ນະຄອນຫລວງສຸມໃສ່ປະຕິບັດ 5 ມາດຕະການຫລຸດຜ່ອນອຸປະຕິເຫດຕາມທ້ອງຖະໜົນ
ອົງການປົກຄອງນະຄອນຫລວງວຽງຈັນ ໄດ້ເຫັນດີເປັນເອກະພາບໃນການປະຕິບັດ 5 ມາດຕະການ ເພື່ອຫລຸດຜ່ອນບັນຫາອຸປະຕິເຫດບົນທ້ອງຖະໜົນ ຫລັງຈາກເຫັນວ່າສະພາບທີ່ບໍ່ເພິ່ງປາຖະໜາດັ່ງກ່າວນັບມື້ເພີ່ມຂຶ້ນ ອັນໄດ້ສ້າງຄວາມສູນເສຍແກ່ຊີວິດ, ຊັບສິນຂອງປະຊາຊົນ ແລະ ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມຂອງປະເທດ.
ການຕົກລົງບັນຫາດັ່ງກ່າວມີຂຶ້ນຫລັງການປຶກສາຫາລືກັນໃນວັນທີ 19 ມີນານີ້ ຢູ່ກອງບັນຊາການ ປກສ ນະຄອນຫລວງວຽງຈັນ ໂດຍການເປັນປະທານຂອງທ່ານເຈົ້າຄອງນະຄອນຫລວງ ສິນລະວົງ ຄຸດໄພທູນ ເຊິ່ງໄດ້ກຳນົດບັນດາກຸ່ມເປົ້າໝາຍທີ່ຈະຫລຸດຜ່ອນອຸປະຕິເຫດ ແລະ ຮັກສາຄວາມປອດໄພຕາມທ້ອງຖະໜົນເຊັ່ນ: ຍານພາຫະນະນຳໃຊ້ການຈະລາຈອນ, ຜູ້ຂັບຂີ່, ຜູ້ໂດຍສານ, ຜູ້ດຳລົງຊີວິດ ແລະ ເຄື່ອນໄຫວກິດຈະການຕ່າງໆຕາມແຄມທາງ, ການກໍ່ສ້າງຖະໜົນ, ກໍ່ສ້າງຕຶກອາຄານຕາມແຄມທາງ ແລະ ສິ່ງສຳຄັນແມ່ນຈະໄດ້ເອົາໃຈໃສ່ດຳເນີນການສຶກສາອົບຮົມຜູ້ໃຊ້ລົດ-ໃຊ້ຖະໜົນ, ເຂັ້ມງວດກວດກາຜູ້ດື່ມສິ່ງມຶນເມົາແລ້ວຂັບລົດ, ກວດກາຄວບຄຸມຄວາມໄວຂອງນັກຂັບຂີ່, ເຂັ້ມງວດປະຕິບັດວິໄນຕໍ່ຜູ້ລະເມີດລະບຽບຈະລາຈອນ ແລະ ກວດກາຜູ້ຈຳໜ່າຍເຄື່ອງດື່ມທີ່ມີທາດເຫລົ້າກ່ອນເວລາ 16:00 ໂມງຢ່າງເຂັ້ມງວດ.
ທ່ານເຈົ້າຄອງນະຄອນຫລວງວຽງຈັນ ກ່າວວ່າ: ອຸປະຕິເຫດບົນທ້ອງຖະໜົນແມ່ນປາກົດການຫຍໍ້ທໍ້ໜຶ່ງໃນສັງຄົມ, ຖ້າທຸກພາກສ່ວນບໍ່ເອົາໃຈໃສ່ແກ້ໄຂຢ່າງຈິງຈັງແລ້ວ ກໍຍິ່ງຈະເຮັດໃຫ້ບັນຫາດັ່ງກ່າວເພີ່ມຂຶ້ນນັບມື້. ດັ່ງນັ້ນ ເພື່ອຫລຸດຜ່ອນ ຈຶ່ງຂໍໃຫ້ພາກສ່ວນກ່ຽວຂ້ອງນຳເອົາມາດຕະການທີ່ກຳນົດອອກມານີ້ໄປເຜີຍແຜ່ໃຫ້ປະຊາຊົນ ກໍຄືນັກຂັບຂີ່ຜູ້ໃຊ້ລົດໃຊ້ຖະໜົນໄດ້ຮັບຮູ້ເຂົ້າໃຈຢ່າງກວ້າງຂວາງເລິກເຊິ່ງ. ຈາກນັ້ນ ແມ່ນໃຫ້ເລີ່ມປະຕິບັດມາດຕະການດັ່ງກ່າວນັບແຕ່ເດືອນກໍລະກົດ 2019 ເປັນຕົ້ນໄປ ໃຫ້ມີປະສິດທິຜົນ.
