ນະຄອນຫລວງວຽງຈັນ ຊີ້ແຈງກ່ຽວກັບບັນຫາຂໍ້ຂັດແຍ່ງທີ່ດິນບ້ານ ນາໂນ.
ພາຍຫລັງໄດ້ມີສື່ສັງຄົມອອນລາຍລົງຂ່າວກ່ຽວກັບບັນຫາຂໍ້ຂັດແຍ່ງທີ່ດິນ ຢູ່ບ້ານ ນາໂນ ເມືອງ ໄຊເສດຖາ ນະຄອນຫລວງວຽງຈັນ, ເຊິ່ງທີ່ດິນດັ່ງກ່າວແມ່ນທາງພາກລັດໄດ້ມີການຊົດເຊີບ ແລະ ບຸກເບີກໃຫ້ກັບປະຊາຊົນ 394 ຄອບຄົວທີ່ຖືກຜົນກະກະທົບຈາກຟາມໄກ່ ເຂດບ້ານ ດົງໂດກ ເມືອງ ໄຊທານີ ແລະ ໄດ້ຈັດສັນໃຫ້ນຳໃຊ້ ຢູ່ ບ້ານ ນາໂນ ແລະ ໄດ້ມີສະພາບຂັດແຍ່ງກັນເກີດຂຶ້ນ. ດັ່ງທ່ານ ພຸດທະພອນ ໂຄດປັນຍາ ຮອງເຈົ້າເມືອງ ໄຊເສດຖາ ນະຄອນຫລວງວຽງຈັນ ໄດ້ຊີ້ແຈງຕໍ່ສື່ມວນຊົນໃນວັນທີ 19 ມີນານີ້ວ່າ: ບັນຫາຂໍ້ຂັດແຍ່ງທີ່ດິນບ້ານ ນາໂນ ໄດ້ແກ່ຍາວມາກ່ວາ 9 ປີແລ້ວ, ຕົ້ນຕໍແມ່ນຍ້ອນສາເຫດຄວາມບໍ່ເຂົ້າໃຈລະຫວ່າງ ພາກລັດ ແລະ ປະຊາຊົນ, ໃນການໃຫ້ນຳໃຊ້ທີ່ດິນຢູ່ເຂດຄ້າຍຄຸມຂັງ ຂຶ້ນກັບບ້ານ ນາໂນ, ຊຶ່ງແຕ່ເດີມມາ ທີ່ດິນດັ່ງກ່າວແມ່ນເປັນດິນລັດ ໂດຍ ເມືອງ ໄຊເສດຖາ ເປັນຜູ້ຄຸ້ມຄອງ, ມີເນື້ອທີ່ທັງໝົດ 25 ເຮັກຕາ, ເພື່ອເຮັດສະຫະກອນລວມຫມູ່ຂອງເມືອງ, ຮອດປີ 1995 ຄະນະເມືອງ ໄດ້ອະນຸຍາດ ໃຫ້ບໍລິສັດ ສິນໄຊທອງ ສຳປະທານ ເພື່ອປູກໄມ້ກິນໝາກ, ຮອດປີ 2000 ກະຊວງປ້ອງກັນຄວາມສະຫງົບ ມີແຜນຍົກຍ້າຍຄ້າຍຄຸມຂັງທາດດຳ ອອກໄປຢູ່ເຂດບ້ານ ນາໃຫ ແລະ ນາໂນ ຈຶ່ງໄດ້ສົມທົບກັບ ເມືອງ ໄຊເສດຖາ ສຳຫລວດເນື້ອທີ່ດິນດັ່ງກ່າວຄືນ ຈາກນັ້ນ ຈຶ່ງໄດ້ຕົກລົງໃຫ້ກະຊວງປ້ອງກັນຄວາມສະຫງົບເພື່ອສ້າງຕັ້ງຄ້າຍຄຸມຂັງໃນເນື້ອທີ່ 19 ເຮັກຕາ, ຕໍ່ມາ ກໍໄດ້ມີການຈັດສັນດິນ ຈຳນວນ 7 ເຮັກຕາ ເພື່ອໃຫ້ປະຊາຊົນ ຖືກຜົນກະທົບຈາກຟາມໄກ່ ດົງໂດກ ຈຳນວນ 