ກວ່າ 93% ຂອງຄອບຄົວທົ່ວປະເທດໄດ້ຊົມໃຊ້ໄຟຟ້າທົ່ວເຖິງແລ້ວ

  ຜູ້ອຳນວຍການລັດວິສາຫະກິດໄຟຟ້າລາວ ໃຫ້ຮູ້ວ່າ: ໄຟຟ້າ, ແມ່ນປັດໃຈຄວາມຕ້ອງການພື້ນຖານຂອງສັງຄົມ, ມີບົດບາດສໍາຄັນຕໍ່ການດໍາລົງຊີວິດ, ການຜະລິດ ແລະ ການສ້າງສາພັດທະນາປະເທດ. ມາຮອດປັດຈຸບັນ, ປະຊາຊົນກວມ 93,79% ຂອງຄອບຄົວໃນທົ່ວປະເທດໄດ້ຊົມໃຊ້ໄຟຟ້າຢ່າງທົ່ວເຖິງແລ້ວ ແລະ ຈະສືບຕໍ່ເລັ່ງຂະຫຍາຍຕາໜ່າງໄຟຟ້າໃຫ້ເຂົ້າໄປຮອດໄປເຖິງປະຊາຊົນໃນເຂດຫ່າງໄກສອກຫລີກໃຫ້ທົ່ວເຖິງເພື່ອປະກອບສ່ວນສໍາຄັນເຂົ້າໃນການພັດທະນາຊີວິດການເປັນຢູ່ຂອງເຂົາເຈົ້າສາມາດຫລຸດພົ້ນອອກຈາກຄວາມທຸກຍາກໄດ້ໂດຍໄວ.

   ທ່ານລັດຖະມົນຕີກະຊວງພະລັງງານ ແລະ ບໍ່ແຮ່ ຄໍາມະນີ ອິນທິລາດ ໄດ້ເນັ້ນໃຫ້ຂະແໜງໄຟຟ້າເພີ່ມທະວີຄວາມເອົາໃຈໃສ່ ຄື: ການພັດທະນາໄຟຟ້າຕ້ອງຮັບປະກັນໃຫ້ສອດຄ່ອງກັບຄວາມຮຽກຮ້ອງຕ້ອງການຂອງການພັດທະນາປະເທດຊາດໃນແຕ່ລະໄລຍະ, ຫັນເປັນອຸດສາຫະກຳ ແລະ ທັນສະໄໝເທື່ອລະກ້າວ, ຍົກສູງຄຸນນະພາບການນຳພາ-ຄຸ້ມຄອງໃຫ້ມີປະສິດທິຜົນ,ໂດຍສະເພາະສືບຕໍ່ແກ້ໄຂບັນຫາໜີ້ສິນຄ່າກະແສໄຟຟ້າທີ່ຍັງມີສະພາບຄຸມເຄືອ ແລະ ເອົາໃຈໃສ່ຂະຫຍາຍຕາຂ່າຍໄຟຟ້າໄປສູ່ເຂດຊົນນະບົດຫ່າງໄກສອກຫລີກໃຫ້ກວ້າງຂວາງ ແລະ ທົ່ວເຖິງປັບປຸງຂອດບໍລິການໃຫ້ດີຂຶ້ນຕາມຄໍາຂວັນທີວ່າ: “ເພີ່ມລາຍຮັບ, ຫລຸດລາຍຈ່າຍ, ຈໍາໜ່າຍໄຟໃຫ້ພຽງພໍ, ບໍລິການວ່ອງໄວ, ດ້ວຍຄວາມປອດໄພ, ຊົມໃຊ້ໃຫ້ເກີດຜົນ” ເພື່ອຫລຸດຜ່ອນສຽງຈົ່ມວ່າຕ່າງໆຈາກສັງຄົມໃຫ້ຫລຸດລົງ, ພ້ອມທັງເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານ-ກໍາມະກອນ ໃຫ້ມີນໍ້າໃຈບໍລິການປະຊາຊົນ ແລະ ປະຕິບັດໜ້າທີ່ຂອງຕົນດ້ວຍຄວາມຮັບພິຊອບສູງ.