IMF ເຕືອນເສດຖະກິດເຂດໃຊ້ເງິນເອີໂຣ ຜະເຊີນຄວາມສ່ຽງຫລາຍຂຶ້ນ
ກອງທຶນການເງິນສາກົນ (IMF) ເຕືອນວ່າ: ເສດຖະກິດເຂດໃຊ້ເງິນເອີໂຣກຳລັງຜະເຊີນຄວາມສ່ຽງຫລາຍຂຶ້ນຈາກຫລາຍປັດໄຈ ເຊິ່ງລວມທັງການປົກປ້ອງທາງການຄ້າ ແລະ ການທີ່ສະຫະລາຊະອານາຈັກຖອນຕົວອອກຈາກສະຫະພາບເອີຣົບ (ເບຣັກຊິດ).
ທ່ານ ເດວິດ ລິບຕັນ ຮອງອຳນວຍການກອງທຶນການເງິນສາກົນ (IMF) ລະບຸເຖິງເລື່ອງດັ່ງກ່າວໃນລະຫວ່າງການກ່າວປາໄສຢູ່ນະຄອນຫລວງລິສບອນ ພ້ອມແນະນຳວ່າ: ເອີຣົບຈຳເປັນຕ້ອງດຳເນີນການຫລາຍຂຶ້ນ ເພື່ອກຽມພ້ອມຮັບມືກັບສະພາບເສດຖະກິດຂາລົງຄັ້ງຕໍ່ໄປທີ່ທ່ານເຊື່ອວ່າຈະເກີດຂຶ້ນ. ເອີຣົບຕ້ອງກຳຈັດຈຸດອ່ອນດ້ານນະໂຍບາຍໃຫ້ດີ ກ່ອນຈະລຸກລາມຈົນເກີດສະພາບເສດຖະກິດຂາລົງຂຶ້ນມາອີກ.
ຮອງຜູ້ອຳນວຍການ IMF ຍັງຊີ້ໃສ່ອີຕາລີ ເຊິ່ງມີເສດຖະກິດຂະໜາດໃຫຍ່ເປັນອັນດັບສາມໃນເຂດໃຊ້ເງິນເອີໂຣວ່າ: ມີຄວາມບອບບາງ ແລະ ບໍ່ມີການກຽມຄວາມພ້ອມ ໂດຍລວມຍອດຜະລິດຕະພັນພາຍໃນ (GDP) ຂອງອີຕາລີຫລຸດລົງ 0,2% ໃນໄລຍະເດືອນຕຸລາ-ທັນວາ 2018 ຫລັງຈາກປັບຫລຸດລົງ 0,1% ໃນໄຕມາດກ່ອນໜ້າ ສົ່ງຜົນໃຫ້ອີຕາລີປະສົບສະພາບເສດຖະກິດຫລຸດຖອຍເປັນຄັ້ງທີສາມໃນຮອບສິບປີ ແລະ ມີຄວາມເປັນໄປໄດ້ທີ່ເສດຖະກິດອີຕາລີຈະຫລຸດລົງອີກໃນໄຕມາດນີ້.
ທ່ານ ລິບຕັນ ເຕືອນວ່າ: ເອີຣົບບໍ່ອາດເພິ່ງພາເຄື່ອງມືແບບດຽວກັບທີ່ເຄີຍໃຊ້ໃນການຕໍ່ສູ້ກັບວິກິດການເງິນໃນປີ 2008 ເພາະທະນາຄານກາງຂອງປະເທດຕ່າງໆໃນພາກພື້ນບໍ່ອາດໃຊ້ມາດຕະການກະຕຸ້ນທາງການເງິນໄດ້ຫລາຍໄປກວ່ານີ້ແລ້ວ ແລະ ລັດຖະບານຫລາຍປະເທດແບຮັບພາລະໜີ້ສູງຢູ່ແລ້ວໃນປັດຈຸບັນ.
