ສາທາລະນະສຸກຫາລືການນໍາໃຊ້ຊັບພະຍາກອນທຳມະຊາດທີ່ເປັນຢາ

ໃນວັນທີ 19-20 ມີນານີ້, ກົມອາຫານ ແລະ ຢາ ກະຊວງສາທາລະນະສຸກ ໄດ້ຈັດກອງປະຊຸມປຶກສາຫາລືຂັ້ນການນຳ ກ່ຽວກັບການຂໍອານຸຍາດໂກຕ້າ, ຂຸດຄົ້ນ, ເກັບຊື້, ປຸງແຕ່ງ, ຖອດຮີດ, ຜະລິດ ແລະ ປູກທົດແທນຊັບພະຍາກ່ອນທຳມະຊາດທີ່ເປັນຢາ, ຂຶ້ນຢູ່ທ່າລາດ ແຂວງວຽງຈັນ, ໂດຍການເປັນປະທານຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ແລະ ມີພາກສ່ວນກ່ຽວຂ້ອງຕ່າງໆເຂົ້າຮ່ວມເປັນຈໍານວນຫຼາຍ. ເພື່ອປຶກສາຫາລື ແລະ ເປັນເອກະພາບໃນດ້ານຫຼັກການຄຸ້ມຄອງການຂຸດຄົ້ນ ເກັບຊື້, ຜະລິດ, ປູກລ້ຽງ, ການນຳເຂົ້າ-ສົ່ງອອກຢາພື້ນເມືອງ ແລະ ຊັບພະຍາກອນທຳທະຊາດທີ່ເປັນຢາ.

ໃນປີ 2012 ຜ່ານມາ ກະຊວງສາທາລະນະສຸກ ກໍໄດ້ຈັດກອງປະຊຸມປຶກສາຫາລືດ້ານນີ້ມາຫຼາຍຄັ້ງ ໂດຍອີງໃສ່ແຜນບູລິມະສິດຂອງລັດຖະບານ ແລະ ແຜນພັດທະນາ ສາທາລະນະສຸກ 5 ປີຄັ້ງທີ VII (2011-2015) ແລະ ທິດທາງແຜນພັດທະນາສາທາລະນະສຸກ 5 ປີ ຄັ້ງທີ VIII (2016-2020) ໃນການພັດທະນາວຽກງານຢາພື້ນເມືອງໃຫ້ທັນກັບບັນດາປະເທດອາຊຽນ, ໂດຍສະເພາະແມ່ນການຄຸ້ມຄອງປົກປັກຮັກສາຊັບພະຍາກອນທຳມະຊາດທີ່ເປັນຢາໃຫ້ຢືນຍົງ ແລະ ນຳໃຊ້ໃຫ້ມີປະສິດທິຜົນໃນດ້ານປິ່ນປົວສຸຂະພາບ ແລະ ເສດຖະກິດຂອງຊາດ.

 ໃນກອງປະຊຸມ, ທ່ານ ບຸນກອງ ສີຫາວົງ ໄດ້ຮຽກຮ້ອງໃຫ້ທຸກພາກສ່ວນກ່ຽວຂ້ອງ ຈົ່ງພ້ອມກັນສຸມທຸກກຳລັງ, ສະຕິປັນຍາ ແລະ ຄວາມສາມາດຂອງຕົນເຂົ້າໃນການຄົ້ນຄວ້າຄວາມເປັນເອກະພາບໃນການຈັດຕັ້ງປະຕິບັດວຽກງານດັ່ງກ່າວໃຫ້ເກີດດອກອອກຜົນດີຂຶ້ນກວ່າເກົ່າ.