ສຳຫລວດວິທີບັນເທົາມົນລະພິດ ທາງອາກາດໃນອາຊີ
ສຳນັກຂ່າວ AFP ສຳຫລວດພາກລັດ ແລະ ເອກະຊົນໃນປະເທດອາຊີທີ່ມີບັນຫາມົນລະພິດທາງອາກາດວ່າໃຊ້ວິທີໃດແດ່ໃນການບັນເທົາບັນຫາ.
ສຳນັກງານສິ່ງແວດລ້ອມແຫ່ງສະຫະປະຊາຊາດອ້າງອົງການອະນາໄມໂລກວ່າ: ປະຊາກອນໃນອາຊີ-ປາຊີຟິກສູງເຖິງ 92% ໄດ້ຮັບມົນລະພິດທາງອາກາດທີ່ເປັນອັນຕະລາຍຕໍ່ສຸຂະພາບ, ທາງການຂອງຫລາຍປະເທດທີ່ປະຊາຊົນບໍ່ພໍໃຈເລື່ອງອາກາດເປັນພິດໄດ້ໃຊ້ການສີດພົ່ນລະອອງນ້ຳ ຫວັງຈັບຝຸ່ນລະອອງໃຫ້ຕົກລົງພື້ນ, ແຕ່ຖືກຕຳນິວ່າບໍ່ໄດ້ຜົນ ແລະ ເປັນການແກ້ບັນຫາທີ່ປາຍເຫດ. ນະຄອນຫລວງນິວເດລີ ເມືອງທີ່ມີມົນລະພິດຫລາຍທີ່ສຸດຂອງອິນເດຍຫວັງໃຊ້ເຮລິກົບແຕສີດພົ່ນລະອອງນ້ຳທົ່ວເມືອງໃນປີ 2017, ແຕ່ເຮລິກົບແຕຂຶ້ນບິນບໍ່ໄດ້ ເພາະໝອກຄວັນພິດໜາບົດບັງວິໄສທັດ. ສ່ວນນະຄອນຫລວງບາງກອກໃຊ້ຫລາຍວິທີແກ້ບັນຫາໝອກຄວັນພິດຫລາຍອາທິດໃນເດືອນມັງກອນ ທັງສີດພົ່ນລະອອງນ້ຳ, ສ້າງຝົນທຽມ ແລະ ໃຊ້ໂດຣນພົ່ນລະອອງນ້ຳ, ແຕ່ບໍ່ໄດ້ຜົນ ເຊັ່ນດຽວກັບ ສ.ເກົາຫລີ ທີ່ສ້າງຝົນທຽມໃນເດືອນມັງກອນ ແຕ່ໄດ້ພຽງລະອອງຝົນເບົາບາງເທົ່ານັ້ນ.
ເມືອງຊີອານ ທາງເໜືອຂອງຈີນທົດລອງໃຊ້ເຄື່ອງຟອກອາກາດຂະໜາດໃຫຍ່ເທົ່າປ່ອງຄວັນຂອງໂຮງງານອຸດສາຫະກຳ ພົບວ່າຫລຸດຝຸ່ນລະອອງຂະໜາດ PM 2,5 ໃນເນື້ອທີ່ລັດສະໝີ 10 ຕາກິໂລແມັດ. ຂະນະທີ່ ຮົງກົງເປີດອຸໂມງຍາວ 3,7 ກິໂລແມັດ ຕິດຕັ້ງລະບົບຟອກອາກາດທີ່ອ້າງວ່າໃຫຍ່ທີ່ສຸດໃນໂລກ ຟອກອາກາດໄດ້ຊົ່ວໂມງລະ 5,4 ລ້ານລູກບາດເມັດ, ກຳຈັດອະນຸພາກອັນຕະລາຍ ແລະ ໄນໂຕຣເຈນອັອກໄຊໄດ້ຢ່າງໜ້ອຍ 80% ດ້ວຍການໃຊ້ພັດລົມຂະໜາດໃຫຍ່ດູດອາກາດເຂົ້າໂຮງຟອກອາກາດທີ່ຢູ່ໃນອາຄານລະບາຍອາກາດ 3 ຫລັງໃນອຸໂມງ, ສ່ວນນິວເດລີປະກາດໃນປີກ່ອນວ່າ: ຈະຕິດຕັ້ງເຄື່ອງຟອກອາກາດຂະໜາດໃຫຍ່ຕາມສີ່ແຍກຕ່າງໆ ແລະ ຕິດຕັ້ງແນວກອງອາກາດຢູ່ຫລັງຄາລົດໂດຍສານ ເພື່ອຈັບມົນລະພິດລະຫວ່າງຂີ່ໄປຕາມຖະໜົນ.
