ທຸບສະຖິຕິໂລກ ! ຣີລ ມາດຣິດ ຈັດເຕັມ ພ້ອມທາບທາມ ເອັມບັບເປ້ ຮ່ວມທີມ
ຟຣັອງ ບານເຕະ ສື່ຂອງຝຣັ່ງ ລາຍງານວ່າ: ຣີລ ມາດຣິດ ກຽມຍື່ນຂໍຊື້ ຄີລິຍັນ ເອັມບັບເປ້ ຫົວຫອກ ປາຣີ ແຊງແຊກແມງ ດ້ວຍຄ່າຕົວສູງເປັນສະຖິຕິໂລກ 280 ລ້ານເອີໂຣ ແລະ ການເຈລະຈາອາດຈະເລີ່ມຂຶ້ນໃນອາທິດໜ້າ.
ຣີລ ມາດຣິດ ສະໂມສອນຍັກໃຫຍ່ແຫ່ງ ລາ ລີກາ ສະເປນ ກຽມຈະຍື່ນຂໍ້ສະເໜີເປັນເງິນສູງເຖິງ 280 ລ້ານເອີໂຣ ໃຫ້ ປາຣີ ແຊງແຊກແມງ ພິຈາລະນາ ເພື່ອຈະຂໍຊື້ ຄີລິຍັນ ເອັມບັບເປ້ ກອງໜ້າດາວຮຸ່ງຊາວຝຣັ່ງໄປຮ່ວມທັບ.
ເອັມບັບເປ້ ໄດ້ຮັບການຍົກຍ້ອງຈາກຫລາຍຄົນວ່າມີໂອກາດເປັນນັກເຕະເບີ 1 ຂອງໂລກພໍໝົດຍຸກຂອງ ລິໂອເນລ ເມສຊີ ກັບ ຄຣິສເຕຍໂນ ໂຣນັລໂດ້ ໄປແລ້ວ ຫລັງຈາກລາວມີຝືຕີນທີ່ສຸດຍອດ ແລະ ສ້າງຜົນງານໄດ້ໂດດເດັ່ນ ທັງທີ່ຫາກໍມີອາຍຸພຽງ 20 ປີເທົ່ານັ້ນ ແລະ ຍັງໄດ້ແຊ້ມຫລາຍລາຍການນຳອີກ.
ທັງນີ້ ຣີລ ມາດຣິດ ໃຫ້ຄວາມສົນໃຈ ເອັມບັບເປ້ ມາດົນແລ້ວ ແລະ ຫລ້າສຸດ ຟຣັອງ ບານເຕະ ໃຫ້ຮູ້ວ່າ: ຣີລ ມາດຣິດ ພ້ອມຈະຈ່າຍເງິນເຖິງ 280 ລ້ານເອີໂຣ ເພື່ອເປັນຄ່າຕົວຂອງລາວ ເຊິ່ງແນ່ນອນວ່າຈະເຮັດໃຫ້ລາວເປັນນັກເຕະທີ່ມີຄ່າຕົວແພງທີ່ສຸດໃນໂລກ ທຸບສະຖິຕິເກົ່າຂອງ ເນມາ ທີ່ເຮັດເອົາໄວ້ 222 ລ້ານເອີໂຣ ໃນຕອນທີ່ຍ້າຍຈາກ ບາເຊໂລນາ ໄປຢູ່ກັບ ປາຣີ ແຊງແຊກແມງ ໃນຊ່ວງໜ້າຮ້ອນ ປີ 2017 ທັນທີ.
ສື່ດັ່ງກ່າວລາຍງານວ່າ: ຊີເນດິນ ຊີດານ ຄູຝຶກ ຣີລ ມາດຣິດ ກ່າວວ່າ: ລາວຕ້ອງການໃຫ້ທີມຄວ້າ ເອັມບັບເປ້ ມາຮ່ວມທີມໃຫ້ໄດ້ ລວມທັງກຳນົດໃຫ້ ເອັມບັບເປ້ ເປັນເປົ້າໝາຍຫລັກຂອງທີມ ແລະ ການເຈລະຈາອາດຈະເລີ່ມຂຶ້ນພາຍໃນອາທິດໜ້າ.
ສຳລັບເງິນ 280 ລ້ານເອີໂຣ ທີ່ຈະຈ່າຍເພື່ອເປັນຄ່າຕົວຂອງ ເອັມບັບເປ້ ນັ້ນ ມັນບໍ່ໄດ້ເປັນບັນຫາສຳລັບ ຣີລ ມາດຣິດ ເພາະວ່າກັນວ່າ ຟໍເຣນຕິໂນ ເປເຣຊ ປະທານຂອງທີມດັງແຫ່ງຖິ່ນ ຊານຕິອາໂກ້ ເບນາເບວ ຮັບປະກັນວ່າ ຊີດານ ຈະມີງົບປະມານການເສີມທັບໃນຊ່ວງໜ້າຮ້ອນນີ້ຢ່າງໜ້ອຍ 500 ລ້ານເອີໂຣ.
