກໍລະນີດັ່ງກ່າວ ຜູ້ຈັດການທີມຊາວອາເຈນຕິນາ ຖືກ ຢູຟາ ສັ່ງລົງໂທດປັບໃໝເງິນ 20.000 ເອີໂຣ. ຂະນະທີ່ ໂຣນັລໂດ້ ກໍຖືກອົງການບານເຕະເອີຣົບ ຕັ້ງຂໍ້ຫາຈາກການສະຫລອງດ້ວຍທ່າດັ່ງກ່າວເຊັ່ນກັນ ໂດຍໃນກໍລະນີຂອງດາວເຕະຊາວໂປຣຕຸເກດນັ້ນ ຈະມີຄຳຕັດສິນອອກມາໃນວັນທີ 21 ມີນານີ້.
