ນາຍົກຊີ້ນຳຫລາຍບັນຫາໃຫ້ຂະແໜງການຕ່າງໆເອົາໃຈໃສ່ປະຕິບັດໃຫ້ມີປະສິດທິຜົນ
ໃນກອງປະຊຸມລັດຖະບານປະຈຳເດືອນມີນາ 2019 ໂດຍການເປັນປະທານຂອງທ່ານນາຍົກລັດຖະມົນຕີ ທອງລຸນ ສີສຸລິດ ເຊິ່ງໄດ້ຊີ້ນຳຫລາຍບັນຫາໃຫ້ຂະແໜງການຕ່າງໆເພີ່ມທະວີຄວາມເອົາໃຈໃສ່ປະຕິບັດໃນເດືອນເມສານີ້ໃຫ້ມີປະສິດທິຜົນ ແນໃສ່ຮັບປະກັນຄວາມສະຫງົບປອດໄພ, ຄວາມເປັນລະບຽບຮຽບຮ້ອຍຕ່າງໆໃນສັງຄົມ ໂດຍສະເພາະໃນຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ ສືບຕໍ່ຄົ້ນຄວ້າມາດຕະການແກ້ໄຂບັນຫາຫຍໍ້ທໍ້ຕ່າງໆໃນສັງຄົມ ເປັນຕົ້ນແມ່ນອຸປະຕິເຫດ, ຂີ້ລັກ-ງັດແງະ, ປຸ້ນຈີ້-ຊີງຊັບ, ຄ້າຂາຍເຖື່ອນ, ຄ້າຢາເສບຕິດ, ກຸ່ມແກ້ງກວນເມືອງ, ອັກຄີໄພ, ການເຜີຍແຜ່ຂໍ້ມູນທີ່ບິດເບືອນຄວາມຈິງຂອງສື່ສັງຄົມອອນລາຍ ແລະ ອື່ນໆ. ຂົງເຂດເສດຖະກິດແມ່ນໃຫ້ສຸມໃສ່ຊຸກຍູ້ການເກັບລາຍຮັບ ແລະ ປະຕິບັດລາຍຈ່າຍໃຫ້ໄປຕາມແຜນກຳນົດໄວ້, ສືບຕໍ່ຄຸ້ມຄອງອັດຕາແລກປ່ຽນໃຫ້ມີສະຖຽນລະພາບ ແລະ ເໜັງຕີງຢູ່ໃນຂອບທີ່ກຳນົດໄວ້, ເລັ່ງຈັດສັນທຶນໃສ່ໂຄງການລົງທຶນຂອງລັດປະຈຳປີ 2019 ຂອງແຕ່ລະຂະແໜງ ແລະ ທ້ອງຖິ່ນໃຫ້ສຳເລັດໂດຍໄວ ເພື່ອໃຫ້ສາມາດຈັດຕັ້ງປະຕິບັດໂຄງການໃຫ້ທັນຕາມແຜນການ, ພ້ອມທັງເພີ່ມທະວີການແກ້ໄຂຂອດອຸດຕັນຄວາມສະດວກໃນການດຳເນີນທຸລະກິດໃຫ້ດີຂຶ້ນ, ຈັດສັນພະນັກງານວິຊາການລົງຊ່ວຍປະຊາຊົນໃນການຜະລິດ, ການສົ່ງອອກໃຫ້ຫລາຍ, ປັບປຸງຂອດຂັ້ນຕ່າງໆ ເພື່ອອຳນວຍຄວາມສະດວກໃຫ້ແກ່ນັກທ່ອງທ່ຽວດີຂຶ້ນ. ສໍາລັບຂົງເຂດວັດທະນະທຳ-ສັງຄົມ ແມ່ນໃຫ້ເອົາໃຈໃສ່ຕິດຕາມ, ຊຸກຍູ້ການຊົດເຊີຍໃຫ້ປະຊາຊົນທີ່ຖືກຜົນກະທົບຈາກໂຄງການພັດທະນາຕ່າງໆໃຫ້ໄວ ເພື່ອປ້ອງກັນບໍ່ໃຫ້ເກີດຫາງສຽງ ແລະ ສ້າງຜົນກະທົບຕໍ່ການປະຕິບັດໂຄງການ, ເອົາໃຈໃສ່ວຽກງານກວດກາການນຳເຂົ້າສິນຄ້າອຸປະໂພກ-ບໍລິໂພກ ຢ່າງເຂັ້ມງວດ ເປັນຕົ້ນແມ່ນການນຳເຂົ້າສັດ, ພືດຜັກ-ໝາກໄມ້, ຢາປົວພະຍາດ, ເຄື່ອງສຳອາງ ແລະ ສິນຄ້າປະເພດອື່ນໆທີ່ມີຄວາມສ່ຽງຕໍ່ສຸຂະພາບຂອງປະຊາຊົນ, ເລັ່ງຈັດສັນ-ແຈກຢາຍເຄື່ອງຊ່ວຍເຫລືອທີ່ຈຳເປັນໃຫ້ແກ່ປະຊາຊົນທີ່ໄດ້ຮັບຜົນກະທົບຈາກໄພພິບັດ, ສືບຕໍ່ຕິດຕາມ ແລະ ເຝົ້າລະວັງການລະບາດຂອງພະຍາດຕ່າງໆໃນລະດູຮ້ອນ ເປັນຕົ້ນໄຂ້ຍຸງ, ໄຂ້ຫວັດ ແລະ ພະຍາດສັດອື່ນໆ. ຂົງເຂດສິ່ງແວດລ້ອມ ແມ່ນໃຫ້ເອົາໃຈໃສ່ຕິດຕາມກວດກາການຖາງປ່າ ແລະ ຈູດສິ່ງເສດເຫລືອ ເພື່ອປ້ອງກັນໄຟໄໝ້ປ່າ ແລະ ການສ້າງມົນລະພິດທາງອາກາດ, ຕິດຕາມສະພາບການປ່ຽນແປງດິນຟ້າອາກາດຢ່າງປົກກະຕິ, ພ້ອມທັງມີການແຈ້ງເຕືອນ-ແນະນຳປະຊາຊົນເຖິງຄວາມສ່ຽງ, ວິທີປ້ອງກັນ ແລະ ການແກ້ໄຂຢ່າງທັນການ, ເພີ່ມທະວີການຕິດຕາມສະພາບການລັກລອບຕັດໄມ້ ແລະ ຂຸດຄົ້ນຊັບພະຍາກອນທຳມະຊາດຢ່າງເຂັ້ມງວດ, ພ້ອມທັງປະຕິບັດມາດຕະການຕໍ່ຜູ້ກະທຳຜິດຕາມລະບຽບກົດໝາຍ ແລະ ໃນເດືອນເມສານີ້ ແມ່ນຈະມີການສະເຫລີມສະຫລອງປີໃໝ່ລາວຄືດັ່ງທຸກປີຜ່ານມາ. ສະນັ້ນ ມອບໃຫ້ຂະແໜງການກ່ຽວຂ້ອງສືບຕໍ່ຄົ້ນຄວ້າ ແລະ ແຈ້ງການແນະນຳກ່ຽວກັບການສະເຫລີມສະຫລອງບຸນດັ່ງກ່າວບົນພື້ນຖານປະຢັດມັດທະຍັດ, ຈຳກັດຊ່ອງຫວ່າງສວຍໂອກາດຂຶ້ນລາຄາສິນຄ້າ, ການລັກລອບນຳເຂົ້າສິນຄ້າບໍ່ຖືກຕ້ອງຕາມລະບຽບ ລວມເຖິງການຊຸກຍູ້ສົ່ງເສີມວັດທະນະທຳ ແລະ ຮີດຄອງປະເພນີອັນດີງາມຂອງຊາດອີກດ້ວຍ.
