ການກໍ່ສ້າງເຂື່ອນໄຟຟ້າເຊລະນອງ I ຄືບໜ້າແລ້ວ 54,2%
ເມື່ອມໍ່ໆມານີ້ ທ່ານ ສັນຕິພາບ ພົມວິ ຫານ ເຈົ້າແຂວງສະຫວັນນະເຂດ ພ້ອມດ້ວຍພະແນກການທີ່ກ່ຽວຂ້ອງ ໄດ້ລົງຕິດຕາມຄວາມຄືບໜ້າໃນການໂຍກຍ້າຍບ້ານເຮືອນປະຊາຊົນອອກຈາກພື້ນທີ່ໄດ້ຮັບຜົນກະທົບຈາກໂຄງການກໍ່ສ້າງເຂື່ອນໄຟຟ້າເຊລະນອງ 1 ເພື່ອແນະນຳໃຫ້ເອົາໃຈໃສ່ຕໍ່ການກໍ່ສ້າງບ້ານເຮືອນທີ່ຕັ້ງໃໝ່ໃຫ້ມີຄຸນນະພາບ ແລະ ມາດຕະຖານ.
ເຂື່ອນໄຟຟ້າເຊລະນອງ 1 ຕັ້ງຢູ່ຕອນລຸ່ມຂອງນ້ຳເຊລະນອງ ເຊິ່ງເປັນສາຂາຂອງນ້ຳເຊບັ້ງຫຽງ, ຫ່າງຈາກເມືອງພີນປະມານ 42,8 ກິໂລແມັດ ແລະຫ່າງຈາກເທສະບານແຂວງສະຫວັນນະເຂດ 180 ກິໂລແມັດ, ມີອ່າງເກັບກັກນ້ຳໄດ້ສູງເຖິງ 881 ລ້ານແມັດກ້ອນ ເຊິ່ງຄາດວ່າຈະຜະລິດພະລັງງານໄຟຟ້າໄດ້ປະມານ 269.900 KWH ຕໍ່ປີ ລວມມີມູນຄ່າການລົງທຶນປະມານ 151 ລ້ານໂດລາສະຫະລັດ ໂດຍຜ່ານການລົງທຶນຮ່ວມລະຫວ່າງລັດຖະບານລາວ ແລະ ບໍລິສັດຊັນເປເປີ້ໂຮນດິງລາວ ແລະ ກຸ່ມບໍລິສັດດາວສະຫວັນລົງທຶນກໍ່ສ້າງຈຳກັດ, ມາຮອດປັດຈຸບັນໄດ້ສຳເລັດການກໍ່ສ້າງແລ້ວປະມານ 54,2% ຂອງໜ້າວຽກທັງໝົດ ແລະ ປັດຈຸບັນນີ້ ທາງໄຟຟ້າລາວ ກຳລັງລົງເກັບກຳຂໍ້ມູນຜົນກະທົບສິ່ງແວດລ້ອມ ແລະ ສຳຫຼວດແລວສາຍສົ່ງ 115 kv ເພື່ອເຊື່ອມຕໍ່ກັບສະຖານີໄຟຟ້າເມືອງພີນ ເຊິ່ງຈະມີ 2 ບ້ານໄດ້ຮັບຜົນກະທົບຈາກໂຄງການດັ່ງກ່າວຄື: ບ້ານລະເບົານ້ຳ ແລະ ບ້ານລອຍນ້ຳ ເຊິ່ງຈະຕ້ອງໄດ້ຍົກຍ້າຍ 88 ຫຼັງຄາເຮືອນ, ຈະໄດ້ກໍ່ສ້າງໂຮງຮຽນລະດັບອະນຸບານຫາມັດທະຍົມ 14 ຫລັງ, ສຸກສາລາ 8 ຫລັງ ແລະ ສິ່ງປຸກສ້າງອື່ນໆອີກ ໂດຍຈະໃຫ້ສຳເລັດທ້າຍເດືອນເມສາ 2019 ນີ້ ແລະ ຄາດວ່າຈະໃຫ້ສາມາດເລີ່ມຜະລິດກະແສໄຟຟ້າໄດ້ໃນວັນທີ 31 ທັນວາ 2019.
