ສູນກາງຊາວໜຸ່ມ ຫວນຄືນມູນເຊື້ອວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 64 ປີ

 ໃນວັນທີ 21 ມີນານີ້, ສູນກາງຊາວໜຸ່ມ ປະຊາຊົນ ປະຕິວັດລາວ ໄດ້ຈັດງານປາຖະກະຖາເລົ່າມູນເຊື້ອ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 64 ປີ (22/3/1955-22/3/2019), ໂດຍທ່ານ ກິແກ້ວ ໄຂຄໍາພິທູນ ເລຂາທິການສູນກາງພັກ ຫົົວໜ້າຄະນະໂຄສະນາອົບຮົມສູນກາງພັກ ໄດ້ຍົກໃຫ້ເຫັນມູນເຊື້ອແຫ່ງການກໍາເນີດ, ເຕີບໃຫຍ່ຂະຫຍາຍຕົວ ແລະ ການເຄື່ອນໄຫວຂອງພັກໃນພາລະກິດຕໍ່ສູ້ກູ້ຊາດໃນເມື່ອກ່ອນ ກໍຄືການນໍາພາສ້າງສາພັດທະນາປະເທດຊາດໃນປັດຈຸບັນ ວ່າ: ພັກປະຊາຊົນ ປະຕິວັດລາວ ແມ່ນພັກທີ່ສືບທອດພາລະກິດຂອງພັກຄອມມູນິດອິນດູຈີນ ຊຶ່ງແມ່ນປະທານ ໄກສອນ ພົມວິຫານ ເປັນຫຼັກແຫຼ່ງໃນການນໍາພາກໍ່ຕັ້ງ ແລະ ຖະນຸບໍາລຸງ, ພັກປະຊາຊົນ ປະຕິວັດລາວ ໄດ້ນໍາພາປະຊາຊົນລາວບັນດາເຜົ່າດໍາເນີນການປະຕິວັດຊາດ ປະຊາທິປະໄຕໃນຫຼາຍທົດສະວັດຈົນສາມາດເຮັດສໍາເລັດພາລະກິດປົດປ່ອຍຊາດ, ລົບລ້າງລະບອບລ່າເມືອງຂຶ້ນແບບເກົ່າ, ແບບໃໝ່ ແລະ ລະບອບສັກດີນາ ໄດ້ສະຖາປະນາສາທາລະນະລັດ ປະຊາທິປະໄຕ ປະຊາຊົນລາວຂຶ້ນ, ພາຍຫຼັງໄດ້ສໍາເລັດພາລະກິດປົດປ່ອຍຊາດແລ້ວ ພັກປະຊາຊົນ ປະຕິວັດລາວ ຍັງໄດ້ສືບຕໍ່ນໍາພາປະຊາຊົນລາວປະຕິບັດສອງໜ້າທີ່ຍຸດທະສາດຄື: ການປົກປັກຮັກສາປະເທດຊາດ, ການປົວແປງຮໍາບາດແຜສົງຄາມ ແລະ ໜ້າທີ່ໃນການສ້າງສາພັດທະນາປະເທດຊາດຕາມແນວທາງປ່ຽນແປງໃໝ່ຂອງພັກ ຈົນສາມາດເຮັດໃຫ້ປະເທດຊາດມີບາດກ້າວຂະຫຍາຍຕົວໃໝ່, ສິດເປັນເຈົ້າຂອງປະຊາຊົນລາວບັນດາເຜົ່າໄດ້ຮັບການເປີດກວ້າງ, ຄວາມສາມັກຄີເປັນເອກະພາບຂອງທົ່ວປວງຊົນລາວທັງຊາດນັບມື້ໄດ້ຮັບການປັບປຸງດີຂຶ້ນ, ທີ່ຕັ້ງ ແລະ ບົດບາດອິດທິພົນຂອງປະເທດຊາດບົນເວທີສາກົນໄດ້ຮັບການເຊີດຊູສູງຂຶ້ນ, ເສດຖະກິດ-ສັງຄົມ ແລະ ຊີວິດການເປັນຢູ່ຂອງປວງຊົນລາວທັງຊາດໄດ້ຮັບການປົກປັກຮັກສາປົວແປງດີຂຶ້ນເປັນກ້າວໆ.