ບໍລິສັດ ຈໍລະເຂ ເປີດສໍານັກງານຜູ້ຕາງໜ້າ ຢູ່ນະຄອນຫຼວງວຽງຈັນ

    ໃນວັນທີ 21 ມີນານີ້, ບໍລິສັດ ຈໍລະເຂ ຄອບເປີເລຊັ່ນ ກໍາຈັດ (ປະເທດໄທ) ຜູ້ຜະລິດ ແລະ ຈໍາໜ່າຍສິນຄ້ານະວັດຕະກໍາ ເພື່ອງານກໍ່ສ້າງ, ສ້ອມແຊມ ແລະ ຕົບແຕ່ງ ກາຈໍລະເຂ ໄດ້ເປີດສໍານັກງານຜູ້ຕາງໜ້າ ຢູ່ບ້ານ ທ່າພະລານໄຊ ເມືອງ ສີສັດຕະນາກ ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານນາງ ຢານີ ສີມີໄຊ ອັກຄະຣາຊະທູດທີ່ປຶກສາຝ່າຍການພານິດແຫ່ງລາຊະອານາຈັກໄທ ປະຈໍາລາວ, ທ່ານ ໂຍທິນ ຍະມົນຍົງ ຜູ້ຊ່ວຍກໍາມະການຜູ້ຈັດການໃຫຍ່ສາຍງານຂາຍ ບໍລິສັດ ດັ່ງກ່າວ ແລະ ບັນດາຕົວແທນຈໍາໜ່າຍໃນນະຄອນຫຼວງວຽງຈັນເຂົ້າຮ່ວມເປັນຈໍານວນຫຼາຍ.

ທ່ານ ໂຍທິນ ຍະມົນຍົງ ໃຫ້ຮູ້ວ່າ: ການເປີດສໍານັກງານດັ່ງກ່າວ ກໍເພື່ອໃຫ້ກຸ່ມລູກຄ້າຂອງບໍລິສັດ ສາມາດຕິດຕໍ່ປະສານງານຕ່າງໆໄດ້ສະດວກ ໃນການໃຫ້ບໍລິການຫຼາຍຂຶ້ນ.

ທ່ານກ່າວອີກວ່າ: ສໍາລັບຕະຫຼາດວັດສະດຸກໍ່ສ້າງໃນລາວ ເປັນຕະຫຼາດຄ້ອນຂ້າງໃຫຍ່ ເຊັ່ນ: ນະຄອນຫຼວງວຽງຈັນ, ຈໍາປາຈັກ, ຄໍາມ່ວນ, ສະຫວັນນະເຂດ ແລະ ບໍລິຄໍາໄຊ, ຊຶ່ງເປັນໂອກາດໃຫ້ເກີດການຂະຫຍາຍຕົວທາງທຸລະກິດໄປແຫ່ງ ອື່ນໆຂອງລາວ, ເຮັດໃຫ້ເປັນທີ່ຍອມຮັບ ແລະ ມີຊື່ສຽງໃນຕະຫຼາດວັດສະດຸກໍ່ສ້າງຂອງລາວໃນອັນດັບຕົ້ນໆ. ໂດຍໃນປີນີ້ ບໍລິສັດໄດ້ຕັ້ງເປົ້າຍອດຂາຍໃນຕ່າງປະເທດໃຫ້ບັນລຸແຕ່ 15-20%, ໂດຍສະເພາະໃນຕະຫຼາດປະເທດມຽນມາ, ລາວ, ກໍາປູເຈຍ, ຫວຽດນາມ ແລະ ມາເລເຊຍ ພ້ອມຕະຫຼາດອື່ນໆອີກໃນເຂດ South East Asia ດ້ວຍ. ສ່ວນຕະຫຼາດໃນກຸ່ມປະເທດ CLMV ເຊັ່ນ: ຈໍາປູເຈຍ, ລາວ, ມຽນມາ ແລະ ຫວຽດນາມ ກໍເປັນຕະຫຼາດທີ່ມີຂະໜາດໃຫຍ່ ແລະ ມີກໍາລັງຊື້ສູງເຊັ່ນດຽວກັນ ແຕ່ກໍມີນັກລົງທຶນ ແລະ ຄູ່ແຂ່ງເພີ່ມເຊັ່ນດຽວກັນ.