394 ຄອບຄົວ, ຍົກຍ້າຍມາຢູ່ຊຶ່ງໄດ້ມີການໂອນມອບ ແລະ ອອກໃບຕາດິນບໍ່ຖືກຕ້ອງ ແລະ ມີຂໍ້ຂັດແຍ່ງເກີດຂຶ້ນ, ຄື: ໃນວັນທີ 1 ມີນາ ຜ່ານມານີ້, ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງ ໄຊເສດຖາ ໄດ້ລາຍງານວ່າ: ມີການບຸກລຸກດິນຂອງປະຊາຊົນ ຈຳນວນໜຶ່ງ ແລະ ໃນວັນທີ 13 ມີນາ ກໍມີປະຊາຊົນຄື: ນາງແກ້ວ ມີນີຈັນ ແລະ ທ້າວ ເພັດ ແລະ ທ້າວ ບຸນຕາ ໄດ້ລະດົມເອົາເງີນຈຳນວນໜຶ່ງນຳປະຊາຊົນ 394 ຄອບຄົວ ເພື່ອເປັນທຶນຈ້າງເອົາລົດມາບຸກເບີກ ຈຶ່ງສ້າງໃຫ້ມີຄວາມບໍ່ສະຫງົບ ແລະ ການບຸກເບີກ ນັ້ນໄດ້ໄປຖືກກຳມະສິດຂອງປະຊາຊົນ ຈຳນວນໜຶ່ງທີ່ໄດ້ຮັບກຳມະສິດນຳໃຊ້( ມີໃບຕາດິນແລ້ວ) ຈຶ່ງເກີດມີການຜິດຖຽງກັນ.
ແນວໃດກໍດີ ຕໍ່ກັບສະພາບດັ່ງກ່າວ ທາງ ນະຄອນຫລວງວຽງຈັນ ກໍໄດ້ເລັ່ງແກ້ໄຂ ໂດຍໄດ້ແຕ່ງຕັ້ງໜ່ວຍສະເພາະກິດ ລົງກວດສອບບັນຫາດັ່ງກ່າວພ້ອມກັນນັ້ນ ກໍຈະໄດ້ລົງເກັບກຳຂໍ້ມູນຕອນດິນ ແລະ ຄົ້ນຄ້ວາການຈັດສັນໃຫ້ປະຊາຊົນທີ່ຖືກຜົນກະທົບ ໃຫ້ລະອຽດ ເພາະຈຸດດັ່ງກ່າວມີທັງດິນລັດ ແລະ ດິນປະຊາຊົນທີ່ມີໃບຕາດິນແລ້ວ ຊຶ່ງຄາດວ່າ ອາດຈະໃຊ້ເວລາກ່ວາ 1 ເດືອນຈຶ່ງຈະສຳເລັດ.
ທ່ານ ຮອງເຈົ້າເມືອງ ໄຊເສດຖາ ໃຫ້ຮູ້ວ່າ: ຕໍ່ກັບປະຊາຊົນທີ່ນຳເອົາລົດເຂົ້າໄປບຸກເບີກທີ່ດິນຈຳນວນດັ່ງກ່າວ ແມ່ນບໍ່ໄດ້ຮັບອະນຸຍາດຈາກການຈັດຕັ້ງ ພັກ-ລັດ ບໍ່ວ່າຈະເປັນດິນລັດ ຫລື ດິນບຸກຄົນກໍຕາມ ເຫັນວ່າ ເປັນການລະເມີດຕໍ່ກັບລະບຽບກົດໝາຍ ແລະ ກຸ່ມຄົນຈຳນວນດັ່ງກ່າວຍັງບໍ່ລົດລະ ສະນັ້ນ ຈຶ່ງໄດ້ນຳໃຊ້ກຳລັງເຈົ້າໜ້າທີ່ ປກສ-ປກຊ ເຂົ້າສະກັດ ແລະ ຜູ້ໃດຝ່າຝືນກໍຈະໃຊ້ມາດຕະການຢ່າງເດຂາດ.
