ເຜີຍແຜ່ການຈັດຕັ້ງຜັນຂະຫຍາຍຜົນກອງປະຊຸມໂຕະມົນປີ 2018 ແລະ ເປົ້າໝາຍການພັດທະນາແບບຍືນຍົງ ຢູ່ ລາວ
ໃນວັນທີ 25 ມີນານີ້, ກົມອົງການຈັດຕັ້ງສາກົນ ກະຊວງການຕ່າງປະເທດ ຮ່ວມກັບກົມຮ່ວມມືສາກົນ ກະຊວງແຜນການ ແລະ ການລົງທຶນ, ພ້ອມທັງກອງເລຂາຄະນະຊີ້ນໍາລະດັບຊາດເພື່ອການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ ໄດ້ຈັດກອງປະຊຸມເຜີຍແຜ່ການ ຈັດຕັ້ງຜັນຂະຫຍາຍຜົນຂອງກອງປະຊຸມໂຕະມົນປະຈຳປີ 2018 ແລະ ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ) ຢູ່ ສປປ ລາວ ໂດຍການເປັນປະທານຂອງທ່ານ ກິແກ້ວ ຈັນທະບູລີ ຮອງລັດຖະມົນຕີກະຊວງແຜນການ ແລະ ການລົງທຶນ ມີຜູ້ຕາງໜ້າຈາກບັນດາກະຊວງ, ອົງການທຽບເທົ່າ ແລະ ຂະແໜງການທີ່ກ່ຽວຂ້ອງຕ່າງໆ ເຂົ້າຮ່ວມເປັນຈໍານວນຫຼາຍ.
ກອງປະຊຸມດັ່ງກ່າວໄດ້ເຜີຍແຜ່ບົດລາຍງານຜົນຂອງກອງປະຊຸມໂຕະມົນ ປະຈຳປີ 2018 ແລະ ການກະກຽມຈັດກອງປະຊຸມໂຕະມົນປະຈຳປີ 2019 ແລະ ເຜີຍແຜ່ການຈັດຕັ້ງປະຕິບັດ (ປພຍ) ຢູ່ ສປປ ລາວ ໂດຍສະເພາະແມ່ນການຜັນຂະຫຍາຍບັນດາເອກະສານທີ່ສຳຄັນຂອງເປົ້າໝາຍການພັດທະນາແບບຍືນຍົງ ລວມທັງແຜນປະຕິບັດງານແຫ່ງຊາດ ແລະ ແຜນການປະຕິບັດງານການສື່ສານ, ໂຄສະນາ, ເຜີຍແຜ່ເພື່ອຈັດຕັ້ງປະຕິບັດວາລະປີ 2030 ແນ່ໃສ່ການສ້າງຄວາມຮັບຮູ້ ກ່ຽວກັບແນວທາງການຈັດຕັ້ງປະຕິບັດ ແລະ ການເຊື່ອມສານບັນດາຕົວຊີ້ບອກ (ປພຍ) ຢູ່ ສປປ ລາວ ໃຫ້ສອດຄ່ອງກັບແຜນພັດທະນາເສດຖະກິດ-ສັງຄົມ ແຫ່ງຊາດ ໃນແຕ່ລະໄລຍະ.
ໂອກາດດັ່ງກ່າວ, ທ່ານ ກິແກ້ວ ຈັນທະບູລີ ໄດ້ມີຄຳເຫັນໂດຍເນັ້ນເຖິງຄວາມໝາຍຄວາມສຳຄັນຂອງວຽກງານຂະບວນການໂຕະມົນ ແລະ ບົດບາດການມີສ່ວນຮ່ວມ ຂອງທຸກຂະແໜງການຂອງລັດ ຕິດພັນກັບຂອບການຮ່ວມມືລະຫວ່າງລັດຖະບານລາວ ແລະ ບັນດາຄູ່ຮ່ວມພັດທະນາ, ບົນພື້ນຖານການມີສ່ວນຮ່ວມຂອງທຸກພາກສ່ວນ, ປັບປຸງພື້ນຖານຊີວິດການເປັນຢູ່ ແລະ ຄວາມສາມາດໃນການປັບຕົວຂອງປະຊາຊົນ, ການພັດທະນາມະນຸດ ແລະ ການປົກຄອງ ການຄຸ້ມຄອງລັດດ້ວຍກົດໝາຍ ແລະ ການມີສ່ວນຮ່ວມໃນການປະກອບສ່ວນແນວທາງນະໂຍບາຍການພັດທະ ນາຂອງຊາດ ເຊິ່ງມັນນອນຢູ່ໃນແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ 8 ແລະ ຄຽງຄູ່ກັບການພັດທະນາແບບຍືນຍົງ. ພ້ອມກັນນັ້ນ, ກອງປະຊຸມ ຍັງໄດ້ປະກອບຄຳຄິດຄຳເຫັນ ແລະ ປຶກສາຫາລື ກ່ຽວກັບບັນດາສິ່ງທ້າທາຍດ້ານການຈັດຕັ້ງປະຕິບັດ (ປພຍ) ແລະ ການເຊື່ອມສານກັບແຕ່ລະຂະແໜງການໄດ້ປະເຊີນ. ນອກຈາກນັ້ນ, ກອງປະຊຸມຍັງໄດ້ປະກອບຄຳເຫັນ ກ່ຽວກັບຮ່າງບົດລາຍງານປະຈຳປີ 2018 ຂອບການຮ່ວມມືລະຫວ່າງລັດຖະບານລາວ ແລະ ອົງການ ສປຊ ປະຈຳ ສປປ ລາວ, ເຊິ່ງຜົນໄດ້ຮັບຂອງກອງປະຊຸມຈະເປັນການສັງລວມ ແລະ ກະກຽມສຳລັບການລາຍງານຕໍ່ກອງປະຊຸມປະຈຳປີ ຂອງຄະນະຊີ້ນຳລະດັບຊາດ ທີ່ຈະຈັດຂຶ້ນໃນຕໍ່ໜ້ານີ້.
