ອາຣັບບີ ຊາອຸດິດ ປະນາມອາເມລິກາຮັບຮອງ ບ່ອນຮາບສູງໂກລັນເປັນຂອງອິດສະລາແອນ
ທາງການອາຣັບບີ ຊາອຸດິດ ບໍ່ຍອມຮັບຄຳປະກາດຂອງລັດຖະບານປະທານາທິບໍດີ ໂດນັລ ທຣຳ ທີ່ຮັບຮອງບ່ອນຮາບສູງໂກລັນໃນຊີຣີໃຫ້ເປັນຂອງອິດສະລາແອນ ໂດຍປະນາມວ່າເປັນການລະເມີດກົດໝາຍສາກົນ.
ປະທານາທິບໍດີ ທຣຳ ແຫ່ງອາເມລິກາ ເຊິ່ງເປັນພັນທະມິດສຳຄັນຂອງອາຣັບບີ ຊາອຸດິດ ນຳເອົານະໂຍບາຍອາເມລິກາທີ່ດຳເນີນມາຫລາຍສິບປີ ໂດຍການປະກາດໃນວັນທີ 25 ມີນາ ຮັບຮອງອະທິປະໄຕຂອງອິດສະລາແອນທີ່ມີຕໍ່ບ່ອນຮາບສູງໂກລັນ ເຊິ່ງຍຶດໄປຈາກຊີຣີໃນສົງຄາມ 6 ວັນໃນປີ 1967 ແລະ ການລວມດິນແດນເຂົ້າກັນທັງທີ່ບໍ່ໄດ້ຮັບການຮັບຮອງຈາກປະຊາຄົມໂລກ. ສຳນັກຂ່າວຂອງທາງການອາຣັບບີ ຊາອຸດິດ ລາຍງານວ່າ: ອາຣັບບີ ຊາອຸດິດ ຄັດຄ້ານ ແລະ ປະນາມຄຳປະກາດຂອງລັດຖະບານອາເມລິກາໃນການຮັບຮອງອະທິປະໄຕຂອງອິດສະລາແອນທີ່ມີຕໍ່ບ່ອນຮາບສູງໂກລັນ ແລະ ລະບຸວ່າ: ໂກລັນເປັນດິນແດນຂອງອາຣັບຊີຣີ ເຊິ່ງການຮັບຮອງໃຫ້ອິດສະລາແອນຖືວ່າລະເມີດກົດບັດສະຫະປະຊາຊາດ ແລະ ມະຕິສາກົນ.
